Ayịzaya 37
37
Amadaḅọ Ḅe Ayịzaya Ḅịḅị Gbelam
(2 Ama 19.1-7)
1Ama-da Hẹzịkaya in ḍuko ye naa gbọrụ kiri, ori ori akapa kanm kururu ḅụ, akpa ịnwaịn, tẹ mẹnjị KỊNỊNYANAḄỌ ḅe warị mẹ mum. 2Ọ̀ nwẹnị Ẹlịyakịmụ, amada-warị mẹ ḍikiḍikiarị opu fịrịmẹnjịḅọ ḅe na, Sẹbụna, ḅẹrẹ-siri mẹ ḅẹ ḍiri-kẹẹḅọ ḅe na, agbamịẹapụ ma ḅẹ opu apụ ma na, kẹ Ịkịankoro Ayịzaya, Emọzị tụḅọ ḅe, fịrịma. Ini sọ akpa ḅirim. 3Mie ori ịn ḅẹẹm ịn da-mu Ayịzaya pịrị ḅẹ oku mẹ: “Mịmgba anie ḅụụ-fụka eneḅaka, wa fomu-ḅara daarị tẹ tọrụ-tuu ḅụ emi. Wa iyi laa tẹ ẹrẹḅọ, tẹ ịnyọ ḅụụ ḅụ fa ḅaka tẹ, ḅarị inetẹ ịngịma pakama-ḅo-a ḅọ kịkarị. 4Asiriya tomikiri mẹ daarịḅọ ḅe ọ̀ sịḅịda fịrịmẹnjịḅọ fịrịma-ḅom ò ḅo ḍumo wararị Tamụnọ ḅe mịẹ-simaa. Yee KỊNỊNYANAḄỌ ị́ Tamụnọ ḅe, mịna mịẹ-sima aị ma ḍuko apụ ma fomu-ḅara kẹ ịn pịrị. Mie ḅụ Tamụnọ tẹkẹ wamịna atomi ma ḅụ kirikọn-apụ ma pịrị.”
5Ayịzaya Amadaḅọ Hẹzịkaya oku mẹ naa tẹso, 6ọ̀ mị pakịrị-ḅịḅị mẹ kẹ pịkị fịrịmam, “KỊNỊNYANAḄỌ ḅe ị́ ḅẹẹarị mịnẹ, Asiriya ḅẹ apụ ma ọkịarị mịnẹ àrị inetẹ ị́ ḅọrọma ḅịa ḅẹ ye mẹ ị́ tẹmẹ-naịn-naịnma ma. 7KỊNỊNYANAḄỌ ḅe mịẹ tẹ tomikiri mẹ daarịḅọ ḅe ịba naa ḅa, anị nwẹnị mịẹ tẹ ọ̀ pịkị so ò soku-ḅẹ ama mu ḅa, tẹ KỊNỊNYANAḄỌ ḅe mịẹ tẹ anịanga kịnị ọ̀ ḅaa ḅa.”
Asiriya Ḅẹ Apụ Ma Jen Ẹrẹma Ḅịḅị Fịrịmam
(2 Ama 19.8-19)
8Asiriya ḅẹ opu fịrịmẹnjịḅọ ḅe ḅo nimim mịnẹ tomikiri mẹ daarịḅọ ḅe Lakisi koroma so tẹ Libina, kpeki wararị gbọrụ opu ama ḅụ owu sọarị; mie ḅụ ori anị anga ori na ḅịḅị-ọkịya ḅẹ tẹ mum. 9Ịba nwẹnị Asiriya ḅẹ apụ ma ḅeri la, mịnẹ Ijiputi-ḅẹ-apụ ọmụ-ogbo ḅo owu kẹ ịn paka ḅẹ ḅoarị, Sudanị ḅẹ Amadaḅọ Tahaka, ịna tọrọkọ-sụn wararị ḅara ḅụ. Tomikiri mẹ daarịḅọ ḅe miemẹ naa sakị, ò ḍiri kẹ Juda ḅẹ Amadaḅọ Hẹzịkaya fịrịma tẹ ọ̀ ḅẹẹm, 10“Ị́ kẹ ḅiokpọmarị tamụnọ ḅe ị́ ḅẹẹ tẹ mịnẹ ị́ ị̀ aḅara-ḅio sọ ḅịa, kụma ḍụkụ tẹ aniemẹ oḅori kẹ ị́ sịn ma. 11Ị́ naa tẹ Asiriya tomikiri mẹ daarịḅọ ḅe kẹ ọ̀ tọn-pẹlẹ tẹ fama ḅẹ ama mịẹ-mịẹ ye. Í kuromarị mịnẹ í inetẹ pụkọ-so ḅẹ? 12Ị̀ elemu aḍapụ ma opu ama ma famam — Gozanị, Heranị, Rezefụ na, tẹ Bẹtẹdeni ḅẹ apụ tẹ Tẹlasa ḅụ anga sime apụ ma, ḅaa famam, tẹ ịna atamụnọ ma ḅẹ gbọrụḅọ-sọ ịn ḅọrọma-a. 13Hamatị na, Apadi na, Sẹfavemu na, Hina na, Iva na ḅẹ amadapụ ma ịn tọ-anga emi?”
14Amadaḅọ Hẹzịkaya oku-mẹnjịapụ ma ḅara ḍiri mẹ daa tẹ anị gom. Anịtẹso ọ̀ mẹnjị Tamụnọ warị mẹ mu tẹ ḍiri mẹ kẹ anịanga KỊNỊNYANAḄỌ ḅe tọrọkọ koromam. 15Ọ̀ nwẹnị KỊNỊNYANAḄỌ ḅe tẹkẹ tẹ ḅẹẹ, 16#Pks 25.22“Kụrọmamgba nyana KỊNỊNYANAḄỌ, Izirẹlị Tamụnọ, í í emine, ị́ tẹmẹ tẹ pamba-sụa wararị aị ma ọgọnọ-jụ simearị ye mẹ ḅụ lẹgị wararị, kịngẹ anie Tamụnọ, ḅẹrẹtọn tomikiri ḅụ amadapụ daarị ayọ mamgba pịrịarị. Ị́yẹrị kiri mẹ na So-tọrụ mẹ na tẹmẹm. 17Mịọkụ, KỊNỊNYANAḄỌ, wa naa tẹ wamịna ḅụ pakarị ye mẹ ḍiki. Sẹnakeribu ḍuko tẹ kẹ ị́ mịẹ-simarị ye pokii, ḍumo wararị Tamụnọ ḅe. 18KỊNỊNYANAḄỌ, wamịnị-mgba nimi wararị, mịnẹ Asiriya tomikiri mẹ da-da apụ ma tọnwa asịẹ fama tẹ, ịna amakiri ma papaa gbin kuro simearị, 19pịkị ịna atamụnọ ma dọkịmam — anie gbala-gbala tamụnọ-a aị ma, tomi ḅara kẹ sịn na ḍụḅarị na kẹ mịẹ ye afụḅara kịngẹ. 20Mịọkụ, KỊNỊNYANAḄỌ, wamịna Tamụnọ, Asiriya ḅẹ apụ ma ḅara-ḅio wa pọkọ pakama-ḅo, mie ḅụ tomikiri ḅẹ asịẹ mamgba nimi ḅa mịnẹ kịngẹ anie Tamụnọọ.”
Ayịzaya Kẹ Amadaḅọ Ḅe Fịrịma Oku-Ḅịḅị
(2 Ama 19.20-37)
21Anịtẹso Ayịzaya oku kẹ ama-da Hẹzịkaya fịrịmam mịnẹ kẹ amadaḅọ ḅe tẹkẹ pakịrị ḅụ. 22Mie KỊNỊNYANAḄỌ ḅe ḅẹẹ yee, “Sẹnakeribu, kpọma-ḅẹlẹmarị Jeruselemu mẹ ị́ ẹrịarị, pịkị í ḍiki-simarị. 23Í kuromarị ị́ mịẹ sima tẹ kẹ tii-tii ye mịẹarị ḅọ ḅe tụḅọ? Ị́ ị̀ mangịma-a ḅara kẹ ye mịẹtẹ, Izirẹlị tẹkẹarị Fịafịa Ḅọ ḅe. 24Ị́ ị́ afịrịmẹnjịapụ fịrịma-ḅo ḅụụ boma ị̀ pịrị tẹ, mịnẹ í kirimẹnjị-ọmụarụ mamgba ḅụ ị́ Lẹbanọnị ḅẹ geletẹịn tụndụ ma nẹngịma tẹ. Ị́ ḅụụ-bomam mịnẹ í geletẹịn sida asịn ma na iḅitẹịn Sayịpẹrẹsị asịn ma na pẹlẹ-gbin tẹ, mịnẹ ị́ pịkị opu piri ma ḅio sọ mu fa yọ mẹ la tẹ. 25Í ḅụụ bomam mịnẹ ja amakiri ḅụ í suḅe soku, soku tẹ ḍuu ḅuu tẹ, tẹ ị́ pịkị ḅẹẹm mịnẹ ị́ ọmụapụ ḅụọ kẹ Nayịlị Tọrụ mẹ nanga samụnọ kiri mịẹm.
26“Jene-jene amụ ị́ naa-a mịnẹ yẹrị mie-mẹmgba tọn wẹrịm iḅere-iḅerea kụra ḅio? Tẹ mịọkụ arị anị mịẹ tẹ. Yẹrị kụrọ mẹ kẹ ị́ pịrịm ị́ kẹ amịna aḅụụ mịẹ kụrọma, kụrọma tẹ opu ama ma kẹ ḅo sịra sọma. 27Arị ayọ ma ḅụ anga sime apụ ma ḅarị kụrọ nyana-a; ị́ ịna tẹmẹ-naịn-naịnma tẹ in fomu ḅo ḅarị tomi-a ḅara wẹrịm. Ịn kịkaye osuka tẹ ḍụọ ḍiḅi piri-ḅio so-paka aị, anịanịa ḍọkọḍọkọ asịn tẹ warị isun ḅụ so-paka aị, tẹ ịrụa pakarị anga ḅụ ọfịrị fẹrụ ḅaa aị.
28“Kụma í gboloma ye goyegoye à nimi wararị, ị́ mịẹarị ye na í muarị anga na, ị́ ịganị kẹ ekire ị̀ pịrịarị ye mẹ à nimi wararị. 29Í ekirearị ye mẹ na ị́ ḅụụ boma mẹ na gboloma ye, ịn ḍuko ị̀ pịrị tẹ; mịọkụ àrị arị kẹ í nini sụka tẹ ḍigi kẹ ị́ ḅịḅị kpọọ ḅa, tẹ ị́ nụnụ pịkị ị́ ḅọrọ ḅo etela suu ḅa.”
30Ayịzaya nwẹnị Amadaḅọ Hẹzịkaya ḅẹẹ “Miemẹ anie paka ḅarịye ḅẹ elekima. Mị kụra na jen kụra na ḅụ ngẹrị paka mgbọlụ ma mie ọ́ fị ḅarịye, kụma anị ḍukama kụra ḅụ ọmịnị inetẹ ọmịna mbịaka ḍiḅi tẹ pịkị anị pẹlẹ ḅa, pịkị kụrọ sịn ḍiḅi tẹ arịḅẹ mgbọlụ fị ḅa. 31Juda ḅụ fịị-a so apụ ma lolo tẹ ḍiḅi tẹ iḅiọkụ kuno sụa iderima lama tẹ mgbọlụ sụarị asịn kịka ḅa. 32Jeruselemu ḅio na Zayọnị tụndụ ọgọnọ na fịị-a so tẹ kirikọn-apụ paka ḅa, Kụrọmamgba nyana KỊNỊNYANAḄỌ ḅe ọkọ kẹ anị tọn kụrọma tẹ mịnẹ miemẹ mịẹ ḅa.”
33Mie KỊNỊNYANAḄỌ ḅe Asiriya tomikiri mẹ daarịḅọ ḅe gboloma ye ḅụ ḍuko ye: “Ọ̀ mị ama mẹ sọ ḅo ḅịa, anịanịa ḍiein gbọrụ mgbọ kẹ anị tẹịn. Gbọrụ ọmụḅọ ekpeke sọ ḅo mị opu ama mẹ kpeki ḅịa, tẹ ama ọkị ḅẹ tẹ koruarị apụ nama ikelema-ikelema gele ayọ sọ nama ḅịa. 34Ò ḅo gbọrụ etela mẹ ḅụ mie ọ̀ pịkị so ḅarịye, mị ama mẹ sọ mu-a ḅara ḅụ. Yẹrị KỊNỊNYANAḄỌ ḅe ḍuko tẹ. 35À mịẹ ama mẹ ḍụa tẹ anị gbaịn ḅọrọma ḅa, ị̀ kụn na à minini ị̀ fịrịmẹnjịḅọ Devidi pịrị ye mẹ na ẹrẹsị.” 36KỊNỊNYANAḄỌ ḅe gbọrụ enjẹlị nwẹnị Asiriya ḅẹ ọmụapụ ma sime yọ mẹ mu tẹ ọmụapụ ma ḅẹ kịnị tẹra puku fa suei na sọnọ ẹndẹ na ḅaa. Ene ḅaa sakị inimgba anịanga fịị sara wararị! 37Anịtẹso Sẹnakeribu, Asiriya tomikiri mẹ daarịḅọ ḅe nwẹnị anịjụ koroma pịkị so ori ama Ninive mu. 38Gbọrụ ene ḅụ, ḅụ ori ọ̀ tamụnọ Nisirọkụ warị ḅio tẹkẹarị ogbo, ori maa owiapụ-awọmẹ, Adiramẹlẹkị na Sariza na ịna okologie kẹ ọ̀ pẹlẹ-ḅaa tẹ mangị-so Araratị ama mum. Ò jen owiḅọtụḅọ, Ẹsarịhadọnị, ò kiri ọkịm, tomikiri mẹ daarịḅọ ḅara ḅụ.
Currently Selected:
Ayịzaya 37: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria