Ayịzaya 34
34
Tamụnọ Fomu-ḅara Kẹ Ori Na Fịya-a Apụ Ma Pịrị ḅa
1Tomikiri ḅẹ opu asịẹ ma ḅẹ apụ mamgba, ó ḅoo! Ó ḅo kobiri ikelema tẹ pokii. Yee bebe tomikiri mẹ na anị ḅio angarị apụ mamgba na mịanga ḅo tẹ poki. 2KỊNỊNYANAḄỌ ḅe ịganị nyana sịẹ-sịẹ mamgba na ịna ọmụ-ogbo mamgba na pịrị wararị. Ọ̀ tọn pẹlẹ tẹ ịn fịị gulugulu ḅa. 3Ịna aḍụẹịn ma kịnị ḍiḅi ḅịa, kụma arị sara sime tẹ ḅụrụ-ḅụrụ fụrụ ḅa; tẹ tụndụ mamgba awụ ḅịya ḅa ọmbie ḅụ. 4#Mat 24.29; Mak 13.25; Luk 21.26; Mịẹ 6.13,14Ịrụa mẹ na, akalụ mẹ na, lolia ma na kọrị sara tẹ fọọn sọ ḅa. So-tọrụ mẹ kịnị ḅarị ẹrị ḅịa, anị abịlala kịka tẹ iko iwo ḅa, tẹ lolia ma ḅịkị koro ḅa, gbala ịnyịnya kụrọ sịn, anịanịa figi sịn, ḅụ siin-sara ḅara.
5 #
Ayị 63.1-6; Jer 49.7-22; Izi 25.12-14; 35.1-15; Emọ 1.11,12; Oba 1.1-14; Mal 1.2-5 KỊNỊNYANAḄỌ ḅe So-ḅio sime tẹ amịna okologie tẹlẹma tẹẹ, mịọkụ anị Idọmụ pẹlẹ ḅa, ini ma tẹ ọ̀ tọn-pẹlẹ ḅaa guluguluma pịrị tẹ apụ ma. 6Ọmbie na ḅẹlẹkị na ori okologie mẹ ọmbịma fama ḅa, anie anana na oḅori na ọmbie na ḅẹlẹkị na mịẹ-mịẹ ḅara kịka ḅa ini ịn kẹ agbamịẹ-anga ḅụ. Bozara opu ama mẹ ḅio mie KỊNỊNYANAḄỌ ḅe mie mị agba mẹ mịẹ ḅarị ye; ò miemẹ kẹ gburo-gburoma Idọmụ amakiri ḅụ tọnwa-apụ kẹ gbọrụ kiri ḅa mịẹ ḅa. 7Tomi ma piri-ḅio-ḅẹ pootẹ-anambulo na asambịrịma anambulo na ḅịkị ḅara ḅịkị ḅa, tẹ kiri mẹ awụ ḅịya ḅa ọmbie mẹ ḅụ, tẹ ḅẹlẹkị anị gbaịn ḅa. 8Mie KỊNỊNYANAḄỌ ḅe Zayọnị pụkọ-pakamaḅo ḅẹ sakị mẹ, tẹ si kẹ wa tọn apụ ma ḅara gbẹẹfị ḅii.
9Idọmụ ḅẹ atọrụ ma koluta ḍi ḅa, tẹ kiri mẹ ḅo kọrịarị ḍụḅarị sọ ḅa. Bebe sịẹ mẹ ḅẹ amakiri mẹ koluta kọrị-kọrị ḅara kọrị ḅa. 10#Mịẹ 14.11; 19.3Anị eneḅaka na ḍin na kẹ dọkị ḅa, tẹ onwin anị ḅụ turee-tureema iwo gbamaso ḅa. Kiri mẹ papaa koro-sime ḅa ḅụọ-fa-ḅụọ-paka ḅụ, tẹ ye-muarị tẹ anịanga jen kẹ mẹnjị ḅọrọ ḅẹ gbọrụḅọ-sọ ḅarị ofori. 11Mgbukumgbuku ma na agụnkwọ ma na kiri mẹ kẹ ịna nye sọma ḅa. KỊNỊNYANAḄỌ ḅe anị kẹ sịn gberie-sọ ofori tẹ papaa koro-sime wararị ye yọ sọma ḅa, tẹrẹmẹ tẹmẹ ma ḅụ anị sime-ḅara. 12Sịẹ mẹ da ḅẹ ḅọ paka ḅịa, tẹ ḅẹrẹtọn-apụ mamgba so fama ḅa. 13Ama-da awarị ma na onu gbori wararị ama mamgba na ḅio nangị asịn na ọmị asịn na so-paka gele ḅa, tẹ piri obiri ma na mgbukumgbuku ma na arị ḅio anga ḅa. 14Piri-ḅio-ḅẹ anama anịanga mẹnjịma ḅọrọ ḅa, tẹ si-atẹmẹ pịkị japụ-japụ sịn ḅa. Si-tẹmẹ opu-iyingi árị ịnyọsara ḅẹ anga ḍọkị ḅẹ ḅo ḅa. 15Anị anga ḅụ mgbukumgbuku amẹẹ ịna awarị nama tẹ anyị koroma ḅa, ini ịwọ aị ma kẹngẹ pakama-ḅo tẹ in ḍikiḍiki ḅa. Ẹdẹlẹ ma sọ gberie, gberie ḅo ḅa tẹ anịjụ kobiri ḅa.
16KỊNỊNYANAḄỌ ḅe ḍiri mẹ, tẹ ọ̀ tẹmẹ tẹ ḍumo wararị aị ẹrẹ simearị ye mẹ ḍọkịị, tẹ anị ḍukoarị ye goo. Mịna ọ̀ tẹmẹ-aị ma ḅẹ gberie-sọ kẹ koro-a so ḅịa, owi na ịyọrọ na ḅụ paka ḅịa gberie-sọ ofori. KỊNỊNYANAḄỌ ḅe tọn tẹ anị ọkọ simem; ò ḅioju in kobiri ḅo ḅa. 17KỊNỊNYANAḄỌ ḅe mie kiri mẹ ḍie, tẹ ọrụḅọ-ọrụḅọ nye kẹ mḅọ pịrị ḅarịye. In kiri mẹ ḅụ anga ḅa ḅụọ-fa-ḅụọ-paka ḅụ, tẹ anị sime ịn pịrị gbamaso ḅa.
Currently Selected:
Ayịzaya 34: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria