Hosiya 12
12
1Izirẹlịapụ ma mịẹ arị ye goyegoye, dee-dee ḅụ ọkị mu ḍin la, kẹ mịẹ ye ḅụụ sun-suu ye ofori pịkị ye guluguluma ye. Mbasị na gbiri-gbiri-gbiri na ịna ogboku ḅaka tẹẹ. Ini Asiriya na ọḅọkụ fị tẹ Ijiputi na ọḅụ mẹnjịarị.
2KỊNỊNYANAḄỌ nyana tẹ kẹ Izirẹlịapụ ma sịḅị-sẹịn ḅẹ ye emi, ọ̀ pịkị Juda fomu ḅa árị atomi ye mịẹarị ḅara gotẹ. Ori ịn mịẹ tẹ aị mamgba kẹ ịn gbẹ ḅa. 3#Suk 25.26#Suk 32.24-26Ịna elemu ḍaḅọ Jekọbụ ḅe ori iyimbere Ịsọ maa apụ awọmẹ ḅe na nụnụam ini ịna iyingiḅọ furo ḅio ḅụ ịn paa emi ogbo; Jekọbụ ḍụḅa paka-ḅo sakị, ọ̀ Tamụnọ na owu-sọm — 4#Suk 28.10-22ori enjẹlị na owu-sọ tẹ owu-ḅara-iḅi nyanam. Ori owu-owu tẹ boma ḅiim. Tẹ Bẹtẹlị ḅụ Tamụnọ ḅo wamịna elemu ḍaḅọ Jekọbụ la tẹ ori na ẹkwẹnm. 5Ḅieḅe anie KỊNỊNYANA-TAMỤNỌ, Kụrọmamgba Nyanaḅọ ḅe. KỊNỊNYANAḄỌ ḅe anie ẹrẹ mẹ tẹ kịnị kẹ sunsin ọ̀ pịrị ḅarịye mẹ. 6Mie ḅụ mịọkụ, Jekọbụ furo-ḅẹ-apụ, ọmịnị ọmịna Tamụnọ kẹ ḅiokpọma tẹ pịkị ọ̀ dama-mu. Ọ́ ḅioḅẹngbọ-kẹ-sịrẹrẹ-niḅi ḅara sime tẹ jụmọ la kiri kẹ mḅọ pịrị tẹ inema tẹ koru, ọmịna Tamụnọ ḅe ye mịẹ ḅa.
Ja Ḅẹrẹkọn Aḅịḅị
7KỊNỊNYANAḄỌ ḅe ḅẹẹarị, “Izirẹlịapụ ma kịnị mingirimarị Kenanị ḅẹ apụ ma mịẹ-mịẹ ḅara; ini ịna tuḅoniapụ inomarị la-a ye-tọn-aị ḅụ. 8Ịn ḅẹẹarị, ‘Wa ye-kọn tẹẹ, wa ye nyana sara tẹẹ. Tẹ gbọrụḅọ-sọ inetẹ wa kịnị-inoma ḅara kẹ ngọ-kọnm ḅẹ ye kẹ wamịna sịḅị-sẹịn ḅịa.’ 9#Lẹv 23.42,43Kụma yẹrị, KỊNỊNYANAḄỌ ọmịna Tamụnọ ḅe tẹ Ijiputi ḅụ ọmịna tọrọkọ-sụn tẹ ọ́ pakama-ḅo ḅọ ḅe, à mịẹ tẹ ó siin akpụrụ-awarị ḅio anga ḅa, anie à ịkpa ḅio à ḅo ọ̀ la sakị ọ́ mie sime-ḅara mẹ.”
10“Àrị ẹkwẹn ịkịankoroapụ ma pịrị tẹ tọnwa ịkịan kẹ in ḍiem, tẹ ịkịankoroapụ ma ḅụ mie à ḅọrọ tẹ tọnwa ḅeri nụnụ aị kẹ ị̀ atomi pịrị ye. 11Anịsọ ịn paa sunsin oru-afụḅara pịrịm Giliyadi ḅụ, tẹ sunsin arị pịrị apụ ma ịn fịị ḅa. Giliyadi ḅụ ịn nambulo-nambulo-nambulo kẹ agba mịẹm, tẹ anịanga ḅụ agbamịẹ-anga ma ḅo papaa kobiri-kobiri kirikiri ḅụ kpolima wararị aḍụḅarị sọ ḅa papaa finji sara wararị ḍụọ kọrị-a kiri ḅụ.”
12 #
Suk 29.1-20
Ye sime-ḅara ḅụ wamịna elemu ḍaḅọ mangị Mẹsopotemịya mum, anịanga ḅụ, ẹrẹḅọ sime ḅẹ gotẹ ọ̀ kọrịnama kọrị jen tomḅọ pịrị tẹ tomḅọ ḅe anana kokom. 13#Pks 12.50,51KỊNỊNYANAḄỌ ḅe ịkịankoroḅọ fịrịma mu ori atomi Izirẹlịapụ ma pụkọ-pakamaḅom ikoli ḅara-ḅio Ijiputi ḅụ, ori in koko ḅẹ ḅara. 14Izirẹlịapụ ma KỊNỊNYANAḄỌ ḅe mịẹ tẹ ọ̀ tẹmẹ-akụ ḅara kẹ ịganị tẹẹ; ịna si amịẹaị gotẹ ịn fịị gbẹ tẹẹ. KỊNỊNYANAḄỌ ḅe in fomu ḅa in dogi-ḅo ori ọgọnọ gbana tọrụ-tuu gotẹ.
Currently Selected:
Hosiya 12: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria