Hosiya 13
13
Kunoma Ḅẹrẹ-pẹlẹ-ḅịḅị Izirẹlị Ọgọnọ ḅụ
1Ḅọrọtẹ sakị ḅụ, Iferemu furo-ḅẹ-apụ ma ẹkwẹn kụma Izirẹlị ḅụ osi afuro ma ḅalafaam; ịn tọrụ saakị Iferemu ḍikim. Kụma tomi ma si mịẹm sunsin Balị pịrị ḅụ, tẹ mie gotẹ ịn fịị ḅa. 2Ịn paa si mịẹ-mịẹ-mịẹarị, kiri ḅio paka-ḅo aị kẹ tẹmẹ mḅudu tẹ in sunsin pịrịarị — seleḅa oru-afụḅara, tomina akuroma ḅụ tọn tẹ tomina aḅara kẹ mịẹ aị. Anị tẹso, ịn ḅẹẹarị, “Ọmịnị agbamịẹ arị pịrị.” Ndẹẹ wa arị oru-afụḅara ma ḅịḅị nọnjị ḅẹ ḅara — oru-afụḅara tẹ nambulo sime-ḅara simearị aị ḍiki-tọrụ ḅụ! 3Tẹ mie ḅụ arị atomi ma dede oḅuto kẹ ḅo kiri la wararị ye kịka tẹ kaan-so ḅa, igirigi tẹ dede-funfun ḅụ ịmaịn-faarị ye ọkụ. Ịn pẹlẹ sara tẹ fẹrụ kẹ fiin soarị asịra kịka ḅa, onwin sọma ye ḅụ paka-ḅoḅo tẹ wasamarị onwin ọkụ.
4KỊNỊNYANAḄỌ ḅe ḅẹẹarị, “Yẹrị anie KỊNỊNYANAḄỌ ọmịna Tamụnọ ḅe, anie Ijiputi ḅụ ọmịna tọrọkọ-sụn tẹ ọ́ pakama-ḅo ḅọ ḅe. Ì sikima ó jen Tamụnọ nyana-a. Yẹrị kịngẹ anie ọmịna ḅọrọmaḅọọ. 5#Dit 8.11-17Àrị ó koko tẹ ọ́ pịrị fịm, ịkpa mẹ ḅio. 6Kụma ọmịnị iḅi ama kiri ḅụ sọ-mu sakị, ọ́ fị furo ḅinmatẹ ye ọmịnị na-iḅim, anị tẹso, ọ́ ḅụụ-gelema tẹ ị̀ kẹ ḅioḅọrọmam. 7Mie ḅụ arị ọkụkụ kịka tẹ owu kẹ ọ́ paka ḅa. À sịrị kịka tẹ mẹnjị-ḅọrọ-anga ḅụ ọ́ ḅaa ḅẹ ḅara kẹ koru ḅa. 8À tuu tẹ amịna ḍọkọḍọkọ-awọmẹ famatẹ ye kịka tẹ owu kẹ ọ́ paka ḅa, tẹ arị ọ́ kanị finji ḅa. Àrị ọkụkụ kịka tẹ kirikiri ọ́ kanị pẹị-siin ḅa, tẹ piri-ḅio-ḅẹ si nama kịka tẹ ọ́ kanị-kọsịma ḅa.”
9“Izirẹlịapụ, àrị ó guluguluma ḅa! Anịtẹso tụḅọ inetẹ ḅarasụa ọ́ pịrị ḅẹ? 10#1 Sam 8.5,6Ọmịna amadaḅọ na sịḅịdapụ na ḅiim, kụma ndẹẹ ini inetẹ sịẹ mẹ ḅọrọma ḅẹ ḅara? 11#1 Sam 10.17-24; 1 Sam 15.26Ị̀ ịganị ḅụ àrị amadapụ kẹ ọ́ pịrị tẹẹ, tẹ ì owi-ịganị ḅụ àrị ini ọkị-so tẹẹ.”
12Izirẹlị si na ḅẹrẹ-ḅarasii na kẹẹ koro wararị, tẹ kẹẹ aị ma ịn kẹ koko kpaịnma wararị. 13Izirẹlị ḍumo ḅẹ sakị nyana wararị, kụma oḅori-sọ ḅụra mịẹ tẹ arị inetẹ anị kẹ ye mịẹ-a — gbala iyi pakama-ḅo ḅẹ-yearị tụḅọ tẹ ḅarị paka-ḅo ḍụkụ-a ye furo ḅio ḅụ. 14#1 Kọr 15.55Ma tomi ma àrị ịn ḅọrọma ḅịa ḍuḅu ḅio ḅụ, anịanịa ịn pụkọ-pakamaḅo fị kụrọ ḅụ. Fị, ị́ ama-fama obi ma kẹ ḅoo! Ḍuḅu, í guluguluma mẹ kẹ ḅoo! À ḅarị jen kẹ sịḅị-kụrụkụrụ nyana mịna tomi ma pịrị ḅịa. 15Karakaraye Izirẹlị nwẹnị osuka berebere ḅara bereberearị sọ, àrị ịkpa mẹ ḅio ịrụa-saakịarị-anga ḅụ ọfịrịarị fẹrụ fịrịma mu tẹ ịna ngụngụḅa ma na suḅe ma na samụnọma ḅa. Anị yela ye goyegoye dogi-so ḅa, ịna ngọ-koko-aḅio ḅio. 16Sameriya fomu-ḅara da nyanam á kẹ kọngọ-kụrọma ị̀ pịrị ye ḅụ. Árị atomi fịị ḅa ọmụ ḅio; ḅara-ḅio dogiarị awọmẹ ma ini ịn sẹma-kiri-gbin ḅa, tẹ furatẹ-ereme furo puu-puu finji ḅa.
Currently Selected:
Hosiya 13: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria