Hosiya 11
11
Tamụnọ nyana Ọ̀ Kọngọ-kụrọma Atomi pịrị Ḅẹlẹma
1 #
Pks 4.22; Mat 2.15 KỊNỊNYANAḄỌ ḅe ḅẹẹarị,
“Izirẹlị kala-sakị, àrị ọ̀ ḅẹlẹmam,
tẹ ị̀ tụḅọ ḅara ḅụ ọ̀ sịn pakama-ḅom.
2Kụma àrị ọ̀ sịn-sịn-sịn ḅara,
mie ọ̀ kẹ ị̀ ḅụ pịkị-so so ḅara.
Ị̀ atomi agbamịẹ Balị pịrịm;
ịn kụnụaị dọkịma oru-afụḅara pịrịm.
3Anịsọ yẹrị anie Izirẹlị toluma tẹ ịn mẹnjị ḍịn ḅọ ḅee.
Àrị ì kuḅu ḅio ị̀ atomi saakị dogim,
kụma yẹrị in ḍikiḍiki pakama-ḅo ye mẹ in minini ḍụkụ-a.
4Àrị in gotẹ ḅioḅẹlẹ na ḅẹlẹma na kẹ ịn nụnụ ḅụụ pịrịm.
Àrị ịn saakị dogi tẹ amgba kẹ in oḅolom;
À tuuideri tẹ fịye kẹ ịn pịrịm.”
5Ịn ḍụkụ tẹ pịkị ị̀ ḍọkụma-ḅoa, tẹ mie ḅụ ịn pịkị Ijiputi mu nyanam, tẹ Asiriya ḅẹrẹtọn ịn pịrị ḅa. 6Ọmụ ịna opu ama ma ọfịn tẹ opu ama ma ogigo-aḅọkọ ma kan kiri lama ḅa. Anị ị̀ atomi guluguluma ḅa ini in kuromarị ịna ḅụụ ḅụ iḅi tẹịn ye mịẹarị ẹrẹsị. 7Ini ịgbanịarị ini ị̀ ḅụ pịkị so. Ịna kọngọ jịjịmarị kọngọ-kpọ-sịn mẹ gotẹ ini oloku pakama ḅa, kụma gbọrụḅọ-sọ anị saakị sin ịn pịrị ḅịa. 8#Dit 29.23Izirẹlị, ndẹẹ à gotẹ ị́ ḅụ ḅara-siin ḅẹ ḅara?
Ndẹẹ àrị inetẹ ị́ kẹ gbin koroma so ḅẹ ḅara? Àrị à kẹ Adima mịẹ ḅara kẹ inetẹ í guluguluma ḅẹm aro?
Anịanịa Zeboyimu na mịẹ ḅara kẹ ị́ na mịẹ?
Ì ḅioḅẹngbọ ḍụkụ tẹ àrị anị mịẹ ḅịa!
À nyana ị́ pịrị ḅẹlẹma kụrọ ḅakam.
9Àrị ị̀ ịganị ḅụ í fomu ḅịa;
à ḅarị jen kẹ Izirẹlị guluguluma ḅịa.
Gbala yẹrị Tamụnọọ, yẹrị tomḅọ-a.
Yẹrị Fịafịa Ḅọ ḅe ị́nịna emi.
Àrị ịganị ḅụ ḅo ị́ la ḅịa.
10“Ị̀ atomi ị̀ ḍukamẹnjị ḅa àrị ọkụkụ kịka tẹ oloku si kẹ ịn tọn apụ pịrịarị sakị. Ini ịrụa-ideriarị-anga sime tẹ sarama ị̀ ḍọkụma-ḅo ḅa. 11Ini Ijiputi ḅụ sime tẹ ḅo ḅa, feni sarasara ḅara, pịkị Asiriya ḅụ, olosịkịya amẹẹ ọkụ. À siin ini ọkị-ḅo ịna sime-ayọ lama ḅa. Yẹrị, KỊNỊNYANAḄỌ ḅe, ọkọ ḅẹẹm.”
KỊNỊNYANAḄỌ ḅe Izirẹlị na Juda Sime si ḅara Ḍuko tẹẹ
12KỊNỊNYANAḄỌ ḅe ḅẹẹarị, “Izirẹlịapụ ma iruo-iruo-iruo na oḅori-kẹ-kịnịsịn na kẹ ì gbori-ikelema tẹẹ, tẹ Juda ḅẹ apụ ma paa kọngọ-kụrọma ị̀ pịrịarị, yẹrị sịrẹrẹ na-iḅi pịkị Fịafịa Tamụnọ ḅe.”
Currently Selected:
Hosiya 11: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria