Ịzẹhwanaya 3

Anijerusarẹmị ệ mẹ̀ ebira odivi ama Ohomorihi ộ dọ wa ha.

1Ịrẹyị o tù Ijerusarẹmị ẹngụ agụvị ka ẹkụra ọnọọ o si du. Aza ana ra ịzọọ aa mẹ akamawụ, dị ẹ yaa chamayị yị ẹngụ nị. 2Ẹnịnị ẹ yị wụ́ chire Ẹnẹyịmavara. Àa kà a yị wa pooro ẹnịnị ẹ yị dọ. Ẹnịnị ẹ yị sị ayị tụra Ẹnẹyịmavara, di e vee hyakụ si ọgụvọ hụụnị ụvọ anị. 3Ọdọvịdị ẹnịnị vị ana sị mẹẹ anka idu ene ee si ọza ana a sị mẹ ụngwẹ avọọ. Ọhọ̀ha ẹ yị zẹẹ ka à nyị ịsị ẹ vọ tịtẹ vụrụ-vụrụ. Ọmọkarẹyị ẹnịnị vị ana yà anka akatapooro ọnị ụngwẹ aa kụ avọọ. 4Ọnịsẹ ẹnịnị vị oyi ana dụ ẹngụ ẹnịnị kẹnẹ. Ẹnịnị ẹ yị wụra sị ayị tụra. Ohirẹsụ irehi Ohomorihi ẹnịnị vị ana aa sị akamawụ mẹ̀ ịsa enyisi ịnị irehi Ohomorihi. Ẹnịnị ẹ raà sị ọda Ohomorihi siisi ẹtẹ. 5Ẹnẹyịmavara vị ana yị yà pe wa, dị aa mẹ̀ ịsa ana vọrọ nị. Eyinị-eyinị Ẹnẹyịmavara aa sị ịzẹyịza anị zụ̀ wa, ama aza edivi ene hi ịzọọ vị ana yịị mẹ̀ ebira odivi ẹnịnị, dị ụhị ẹ yị nyị wa. 6Ẹnẹyịmavara kà ọnị ọ raà wụ̀ avaba anẹkụra nịnị ha, dị ọnị chaka ọvọ ẹnịnị, dị ẹkụra ẹnẹẹ tu osusu, dị ubooro ẹnịnị jị ọngwa nị. Ẹ yị nyị ọza ana vọ ẹtẹ tụ́ ịzọọ. 7Ẹnẹyịmavara kà ọnị ô ro kà ịrẹyị ene tù wa aanị vaa zụ wa ịrẹyọyẹ, dị ẹ nyị angwahi anị, dị ẹ wụ́ ịrẹyị ọnị ọnị ọ ka yị wa. Ama dị ahịka ẹnịnị aa da ụvọ tụ ịnị ụvọ ịnị ebira odivi huna avọọ nị.

Ụya ọnịrị ọyịro ịnẹ Anẹkụra Nịnị

8Dị Ẹnẹyịmavara kà ee nee zi ẹkụhị ọnị ọnị vaa kwẹẹtẹ tù wa. Ọ kà, ọnị vaa kú avaba ẹkụra ọnịrị ịjọva ẹkụra irenyi-irenyi gụ dị ọnị ọ kụ́ ayị hi wa. Dị avaba ẹtẹ rị ịra agụvị ka ayị anị aa dà ọva. 9Ịhị ọnọọ, Ẹnẹyịmavara kà ọnị vaa vara aza, dị ẹ kụkụ a hẹkẹ ọnị, dị ẹnịnị ẹ yị kụkụ mẹ̀ ori. Dị ẹnịnị kụkụ aa wụ́ chire ọnị Ẹnẹyịmavara. 10Hụrẹ ẹtẹ Etiyopiya, aha ẹnẹẹnẹ, aza Ẹnẹyịmavara ana gara hi ozi vaa sị ịsa ịsọvọ vaa yọ. 11Dị Ẹnẹyịmavara kà, ịnị ụmẹ ọnọọ, ụhị ọ yị kụkụ vaa nyị aza anị ana vịdị mẹ̀ akamawụ hi ọnị. Ọ kà ọnị va kụ́ aza ana aa sị ẹngụ tụ́ ẹba kwooze, dị aza ẹ yị kụkụ vaa mẹ̀ akamawụ hi ọnị ịnị ataba ọnịnị anị. 12Dị Ẹnẹyịmavara kà ọnị vaa navọ aza ana ka ẹngụ ẹnịnị chi di e zwe va rị ọnị ka ẹ̀ ra ịzọọ. 13#Ẹtẹ 14.5Ẹnị ana ha ịnị Anisirẹrị ẹ yị kụkụ vaa mẹ̄ ebira odivi, ẹ yị rẹ kụkụ vee chechee, ẹ yị kụkụ vee vene ọza. Dị Ẹnẹyịmavara ee sere wa, dị angwa o yi hi wa, dị ọ mẹ ka ò zee yị wa.

Ahẹ ayohine

14Ẹwụnị Anisirẹrị waa jẹ, dị waa jị ahẹ, dị waa ka bobooro! Wee nyii, waa mẹrẹ sadaa ẹwụnị Anijerusarẹmị. 15Ẹnẹyịmavara ọ raà za ụya awụ nịnị jẹẹ. Ộ sị ọnịvị awụ nịnị dụ kwooze. Ẹnẹyịmavara ana vị ohinọyị Anisirẹrị jẹ wụ nịnị ịrẹma. Ẹ yị nyị ka we kuku hí angwa nịnị. 16Ụmẹ aa vẹ ọnị a vaa kà yị Anijerusarẹmị ka asị ẹnịnị rẹ hụrẹ ayịnẹ, dị asị ẹ va ẹngụ hii. 17Ẹnẹyịmavara ana vị Ohomorihi awụ nịnị yà pe wụ. Ụkata anị aa sị wụ nịnị nyị ehuna ọnịvị awụ nịnị nị. Agụvị ka o sì ịrẹyị ẹnịnị, ọ vaa sị ayị awụ nịnị nẹtẹ, O vee hine ayị tu wu nịnị, dị aa jị ahẹ ịnohine. 18Ẹnẹyịmavara kà, ụya awụ nịnị ọ ta. Ụhị ọ yị kụkụ vaa nyị wụ. Ayị awụ nịnị vee hine anka ọza o rere aa rị eche avọọ. 19Ẹnẹyịmavara kà ụmẹ aa vẹ ọnị ọnị vaa sị ụya rị aza ana chamayị yị wụ. Ọnị vaa dọ ọkụmị nịnị ha, dị ọnị kụ́ aza ana a za ọrịhị nọ ẹkụra ọsa vavẹ eehi. Ọnị vaa vara ụhị ẹnịnị ka ọ vị ịsa ụbanyị yị wa. Avaba anẹhẹ vaa ga wa. 20Ẹnẹyịmavara kà, ụmẹ aa vẹ ọnị ọnị vaa kụ́ aza ana gara hi ẹhẹ vavẹ eehi ẹnịnị. Ọnị vaa mẹ̀ ka ẹ ngụrẹyị ịnị avaba ẹhẹ Ẹnẹyịmavara kà ọnị vaa mẹ̀ ka ọ varẹma zee yị avaba ẹnịnị.

Currently Selected:

Ịzẹhwanaya 3: EBTP

Highlight

Copy

Compare