Ịzẹhwanaya 2

Aa hị́ wa ka e ro ịnẹ

1Dị Ẹnẹyịmavara kà, ẹnịnị anẹkụra ọnị ụhị ẹ yị mā nyị aanị, ẹ́ẹ́ kụ ẹngụ gụ di ee ro ịnẹ varẹma? 2Ẹ yị jẹẹ dị eyi ọ nị hi wa ụvọ, dị Ẹnẹyịmavara ọ va eyi ịrazị ka wa. Ọ́ vaa dụ wa tụ ẹhẹ anka ahị mẹ kụ azịzẹ avọọ. 3Ama aza ana nyị angwahi Ẹnẹyịmavara ene hi ịzọọ, èe ro ịnẹ, dị ẹ saasa ọda anị nị, ẹyịyara Ẹnẹyịmavara vaa vayị ẹnịnị dị ọ dọ wa ha hụụnị ọyịkụ anị.

Ụya o tu Anẹkụra ana kara Isirẹrị nịnị ẹngụ

4 # Ayị 14.29-31; Ijer 47.1-7; Ezk 25.15-17; Ijow 3.4-8; Emọ 1.6-8; Iza 9.5-7 Ẹkụra Igaza ọnịrị Asikeroni vị ana vaa tụ osusu, dị ẹ jị eburu. Ọọdụ-ọọdụ a vaa dụ Anẹkụra Asidodi hụrẹ ẹkụra ẹnịnị nị. Aza ene hi Ekironi vị ana a rẹ vaa dụ hụrẹ ẹkụra ẹnịnị. 5Ịrẹyị ô tù Anihwirisiti nịnị ana ra ụtọ enyi ẹngụ. Ẹnẹyịmavara kà ọnị ọ raà va eyi ịrazị ka Anikereti nịnị. Avaba Anihwirisiti ana ra Ịkanaanị vị ọnị vee vu ẹtẹ, dị ẹ yị nyị ọza anaa ha ịnị ẹnịnị. 6Ẹtẹ ẹnịnị ene hi ụtọ irehu vị ana vaa tụ́ osusu, dị ahịka avị ọnịrị aha enyi ịsụpa ne beri ịga ịsụpa nịnị kẹnẹ e hi ịzọọ nị. 7Ẹnẹyịmavara kà ọnị vaa sị ịzọọ yị Anijuda nịnị ana vọ ka ẹ ra ịzọọ, dị ẹẹ kụ ịsụpa ẹnịnịị̄ rị ịzọọ, dị ẹẹ sụ ịnị irehi Anasikeroni nịnị, Ẹnẹyịmavara ana vị Ohomorihi ka ọnị vaa tẹsị ẹnịnị, dị ọ varẹma ze yị wa. 8#Ayị 15.1—16.14; 25.10-12; Ijer 48.1-47; Ezk 25.8-11; Emọ 1.13-15; Ijer 49.1-6; Ezk 21.28-32; 25.1-7; Emọ 1.13-15Ẹnẹyịmavara kà ọnị ô wụ avaba ụhụ ọnịrị isiya ọnị Animowabi ọnịrị Anamọnị aa mẹ̀ aza anị. Ẹ hyakụ ee wo oto ka ẹnị a dọ Anisirẹrị ẹtẹ. 9#Oyn 19.24Dị Ẹnẹyịmavara kà ọnị ana vị Ohomorihi Anisirẹrị ọ̀ọ yà ịzọọ, Animowabi ọnịrị Anamọnị vị ene vee vú ẹtẹ anka Isodọmị ọnịrị Igomora avọọ. Dị ẹtẹ ẹnịnị hí yị avị ikeyi-ikeyi, dị ọ jị ụsị anọ hi ẹtẹ, di o du ha tịtẹ. Dị aza Ẹnẹyịmavara ana vọ dọ ẹtẹ ọnọọ, dị ẹ sị mẹ ẹẹnịnị. 10Ẹnẹyịmavara vaa vavọọ mẹ̀ ẹ yị wa agụvị ka ẹnịnị aa sị ẹngụ tụ ẹba, dị ẹ rẹ ya kụ̀ aza anị ụhụ nị. 11Ẹnẹyịmavara vee chire wa angwa ẹtẹẹtẹrẹ. Di o du ori ene hi ịnị ẹtẹ ọnọọ ha. Ịjọnọọ dị anẹkụra ọzọza aa hẹkẹ Ẹnẹyịmavara ịzị ẹ̀ẹ ya. 12#Ayị 18.1-7Ẹnẹyịmavara va wụ Anetiyopiya nịnị ha. 13#Ayị 10.5-34; 14.24-27; Ịna 1.1—3.19Dị ọ rẹ tana ụvọ za Anasiriya nịnị. Dị ọ jị Ininivẹ, ohyẹtẹ ẹkụra Anasiriya eburu, dị ọ vara a ụnọmị osusu, kẹnẹ. 14Dị ịsụpa ọnịrị uye ịnị avị ne beri inomi irenyi-irenyi vaa ra hi ịzọọ. Dị ògùgù nịnị ku ịrẹsụ ozokete ee na owu. Avọọ ahaka ẹnịnị mẹ vee hi ẹbanoze eburu ee na owu nị. Avaba ukere oze anị ana a sị ọchị ọkatarihi mẹ̀ vị ana vaa hụrẹ và hí ẹtẹ. 15Ininivẹ ịjọnọọ wáá yị? Ẹkụra ana vịdị maanị nyị ụbanyị yịị? Dị aza anị ee wo oto ka ẹnị ẹ sị ha. Ẹkụra ọnọọ ọ va sị vara eburu ịzị uye ịnị avị nịnị kụkụ ra hi aanị nị! Aza ana aa para ịzọọ hu vi ene ee nohi, di e yee ziizi ịrẹsụ kẹnẹ.

Currently Selected:

Ịzẹhwanaya 2: EBTP

Highlight

Copy

Compare