Ịzakaraya 4

Etore Ọhụhị: Ọchị Ozotupa Igooru ọnịrị ọchị orivi ẹẹva

1Ịzakaraya kà a anggẹẹrị enee pe ọnị ka ịrẹyị aanị ộ ha ọnị kwẹẹtẹ anka ọza òo rere aa sụ ara dị a ha a avọọ. 2Dị ọ họ̀ ọnị ka sị ọnị ee re aanị? Dị ọnị tụ ọ ohi ka ọnị ee re ọchị ozotupa igooru ọnịrị ẹnya angwẹ ana ya ịrẹsụ anị beri ozi ịrakotupa ịhịmba ene hi ịrẹsụ anị ịzị ịra aa za hụrẹ. 3#Ẹtẹ 11.4A rẹ nyị ọchị orivi ẹẹva ana jẹẹ gụrị ọchị ozotupa ọnọọ. Ọnya ya eyi ụvọrị, dị ọsa ya eyi ụvọha anị nị. 4Ịzakaraya ộ họ̀ anggẹẹrị ọnọọ ka, “sị ịsa ẹnịnị jẹẹ yị, Ananyị mị?” 5Dị anggẹẹrị tụ́ ọ ohi ka aanịka ọ yị yẹ? Dị ọ kà, “e yi yee Ananyị mị.” 6Enube ọnị Ẹnẹyịmavara tụ́ anggẹẹrị hi Izerubabẹrị yị: Ẹnẹyịmavara Ochẹtẹẹngụ kà, ẹ yị vị ụkata isoja anị, a vị ụkata ọnị ụvọta ọ vaa sị nyị ẹbẹẹba ọnịvị anị. Ẹnẹyịmavara ọ vaa sị ụkata anị mẹ̀ ẹ yọ nị. 7Akanya ọ̀ọ daka ya anka ataba, eyi Izerubabẹrị aa ta hi eteesu nị. Ọnị aa da irehi Ohomorihi nị. Ọ̀ọ maanị aa sị ịrẹta ọdịrẹma tụra a kẹnẹ, dị avaba aza aa kà booro-booro ka irehi ọnọọ o zoza. 8Ịrẹyị ọsa ọnị Ẹnẹyịmavara kà yị Ịzakaraya yị. 9Ọ kà Izerubabẹrị ana sị ụvọ anị ka irehi Ohomorihi ẹtẹ, ọ rẹ vaa za a ẹtẹ nị. Ịjị aza ẹẹ vavọọ re e, ẹ vaa yẹ ka Ẹnẹyịmavara Ochẹtẹẹngụ ọ tụ́ ọ ụtụ hi ẹnịnị nị. 10#Ẹzị 5.2#Ẹtẹ 5.6Aza ana si eyi wụ̀ ịsị e nyima kiiki vaa jẹ ịjị ee re ka Izerubabẹrị aa da irehi ọnọọ na tụ́ ọvịdị. Anggẹẹrị kà ịhịmba ọnọọ vị eyi Ẹnẹyịmavara ene re avaba ịsa ene hi ini ẹhẹ. 11#Ẹtẹ 11.4Ịzakaraya ộ họ̀ anggẹẹrị ka, sị ọchị orivi ẹẹva ọnị ọnyọọnya jẹẹ eyi ẹnyị eyi ọsa ọchị ozotupa aanị jẹẹ yị? 12Sị ẹ rẹ vị iruvo avọ́ ọchị orivi ẹẹva ana gụrị ọhọ̀mị igooru ẹẹva ana ka angwẹ igooru hi ẹtẹ aanị? 13Dị anggẹẹrị va ohi yọ ka aanịka ọ yị yẹ iruvo anị? Dị Ịzakaraya kà, Nda, e yi yee nị. 14Dị anggẹẹrị kà, aza ẹnị ẹ ẹẹva ọnị Ohomorihi nyị ka ẹẹ hẹkẹ ọnị ana nyị avaba ẹhẹ nị.

Currently Selected:

Ịzakaraya 4: EBTP

Highlight

Copy

Compare