Ịzakaraya 3

Etore Ọhụna: Ijosuwa ọnịrị echu

1 # Ẹzị 5.2; Ẹtẹ 12.10 Ịnị etore ọsa ọnị Ẹnẹyịmavara sị zụ Ịzakaraya, ô re Ijosuwa ohirẹsụ irehi Ohomorihi ka ọ jẹẹ ọvịdị anggẹẹrị Ẹnẹyịmavara, di echu jẹẹ eyi ụvọrị anị ka ọnị o du ọ nị. 2#Ijudi 1.9Dị anggẹẹrị Ẹnẹyịmavara kà yị echu ka Ẹnẹyịmavara ọ mẹ̀ ọkarẹyị yọ nị. Ẹnẹyịmavara ene sì ịrẹyị Ijerusarẹmị ọ jị ịvị yọ. Ọnọrụ ọnọnị sị mẹ anka ọchị ana tụ̀ hụụnị ịra avọọ nị. 3Ịnị ụmẹ ọnọọ Ijosuwa vị ene chire awuru ana dọtị jẹẹ ọvịdị anggẹẹrị ọnọnị. 4Dị anggẹẹrị kà yị aza ana jẹẹ ọvịdị anị ka ẹ ngwa awuru ịvị ẹnẹẹ hụrẹ ẹ ẹngụ. 5Dị Ịzakaraya kà a jị ọ ubobo ana nị tụ́ ọ ịrẹsụ, avọọ dị ẹ jị ọ ubobo ana nị, di e chire awuru eyi anggẹẹrị Ẹnẹyịmavara ana jẹẹ pe wa ịzọọ nị. 6Anggẹẹrị Ẹnẹyịmavara ộ kà yị Ijosuwa ka, 7Ịsị ọnị Ẹnẹyịmavara Ochẹtẹẹngụ kà yị, Ọ kà Ijosuwa ọ̀ọ zị ụsẹ ịnị avaba oze anị, dị ọ mẹ̀ ịsa ọnị ọnị sì nị, ọ vaa mẹ ịjọva tụra irehi anị ịrẹsụ, dị ọ vị ọga tụra avaba ohweje ene hi ini irehi anị nị. Ọnị vaa sị ọ tụ́ udi ịnị akakana aza ene hi ịzọọ. 8#Ijer 23.5; 33.15; Iza 6.12Ọ kà Ijosuwa ana vị ohirẹsụ ọbanyị irehi Ohomorihi ohirẹsụ ọnịrị ohirẹsụ irehi Ohomorihi nịnị ana vọ ẹ batọ. Ọ kà ẹnịnị ẹ vị apojuwe ẹhẹ ozoza anaa vẹ ịrẹma nị. 9Re, a reè tenyi ịrẹta tụ ọvịdị Ijosuwa. Ịrẹta ọnọọ ọ nyị eyi ịhịmba. Ẹnẹyịmavara Ochẹtẹẹngụ kà ọnị va chẹrẹ ịsa tụ́ ọ. Ịnị ẹkụhị ọnya ọnị vaa nyee ịvị ẹtẹ ọnọnị kwooze. 10#Imi 4.4Ịhị ọnọọ Ẹnẹyịmavara kà ọzọza vaa hị́ ọnọhụva anị ka ọ yaayịtẹ uruvo ọchị ịvayịnị ọnịrị ihwigi.

Currently Selected:

Ịzakaraya 3: EBTP

Highlight

Copy

Compare