Ịzakaraya 14

Ijerusarẹmị ọnịrị ẹkụra ana vọ

1Ẹkụhị ọnị Ẹnẹyịmavara vaa sị mẹ̀ ọkarẹyị aa gụrị ẹtẹ. Ịhị ọnọọ dị anẹkụra ọsa vaa kụ́ ogu Ijerusarẹmị, dị ẹ ga hi ẹngụ ụvọ eyi ẹnịnị. 2Ẹnẹyịmavara vaa kụ́ anẹkụra ana vọ vabẹ, dị ẹ gẹ ịrẹkụ tu Ijerusarẹmị. Dị ẹ rị ẹkụra ọnọọ, dị kụ́ avaba ogu ẹnịnị, dị ẹ sị ụkata-ụkata pe ese ẹnịnị sụ̀. Achẹva aza ene hi Ijerusarẹmị vị ana vaa za ọrịhị na ẹkụra ọsa, dị a navọ ẹnị ana vọ hi ịzọọ. 3Ẹnẹyịmavara vaa va eyi ịrẹkụ ka avaba anẹkụra ẹnẹẹ anka ộ vịdị mẹ̀ ẹ avọọ. 4Ịnị ụmọ ọnọọ Ẹnẹyịmavara vaa jẹẹ ịrẹsụ Ataba orivi, eyi ịzị ọyịị̄ zị hụrẹ vẹ Ijerusarẹmị, ịjọnọọ upoporo vaa ga ataba orivi hi oze ẹẹva. Achẹva anị va ya eyi ẹbẹẹba, dị ọsa ya eyi ụvẹtẹ. 5Anijerusarẹmị nịnị vee zwe zị oze ịnị upoporo ataba ẹyịva ẹnẹẹ. Upoporo anị ộ gọdọ na ngụ Azeeri. Ẹnịnị vee zwe anka ụmẹ ọnị ẹtẹ sị ziizi ịnị ụmẹ Uziya ohinọyị Ijuda. Ẹnẹyịmavara vaa vẹ, dị avaba anggẹẹrị ọnịnị saasa a vẹ. 6Ẹkụhị ịhị ọnọọ ẹ yị vaa nyị ọyị, ahị ẹ yị vaa za, ẹ yị nyị etohozi. 7Ẹkụhị irenyi ọ vaa vị nị, ẹ yị nyị ọọdụ, nyị ịrahụ ẹtẹ vi ene ve hweyi pooro kẹnẹ, Ẹnẹyịmavara ọ yẹ ẹkụhị ọnọọ nị. 8#Ezk 47.1; Ịjọ 7.38; Ẹtẹ 22.1Ịhị ọnọọ ẹnyị vee si hụrẹ Ijerusarẹmị, dị achẹva anị aa nọ Irehu Anọ, dị ọsa aa nọ Irehu Imeditareniya Avọọ o me vee si ịnị ị̀rẹ̀sụ̀ ọnịrị ọhahị pooro nị. 9Ụmẹ ọnọọ Ẹnẹyịmavara ọ vaa vị ohinọyị tụ́ ịrẹsụ avaba ẹhẹ nị. Ọzọza vaa hẹkẹ ẹ anka Ohomorihi, dị ẹ vavọọ yẹ ịrẹha anị. 10Avaba aha vaa vara inozi hụrị Ịgẹba na ngụ Irimoni, ụvẹtẹ Ijerusarẹmị. Ẹ vaa ya anka ẹtẹ Araba avọọ nị. Ama Ijerusarẹmị vaa kụ́ nọ udi anị hụrị oze ọbanyị Ịbẹnjamịnị na ngụ oze ọbanyị Ịpaapa, na ngụ oze ọbanyị ịnị Ịkọna. Hụrị ịnị irehi ọgọdọ Ịhananẹrị na ngụ ịnị ụkọ ohinọyị. 11#Ẹtẹ 22.3Aza vaa ra Ijerusarẹmị dị ẹ nyị ọyị sị ayị tụra ka ọza yị vana kụkụ du ọ ha. 12Aanị Ẹnẹyịmavara mẹ ka ọnị vaa kụ ụkụ tù avaba anẹkụra ana gẹ ịrẹkụ tu Ijerusarẹmị nị. Ẹnịnị e yi yee su dị ụpẹngụ ẹnịnị ẹẹ vụ, dị eyi ẹnịnị vụ hi wa eyirẹsụ, dị ịrarẹ ẹnịnị vụ hị́ wa irenu. 13Ịhị ọnọọ Ẹnẹyịmavara vaa va wa zi, dị angwa hi wa, dị ọzọza va ịraazị ka ọnọhụva anị. 14Anijuda nịnị vaa kụ ịrẹkụ dị ọ sị dọ Ijerusarẹmị ha; ẹ vaa kụ́ ogu avaba ẹkụra ana kara wa. Ẹ vaa kụ́ igooru, Isiriva ne beri ịta ẹnịnị ana rụrụ ẹtẹẹtẹrẹ. 15Ẹngụ ụkụ odivi ọnọnị vaa za Umaata ọnẹẹ ọnịrị araka, ịkẹrịkẹtẹ ne beri avaba uye ọnịvị ẹnịnị. 16#Ire 23.39-43Aza ana ha ịnị avaba anẹkụra ana gẹ ịrẹkụ tụ́ Ijerusarẹmị vaa sị ịrayị na hẹkẹ Ohinọyị, Ẹnẹyịmavara Ochẹtẹẹngụ, dị ẹ rị eche ajẹngụ. 17Àa nyị aza ịrẹsụ ẹtẹ ẹnẹ ẹ yị na hẹkẹ Ohinọyị, Ẹnẹyịmavara Ochẹtẹẹngụ, orihi ẹ yị vaa zụ́ yị wa. 18Anigipiti nini ẹ̀ẹ ka ẹnị ẹ yị nọ Ijerusarẹmị na bẹ tụ ọ, orihi ẹ yị vaa zụ́ yị wa. 19Ọsọnị ọ vaa vị ụya ọnị Ohomorihi vaa sị rị Anigipiti nịnị ọnịrị anẹkụra nịnị ana vọ ene yi ka ẹnị yị nọ Ijerusarẹmị na rị eche ajẹngụ. 20Ẹkụhị ịhị ọnọọ, a vaa chẹrẹ ịsa tụ ịnị ikono ana a sị jẹ umaata ka ọnịnị yị Ẹnẹyịmavara. Avaba ụnọkọ ana a sị mẹ̀ ịsa ini eehi Ẹnẹyịmavara vaa vị ọtirenyi anka ẹnya ana ya ọvịdị ụta avọọ. 21Avaba ụnọkọ ana ya Ijerusarẹmị ọnịrị Ijuda vaa vị Ẹnẹyịmavara Ochẹtẹẹngụ. Avaba aza ana vẹ va mẹ̀ ịsọvọ vaa sị ẹnyị ịnị ụnọkọ ẹnẹẹ mẹ̀ ịsa ẹnịnị. Ịnị ẹkụhị ịhị ọnọọ ẹ yị vaa nyị Anikenaani ini eehi Ẹnẹyịmavara Ochẹtẹẹngụ.

Currently Selected:

Ịzakaraya 14: EBTP

Highlight

Copy

Compare