Ahẹ Isoromọnị 7
7
Isoromọnị ô gono ose anị
1Tee! ọnẹẹ ọnọnị, wee zoza o.
Ahụ awụ vavọọ tịtẹ ọyịza-ọyịza ịnị adava kẹnẹ.
Usi awụ tịtẹ mọrọmọrọ kẹnẹ.
Ọza ana a mẹ̀ ẹ ô ye eyi ụkọrọ ẹtẹẹrẹ o.
2Ịrajẹ awụ tịtẹ yooro ịpa ene eche ẹ̀ yị ma ta hụụnị anị avọọ.
Ịrẹka awụ vị ana sị mẹẹ anka ihwiiti ọdụ ọnya
ana á kụ ododo ọyịza-ọyịza kara avọọ.
3Ịrẹva awụ vị ana sị mẹẹ anka ozi adẹgụnẹva ùnè avọọ.
Mị ka vị ẹ́ sị mẹẹ anka ùnè oweyi ẹẹva avọọ nị.
4Ọrọkọ awụ vị ana jẹẹ gaa ọyịza-ọyịza anka irehi ọgọdọ avọọ.
Eyi awụ aa zá teere anka enyi ini imisi ẹkụra ana aā hị́ Ịhẹsịbọnị ọnị ọyị và ọpa tụra avọọ.
Imisi ẹnẹẹ vị ana gụrị oze ọbanyị ẹkụra ọnọọ.
Aahị awụ ô zoza pooro anka irehi ọgọdọ ana ya Ịrẹbanọnị
ana va ẹkụra ana aā hị́ Ịdamasịkọsị chire.
5Ịrẹsụ awụ vị ọnị ụ kụ̀rà jẹẹ gaa anka ataba Ịkamẹẹrị avọọ.
Ẹyị ọnị u gú tụụ ịrẹsụ aa zá kẹnẹ.
Ịzị ó zoza na za, ohinọyị òo ré e, vị ee hí ayị ẹngụ anị nị.
6Tee! Wee zoza o. Ụ tịtẹ ọyịza-ọyịza kẹnẹ.
Oyisì ọnị ụ sì ịrẹyị amị vị anaa sị́ ayị amịị hine pooro kẹnẹ.
7Waa vá ọza anka ọsọchị avọọ.
Ịrẹva awụ tịtẹ hyọrọ-hyọrọ anka asaka asẹ enee ví ịrẹsụ ọsọchị avọọ.
8Maà hịrẹ ọsọchị ọnọnị
dị ma na hụ̀ asẹ anị.
Mèee ré ịrẹva awụ vị ẹ́ sị mẹẹ anka avụsụ ẹtụtụ ọchị igirepi avọọ nị.
Wàa tụ́ ụhwẹ dị ọ dagụ anka ẹtụtụ ana aā hị́ apụrụ avọọ.
9U me ku mị irenu, irenu awụ ô hine huni eyi eche ozoza.
Ozi ọnẹẹ ọnọọ kà
ana tangwa ee sìi vaa chi ini irenu ọza ọnị sì aanị.
Di ee sìi vaa tụra onupa ọnịrị anyị anị nị.
10Ẹwụ ọnị mị sì ịrẹyị anị, awụ mị vị̀ nị, di eyi amị ọnị raa tụra wụ nị.
11Waa vẹ de, ẹwụ ọnị mị maanị sì ịrẹyị anị, jẹẹ ya hụụnị ẹkụra
dị ya na sụ̀ ịnị avị.
12Vẹ ye jintu kwẹẹtẹ ẹnẹnẹ, di ya nọ ịzị ịvayịnị hi,
dị ye ne ré èe si nyima ee nyị avị ọwọọwa.
Vẹ ye ne ré ọchị ipomagiranati ọnịrị ọchị ana vọ àaa tụ̀ ododo.
Ịzọọ mị vaa sị zụ wụ mmẹmẹ sì ịrẹyị awụ nị.
13Avị ododo ana aā hí ịmanadireki aa dagụ.
Ma raa kụ ẹtụtụ ọchị ozozoza hi ẹtẹ enoze
yị ẹwụ ọnị mị maanị sì ịrẹyị anị,
ọkụkụ ọnịrị ọwọọwa.
Currently Selected:
Ahẹ Isoromọnị 7: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
