Ahẹ Isoromọnị 6
6
Anẹẹ Anijerusarẹmị
1Ọnyẹnẹẹ ene huu ịnị anyẹnẹẹ,
ịzị ọza ọnị ụ maanị sì ịrẹyị anị zị kẹ?
Kàa yị oze ọnị ọ́ zị,
di ye ne pe wu sì ọ.
Ozi ọnẹẹ ọnọọ kà
2Ọza ọnị mị maanị sì ịrẹyị anị ọ zị nọ ịnị ụbazị anị
ịzị a kụ avị ịsẹpẹ hi.
Aa kụ ịsụpa anịị rị ịzọọ,
dị aa kụ ododo ọyịza-ọyịza gụ nị.
3Ọza ọnị mị maanị sì ịrẹyị anị vị aa mị, dị ẹmị rẹ vị aanị nị.
Aa kụ ịsụpa anịị rị ịzị ododo ọyịza-ọyịza hi.
Ahẹ ọhụhị
Ozi Ọnọrụ ọnọọ kà
4Ẹwụ ọnẹẹ ọnị mị sì ịrẹyị anị, wee zoza anka Ijerusarẹmị
ọnịrị ẹkụra ana aā hị́ Itiriza;
Wàa va ọza anka ọkọnị isoja ana sị asịyẹ ẹnịnị rị ụvọ di e yee hu ahụ ẹbẹẹbẹ avọọ.
5Jesi eyi awụ hụrẹ mị ẹngụ,
ka waa si eyii za mịị rị.
Ẹyịrẹsụ awụ ee henyi tụra awụ ịrẹma anka ọkọnị ẹvụ
enee chí otutu Anigiriyadi avọọ.
6Anyị awụ aa vwẹtẹ anka ọkọnị atẹmẹ
ana á na hụ enyi.
Ẹ yị nyị ikonyara ene vu hụụnị anị;
avaba ẹnịnị vị ana gụ chịmị-chịmị.
7Dị ụ daka yị và ịta ku ịrẹsụ,
abamị awụ vị anaa yịị za yóo aanị
8Ohinọyị ọ̀ọ daka nyị anẹẹ ẹbẹẹta, beri onyeehi ẹbẹẹna,
dị ọ nyị ozwoorihi ọnị ọza ẹ̀ yị zụ za ịrịka nị,
9ẹwụ ịnya kẹnẹ mị sì ịrẹyị anị nị.
Ọnọọ ô zoza anka arivadi.
Ọnị ọ vị ozi ọnẹẹ ikonya ọnị ọnyị anị ma nị.
Ọnị ọnyị anị sì ịrẹyị anị hụ ịnị avaba ezi anị nị.
Avaba anyẹnẹẹ ê ré e, di eyee gono o nị.
Ese ohinọyị ọnịrị onyeehi anị nịnị vị anaa jị ahẹ gono o.
10Ẹnẹ vị ọnọnị anaa za hwẹẹhwẹ anka etumeyọnị avọọ aanị?
Ó me zoza, avọọ ọ́ mẹ vwẹtẹ nị.
Aa zẹtẹ anka ọyị à vị ụhwẹ avọọ.
Óo zoza anka ọkọnị ụzọmị ene hi ẹbẹẹba.
11Mâ nọ ịzị e chire ọchị arimọndị hi
ka me ne ré ọchị ene hi inozi,
ọchị ịvayịnị èe si nyima aa nyị avị ọwọọwa,
ọnịrị ọchị ipomagiranati èe sị nyima aa tụ̀ ododo.
12Ẹngụ amị aa dá ẹgahị; wa raà mẹ ka ẹngụ amị ọọ sị́ ka ẹmịrị ẹwụ ọọ mẹrị ẹngụ
anka ẹngụ ọza anaa si umoto ịrẹkụụ zị mẹẹ sị́ ka aa nọ ịrẹkụ avọọ.
Ezi Anẹẹ Anijerusarẹmị
13Ẹwụ ozi ọnẹẹ Anisurami ọnọnị, waa nyẹzẹ waa nyẹzẹ
di yee ré wu.
Ozi Ọnọrụ ọnọọ kà
Sị ẹ vẹ dị wee sì ka maa nyẹzẹ ịnị akakana aza ana tara jẹẹ ee ré ẹtẹ,
di wee ré mi nịnị?
Currently Selected:
Ahẹ Isoromọnị 6: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
