Ahẹ Ụgama 65
65
Ahẹ ana a sị kụ́ Ohomorihi avọ
(Ahẹ Idevidi ana yà ịnị ụvọ ọga ọjahẹ).
1Ohomorihi, ẹwụ aza ene hi tangwa aa kụ́ avọ nọ
Ịsị ị ka yaa sịị vaa wụ̀ vị ọnị yaa sịị vẹ.
2-3Yâ yẹ ka ụụ̄ wụ́ ịpẹ
agụvị avọọ avaba anẹhẹ vaa vẹ vaa dá ịpẹẹ wụ agụvị ịsa odivi ẹnị ẹ mẹ
Ịvị ayị òo si chi yị ẹngụ, ụ vaa vagu yị ịnị anị.
4Aza ọnị ụ sị nyị di u tura wa pè ẹngụ ka ẹ̀ va ra ịda awụ vaa dàa jẹ kẹnẹ
Avaba ịsa ozoza ene hi ini eehi awụ vaa mẹ ka ịnẹ ọ̀ há yị.
5Wâ wụ́ aduwa ayị, dị ụ mẹ ka ye huna ọnịvị ayị nị
Ohomorihi anaā dọ yịị ha, ẹwụ avaba anẹhẹ saka-saka avaba aha sị ayị tụra nị.
6Ụkata awụ ụ sị kụ́ ataba jẹẹ nị
Wâ vavọọ mẹ̀ ẹ ka wa sị zụ̀ ịzị ụ nyị ụkata na za.
7Ịjị òkū aa dà vụụ-vụụ, dị aa jị ayị,
ẹwa mẹ̀ ẹ ka ọ̀ varẹma nẹtẹ hẹẹ nị
Mị ka ịjị anẹhẹ kwẹẹtẹ aa mẹ ezigi
ẹwa varẹma sị wa ayị nẹtẹ nị.
8Avaba anẹhẹ vi ene ee hí angwa ịsa ọnị ụ mẹ
Avaba aza vị ana aa jẹ ịrajẹ di e yee nowu agụvị ụkọrọ ọnị ụmẹ.
9We yi hi ayị ẹtẹ aza awụ, dị waa zụ̀ orihii tụ́ ọ nị
Wâ mẹ ka ẹtẹ ọnọọ ò zoza dị ọ̀ọ mẹ̀ ịsa ẹtẹẹtẹrẹ.
Ohomorihi, wâ mẹ ka enyi è hi ini okuha awụ
agụvị aza è zụ re enyi kụ́ ịsa tụ́ ịnị aarẹ.
10Ẹtẹ ana a jị ịrịkụ vị ọnị ụ nyayịnẹ zụ̀ orihi hi
Wâ mẹ ka ẹtẹ ọ̀ rẹngụ, dị ịsa ene e chire tụ́ ọ ẹ̀ẹ hụ.
11Wê nyị aza iyi ka ịsa ịnị aarẹ ẹ̀ mẹ ẹtẹẹtẹrẹ
Avaba aha vị ọnị ịsa mẹ gwẹtẹ kẹnẹ.
12Ẹtẹ ana nyị avị ịzị ịsụpaā rị vị ọnị ịsụpa gwẹtẹ hị́
Avị ene hi ịnị ataba vị ana nyayịnẹ hunẹnẹ.
13Ịsụpa vị ana gụ hi ini ozi
avọọ ịsa ịnị aarẹ mẹ̀ rẹ mẹ hi ẹtẹ nị
Avaba ịsavị-ịsavị vị ana nyayịnẹ zoza, dị ẹngụ ẹnịnị hunẹnẹ.
Currently Selected:
Ahẹ Ụgama 65: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
