Ahẹ Ụgama 60
60
Aduwa aza ana ka Ohomorihi ọ̀ dọ ẹnị tụ́
(Ahẹ Idevidi ana a sịị ịsaa zụ̀ ọza. Ahẹ ozoza, ahẹ ivenu ana aā hí Imikitami).
1Ohomorihi, wa sị yị hụrẹ ụvọ, ộ!
Wa raà mẹ ka ịrẹyị odivi ò tù yị
Yâ yẹ ka waa kụ́ ayịị hi yi,
navọ kwogwo wa varẹma za yị gụrị ẹngụ.
2Wâ za ẹtẹ ọnọnị zizi ẹtẹẹtẹrẹ, wa sị ọ gara ha
Ẹnẹyịmavara, navọ wa kụ́ ọ ẹngụ nịya ka wa sị ọ za zizi baaba.
3Wa raà mẹ ka ẹyị aza awụ ọ̀ rị ụya ẹtẹẹtẹrẹ
ị kụkụ aa gọ̀rụ́-gọ́rụụ zị ọ́za ene eche aa mẹrị avọọ nị.
4Aza ene hí angwa awụ vị ọnị ụ kà ọ̀nọ̀ ka ẹnịnị èe zwe ka ịrẹyị ve tù wa.
5Navọ wa sị ụkata awụ gụ yị ụvọ dị wa dọ yị tụ́
Wàa gụ yị ụvọ, aza oni u sì ịrẹyị anị vaa há.
6Ohomorihi vị ana yà aha ọnịnị anị, dị ọ kà ịrẹyị
dị ọ ka ọnị ọ nyị ẹtẹ Ịsẹkẹmị nị
ọnị vaa sị ụkata anị dị ọnị sị gà ẹ yị aza
Ọ kà avọọ ọnị mẹ̀ rẹ vaa gà ini ozi ana aā hí Isukutu nị.
7Ohomorihi rẹ ka ọnị ọ nyị Anigiriyadi, dị ọnị rẹ nyị Ịmanasẹ nị
Ọ kà ẹkụra Ehwireemi vị ana jẹẹ yị ọnị anka amu enyusẹ-enyusẹ avọọ,
di Ijuda jẹẹ yị ụkata anị nị.
8Ohomorihi rẹ ka Imowabi vị ana yà anka ẹnya ọnị ọnị aa nyịna ụvọọ hi
Ọ rẹ ka ọnị o reè ne adava anị na tụ́ Edomi ana sị zụ̀ ka ọnị ọ kụkụ nyị nị
Ọ kà ọnị aa jẹ ẹtẹẹtẹrẹ ka ọnị ọ sị ehuna Ihwirisitiya nyị.
9Ohomorihi, ẹnị ẹ vaa sị mịị nọ ịnị ẹkụra Edomi ana a jị ọvọ kara anị?
10Ohomorihi, navọ dê! u wéé si yi yi tịtẹ saka-saka nị?
Wẹ yị kụkụ saasa isoja ayị nọ ịrẹkụ?
11Navọ wa gụ yị ụvọ dê, dị ya zụ và eyi ka ọnịvị ayị
Wâ yẹ ka ẹ yị nyị ịzị ọgụvọ ọzarẹyịrẹsụ tù.
12Ohomorihi ọ̀ọ mẹ ọgụvọ yị, ẹyị aa nyị ehuna nị
Ọnịvị ayị vị ọnị ọ maanị aa sị ahụụ sisii za ẹtẹ nẹrẹ-nẹrẹ.
Currently Selected:
Ahẹ Ụgama 60: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
