Ahẹ Ụgama 59
59
Ohomorihi navọ wa dọ mị tụ́
(Ahẹ Idevidi ka asị a wụ ọ. Ahẹ Imikitami ọnị ọ jị Ịsọọrụ mẹ̀ ẹ sere irehi anị ka ọnị ọ̀ wụ ọ. Ahẹ ana yà ịnị ụvọ ọga ọjahẹ).
1Ohomorihi, navọ wa dọ mị tụ́ hụụnị ụvọ ọnịvị amị
Aza ana kwẹẹtẹ tù mị aanị, asị ụ zẹẹ ka à nyị ịsị ẹ zụ mẹ mị.
2Navọ wa dọ mị tụ́ hụụnị ụvọ aza edivi ene ee sì ka ẹnị ẹ̀ wụ̀ ọza.
3Ẹnẹyịmavara, ẹ yị nyị ịsị mị mẹ, ộ
Ama wéē re aza edivi ẹnẹnị màa gẹ eyi amị di e yee bè mi.
4Nyị m mẹ̀, ama e yee sii sì ka ẹnị ẹ kwẹẹtẹ tù mị kẹnẹ
Ohomorihi, aarịhịnị navọ we re ẹngụkata ene tù mị, dị wa kwẹẹtẹ wa dọ mị tụ́.
5Ẹnẹyịmavara, ẹwụ Ohomorihi ọgọdọgọdọ ọnị ụvọ ọza è yi mè tù ẹwa vị Ohomorihi Anisirẹrị nị
Navọ wa kwẹẹtẹ dị wa sị ụya rị avaba anẹkụra edivi ene ee sì iruvo ọza.
6Aza edivi ẹnẹẹ ẹ̀ẹ maanị vẹ oruva
dị ẹ yaa hàa ngụ ịnị ẹkụraa zị anka irezi avọọ.
7Wáā wụ́ ị́rẹyị ẹnẹ ẹ yaa kà a hụụnị irenu!
Ẹ yaa kà ịrẹyị ama ẹ ka ọza ọ yị vaa wụ́ ịsị ẹnị aa kà.
8Ẹnẹyịmavara, mê re wa di u nyị wa unyi kẹnẹ nị
Wê re avaba anẹkụra ẹnẹẹ, dị waa sị waa mẹ enyinyi nị.
9Ohomorihi amị, ana maanị sì ịrẹyị amị
ẹwa vị ụkata oni mi che ayị za nọ
Mee zi wu eyi, agụvị ka ewee sere mị ka asị a nyị ịsị ẹ kanyị mị nị.
10Ohomorihi vaa tụ́ ọvịdị amị, ọ vaa mẹ ka ma nyị ẹbẹẹba aza ene ee du mi ịrẹsụ.
11Ohomorihi ohinọyị, navọ asị ụ wụ̀ wa, ka aza amị ve reè hi ayị ịrẹyị ẹnịnị
Navọ wa sị ụkata mẹ wa kà ẹ̀ẹ zi doodo ịnị ẹhẹ, dị wa va wa nẹtẹ.
12Ebira odivi kẹnẹ ẹẹ̄ kà pooro nị
Navọ oto ene e yee woo zị ọ̀ vara ịrẹpa za wa
Ireche ọnịrị ịrẹyị odivi ẹẹ̄ kà nị.
13Navọ wa sị ọyịkụ-ọyịkụ gara wa va ha saka-saka
Wàa vavọọ mẹ wa, avaba anẹhẹ vaa yẹ ka ẹwaa vị ohinọyị Anisirẹrị nị.
14Aza edivi ẹnẹẹ ẹ̀ẹ maanị vẹ oruva
dị ẹ yaa hàa ngụ ịnị ẹkụraa zị anka irezi avọọ.
15Di e yee sì ịsọyịrịị zi woowoo
di e yee nowu ịnẹ ọ̀ọ yị há wa.
16Ama ẹmị vaa jị ahẹ dị maa kà a ụ mẹmẹ nyị ụkata
Ẹnẹnẹ vị ọnị mị vaa jị ahẹ ka ụụ̄ sì ịrẹyị ọza
Ịrẹyị ọ̀ọ vẹ, ịda awụ m mee zwe vaa tẹ nị
Ewee sere mị ka asị a nyị ịsị ẹ mẹ̀ mị nị.
17Ohomorihi ana aa dọ mịị tụ́, mâ kụ́ wụ avọ
Ẹwụ Ohomorihi ene sì ịrẹyị amị, wee sere mị ka asị a nyị ịsị ẹ mẹ̀ mị.
Currently Selected:
Ahẹ Ụgama 59: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
