Ahẹ Ụgama 51
51
Aduwa ọza ene jesi hụụnị ebira odivi anị
(Ahẹ Idevidi ana yà ịnị ụvọ ọga ọjahẹ)
1Ohomorihi, aarịhịnị kwogwo, navọ wa vayị amị
Mâ yẹ ka avọọ u mè sii sì ịrẹyị ọza pooro, dị ụ rẹ vị ayamva nị
Navọ kwogwo we nyee ebira odivi amị ọnọnị kwooze.
2Navọ wa sị ayị hụụnị avaba ebira odivi ọnị mị mẹ
dị wa sị ebira odivi ọnị maa mẹ̀ hụrẹ mị ẹngụ.
3Mâ yẹ ka ụpẹ tụra ụpẹ m maa sịị mẹ̀ ebira odivi nị.
4 #
Iro 3.4
Ohomorihi, ẹwụ nya chọ̀chọ̀chọ̀ kẹnẹ m maanị rị ịvị anị nị
Ẹwụ m maanị mẹ̀ ebira odivi hi nị
Ịrẹyị ọnị ụ kà ọnịrị ọkarẹyị ọnị ụ mẹ vị ana vọrọ.
5A mẹ̀ hụrẹ ma mị, mị hụrẹ vị ọnịvị nị
Ọnyị amị mẹ̀ hụrẹ ee zyẹẹ amị kẹnẹ mị hụrẹ vọ ọnịvị nị.
6Wê sì ka ọza ọ̀ọ kà ịzẹyịza obooro
Navọ kwogwo wa sị ịrẹyọyẹ tụ́ ịnị ayị amịị mị.
7Navọ wa sị avị ana aā hị́ ihisopu dị wa sị nyịna mị
dị ma zụ nị̄ hụụnị ebira odivi amị.
Mị ka navọ wa nyịna mị dị ma nị nịkị-nịkị hụụnị ebira odivi amị.
8Wâ vịdị raà tana ụvọ za mị,
navọ kwogwo wa rẹ vana navọ ka ma zụ jẹ ịrajẹ dị ịnẹ amị ò ree hine.
9Navọ wa si eyi hụụnị ebira odivi ọnị mị mẹ,
dị wa nyịna mị hụụnị avaba ịsa odivi ọnị mị mẹ.
10Ohomorihi, navọ kwogwo wa mẹ ayị amị di ò kukuu ro ịrẹyị ene zoza.
11Navọ asị ụ kà ka waa dụ mịị hụrẹ ịdị awụ
Navọ asị ụ rẹ sị Ụhwẹ Ọnịnị awụ hụụ ịnị ayị samị.
12Navọ ma rẹ varẹma jẹ ka wa sị mị dọ ha,
dị wa gụ mị ụvọ dị ma zụụ wụ́ ịrẹyị chire wu.
13Wàa maanị raà gụ mị ụvọ,
ẹmị rẹ va zụụ sị ịrẹyị awụụ zụ̀ aza ana aa jịnẹ ọda awụ,
dị ọnịvị nịnị aa vàa ká wụụ vẹ.
14Ohomorihi ana dọ mị tụ́, navọ wa vagu mị agụvị ọza ọnị mị wụ
Wàa raà vagu mị, mị vaa jị ahẹ kụ́ wụ ka ọnịzẹyịza ụ vị nị.
15Ẹnẹyịmavara, navọ wa há mi irenu, di maa kụ́ wụ avọ.
16We mē sì ka ọza ọ̀ọ mẹ ịsọvọọ wụ à yị vị avọọ mị yaanị kụ́ ịsọvọ vẹ
We mē sì ka ọza ọ̀ọ mẹ̀ ịsọvọ dị ọ̀ọ rị ọ ịra wụ.
17Ọza ana ayị anị du ka ọnị ọ raà mẹ̀ ebira odivi,
ẹnị ẹ mẹ̀ ịsọvọ oni Ohomorihi sì nị
Ẹnẹyịmavara, ẹngụ ọza ana ayị anị ọ̀ọ vavọọ du,
we yi vee yi waa tịtẹ.
18Navọ kwogwo wa hụ agụvị ụbanyị ẹngụ awụ dị wa mẹ ka ò zee yi Anịzayọnị
Navọ wa tụra ọvọ ana kara Ijerusarẹmị.
19Ịjọnọọ aza vaa mẹ̀ ịsọvọ obooro ene zee wu eyii wụ,
u re vee sì ịsọvọ ana aza aa mẹ dị ẹ rị ọ ịra wụ
Dị aza raa kụ́ imaaru dị ẹ yaa sị vaa mẹ̀ ịsọvọ aha ịsọvọ awụ.
Currently Selected:
Ahẹ Ụgama 51: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
