Ahẹ Ụgama 50
50
Ẹngụ ahẹkẹ oni Ohomorihi sì
(Ahẹ Asahwi)
1Ẹnẹyịmavara ana vị Ohomorihi Ochẹtẹẹngụ aa kà ịrẹyị, dị ọ hị́ avaba anẹhẹ nị.
2Ohomorihi yà, dị ẹtẹ hweyi kara a nị
Ẹkụra ô zoza pooro, ọza o yi re ẹngụ anị.
3Ohomorihi ayị aa vẹ, o yi kuku kú irenu re ẹtẹ kẹnẹ
Ịra vị ana aa za ọvịdị anị, dị ẹtẹ ee henyi jigi-jigii karaa.
4Ohomorihi ộ hị́ ẹbẹẹba ọnịrị ẹtẹ ka ẹ̀ vị onivenu
di è re ọnị màa mẹ̀ ọkarẹyị aza anị.
5Ọ kà à kụ́ aza anị yị ọnị
aza ana raà sị ẹngụ ẹnịnị tụ́ irenyi yị Ohomorihi
Aza ẹnẹẹ vị ẹnị ẹnịrị Ohomorihi kà ịrẹyị tịtẹ
Ịjị ẹ sị ịrẹyị ọnọọ kà, dị ẹ mẹ̀ ịsọvọ anị nị.
6Anihinẹba aa kà a ka Ohomorihi vị ana aā mẹ̀ ịsa ana vọrọ
agụvị ka ọnị ụvọta vị ọmọkarẹyị.
7Ohomorihi ka Ẹwụ nịnị Anisirẹrị aza anị, sị ụtọ pè ẹtẹ nịnị
ka â nyị ịrẹyị awụ oni mi re
Wâ yẹ ka ẹmị Ohomorihi ọ vị Ohomorihi awụ nịnị nị.
8Ọ kà ọnị ọ yị kà ka ọ mẹmẹ ọnị waa mẹ̀ ịsọvọ
dị waa kụ́ ịsa vaa rịra yị ọnị nịnị eyinị-eyinị yị mị nịnị eyinị-eyinị.
9Ọ kà ama ọnị ọ yị kà ka wa sị imaaru hụụnị aarẹ awụ va yị ọnị
Ọ kà ọnị ọ yị rẹ kà ka wa na sị ịdẹ hụụnị ịsụpa awụ vayị ọnị
10Ọnị ọ nyị avaba uye ene hi ịnị iriku nị.
Ọnị ọ rẹ nyị avaba uye ọbanyị ene hi ịnị ataba ana gụrị ẹtẹ nị.
11Ọ kà ọnị ọ yẹ avaba inomi ene hi ịnị ataba
Ọnị ọ nyị avaba uye ịnị avị saka-saka nị.
12Ọ kà àa vị ụngwẹ aa kụ̀ nị, ẹ yị nyị ka ọnị ọ̀ va kà a wụ
agụvị ka ọnị ọ nyị avaba ẹhẹ ọnịrị ịsa ene hi ịnị anị nị.
13Ọ kà ọọnyị da, ọnị mā rị uye, oni o mē re hú uye.
14Ịsọvọ awụ ọ vị ka waa kụ́ Ohomorihi avọ
ịsị wàa kà ka wa mẹẹ yị Ohomorihi ọgọdọgọdọ ọnị ụvọ ọza è yi mè tù di ụ rẹ vavọọ mẹ̀ ẹ yọ.
15Ọ kà waa vavọọ aa mẹ, ịhị wàa nyị ẹngụkata dị ụ hị́ ọnị nị, di e re
Ọ kà vị ọnị aa vaa dọ wụụ tụ́ nị
Ịjọnọọ ụ vaa sị ụbanyịị yị ọnị
16Ohomorihi aa họ̀ aza edivi use
ọ ka sị ẹ vẹ dị ẹ yaa kà ọda anị
dị ẹ yaa kà a bẹẹ ka â nyị ịrẹyị ẹnị ẹnịrị Ohomorihi kà tịtẹ?
17Ohomorihi ka aza ẹnẹẹ ẹ yị zẹẹ ka ẹnị ẹ̀ dọ ịrẹyị anị tụ́ ịzọọ,
dị ẹ yaa sị ụvọọ kụ́ ịrẹyị anịị hi eyi ụvọha. 18Ohomorihi ka wèe re oyi nịnị dị ẹwụrị wa za ọta
Wèe re re ọsẹrẹka, dị ẹwụrị wa aa mẹ uzee.
19Waa kà ịrẹyị odivi, di u ree vene ọza nịnị nị.
20Waa kà ịrẹyị odivi ọyịnyara awụ di wee du ọ ịrẹsụ.
21Ohomorihi ka ụ mẹ̀ vavọọ aa mẹ nịnị, oni o yi tụ́ ohi
di oni ee re wu nịnị kẹnẹ nị
Dị ẹwụ nịnị kuku ree ro o ka ọnyọọnya ẹwụrị ọnị vị nịnị nị
Ohomorihi ka ọnị vaa kà a wụ nịnị eyi gẹrị eyi ka ịsị waa mẹ nịnị, o yi zoza.
22Ohomorihi ka ẹwụ nịnị ene hi ayị anị ọ̀ wụ́ ịrẹyị, ọ!
Ọ kà asị ụ zẹẹ ka ọnị ọ̀ pa ịva wụ nịnị
ka à yị vị avọọ ẹ yị nyị ọza ana va zụụ dọ wụ nịnịị tụ́.
23Ohomorihi rẹ ka Ọza ana aā kụ́ ọnị avọ, ọnị vaa yẹ ka aa mẹ̀ ịsọvọ ana sị ụbanyị yị ọnị nị
Ọza ene èe tenyi ebira anị, ọnị mị vaa dọ ọ há nị.
Currently Selected:
Ahẹ Ụgama 50: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
