Ahẹ Ụgama 35
35
Ohomorihi, navọ wa gụ mị ụvọ
(Ahẹ Idevidi)
1Ẹnẹyịmavara, navọ wa kụ́ ọ tụ̀ aza ana kụ́ ọ tù mị
Aza ene ee pè mii kụ̀ ịrẹkụ aanị, navọ we pè wa kụ̀ ịrẹkụ.
2Navọ wa kwẹẹtẹ dị wa kụ́ ogonto ọnịrị ẹnya ịrẹkụ awụ dị wa vagu mị ụvọ.
3Navọ wa kụ́ ọha ọnịrị ọpa awụ wa và eyi kà aza ana aa dụ mị
Navọ wa kà a ka waa dọ mịị há.
4Navọ wa tẹ aza ene ee sì ka ẹnị ẹ̀ wụ̀ mị, dị ụhị ọ̀ nyị wa
Aza ana aa gẹ eyi amị ka ẹnị è vú mị ẹtẹ aanị,
navọ ahịka ụhị ọ va nyị wa dị ẹ varẹma nị.
5Ẹnẹyịmavara, navọ dị anggẹẹrị awụ ọ̀ọ dụ wa
di ee zwe anka azịzẹ ana ahị aa kụ́ avọọ.
6Navọ wa kụ́ ịrẹyị odivi tù wa, dị ọsịrị ọ̀ọ kụ́ wa,
dị anggẹẹrị awụ ọ̀ọ và ịsaa hi wa ẹngụ dị ẹ̀ẹ hyẹdụụ vàa hi ẹtẹ.
7Nyị m mẹ̀ kà yị wa di e yee bè mi, dị ẹ yaa va ịrẹpaa zi mị kẹnẹ-kẹnẹ.
8Ohomorihi, navọ ịsa odivi ene è yi tụra eyi anị vụrụ-vụrụ ò chi kú wa ịrẹsụ.
Navọ ịrẹpa ẹnẹ ẹ và, ọ̀ vara eyi za wa
Navọ ahịka ẹnị ẹ rẹ hyẹdụ ne ngụ ịnị ụsị ẹnị ẹ chi zi mi
di è vú ẹtẹ tụ́ ịzọọ.
9Ẹnẹyịmavara, wàa vavọọ sị ọ mẹ, dị ụ sị mị dọ ha nị
ụ vaa mẹ ka maa jẹ, dị ịnẹ amị ee hine.
10Dị mị kụkụ aa kà a zị ka ẹ yị ọnya ọza ana vị ẹngụ ẹwụ Ẹnẹyịmavara
Ẹwaā dọ oniruwa hụụnị ụvọ aza ene huna a nị,
dị ụ dọ ọ tụ́ hụụnị ụvọ ọza ana aa mẹ ẹchakaa yọ.
11Aza edivi ệ kwẹẹtẹ e yee cheeche kú mị ẹ yaa họ̀ mị use ịrẹyị ene eyi amị ọ̀ yị hyakụ tù vụrụ-vụrụ.
12Màa mẹ wa ọyịza, dị ẹ sị odivi si mi atọ
e yee sì ka ẹnị ẹ̀ dọ mị ụhwẹ.
13Ama àa vị ẹmịị yọ, ẹngụ àa zị wa,
di mi chire awuru ana sị zụ̀ ka ayị amị vi ene dụ
Dị mẹ yị zẹẹ ka ma rị ịsa, dị mị ká ịrẹsụ hi dị maa mẹ̀ aduwa.
14Aduwa vị ọnị maa mẹẹ yị wa anka èe rere vi ọta amị à vi ọyịnyara amị avọọ
Maa hụ agụvị ẹnịnịị jị òrèrè anka ọza òo rere aa jị òrèrè ọnyị anị avọọ.
15Ẹnị èe ve re ka mị yà ịnị ẹngụkata dị ẹ kụ́ gụ dị ẹ yaa jẹ
Mẹ yị yẹ ịsị mị mẹ wa, dị ẹ kụ́ gụ ka ịrẹyị amị o tù ẹnị nị
di e yee du mi pooro kẹnẹ.
16Aza edivi ẹnẹẹ vị ana aa mẹ mị isiya
dị ẹ nyayịnẹ aa kụ́ ayị amị nị.
17Ananyị yị, we yi tụ́ ohii?
Navọ wa dọ mị tụ́ dị asị ẹ rẹ kụkụ dụ mị.
Navọ asị ụ zẹẹ ka aza ẹnịnị ana sị mẹẹ anka idu avọọ ẹ̀ dọ mị ụhwẹ.
18Wàa sị mị dọ tụ́, dị maa kụ́ wụ avọ aza ẹ̀ẹ maanị sị wara gụ
Mị ka aza ẹ̀ẹ ta wara gụ dị maa kụ́ wụ avọ.
19 #
Ahẹ 69.4; Ịjọ 15.25 Ọnịvị amị ẹnẹẹ vị ana aa kụ́ ayị amị kẹnẹ
Ẹ yị nyị m mẹ̀ mẹ wa vụrụ-vụrụ
Ohomorihi, aarịhịnị kwogwo asị ụ navọ ka ẹ̀ nyị ẹbẹẹba amị
Ẹnịnị ẹ̀ẹ kwẹẹtẹ di e yee kú mị akọnyọ kẹnẹ-kẹnẹ.
20Ẹnịnị ẹ mā sị ẹngwọọrọ kà ịrẹyị
Ẹnịnị vi ene eē cheeche irenyi-irenyi kú ọza ana tangwa sị aanị yaayịtẹ hẹẹ.
21Ẹ̀ẹ sị irenu ẹnịnị há ha, dị ẹ yaa hị́ mba, mba, eyi ayị ọ vị nị.
22Ẹnẹyịmavara, ụ maanị ee re wa ộ, navọ we tụ́ ohi
Nda, aarịhịnị navọ kwogwo wa gụrị mịị.
23Ẹnẹyịmavara ana vị Ohomorihi amị
navọ asị ụ sụ ara, dị wa kwẹẹtẹ dị wa va dọ mị tụ́
Navọ wa kụ̀ ịrẹkụ ọnọnịị mị.
24Ẹnẹyịmavara ana vị Ohomorihi amị, ịzẹyịza ụụ̄ mẹ nọ,
navọ wa jị ịhị yị mị
Asị ụ navọ ka ẹ̀ nyị ẹbẹẹba amị.
25Asị ụ navọ ka è re oze kà a ka ịsa ẹnị ka ẹnị aa mẹ, ẹnị ẹ sị ọ mẹ
Asị ụ zẹẹ ka ẹ̀ zụ wụ̀ mị kwooze.
26Navọ ahịka ụhị ọ va nyị avaba aza ana aa jẹ ka ịrẹyị ô tù mi nị
dị wa và ẹhẹ ẹnịnị zi
Navọ wa tọ aza ana aa mẹ eyi ka eni ê huna mị dị ụhị ọ̀ nyị wa.
27Navọ aza ana aa jẹ ka wẹ yị jị ịvị mị ẹnị ẹ̀ rẹ va nyị ịrajẹ dị ịnẹ ẹnịnị òo hine
Ẹnịnị ẹ̀ vaa kà a pooro ka Ẹnẹyịmavara ộ nyị ụbanyị
Dị ẹ̀ rẹẹ kà a ka Ẹnẹyịmavara vi ene eē sì ka ẹhẹ ozi ahụ anị ò zoza.
28Ohomorihi, mị vaa kà a pooro nị ka ịzẹyịza ụụ̄ mẹ nị
dị mị raa kụ́ wụ avọ pooro.
Currently Selected:
Ahẹ Ụgama 35: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
