Ahẹ Ụgama 135
135
Ahẹ ana a sị kụ́ Ohomorihi avọ
1Waa kú Ẹnẹyịmavara avọ nịnị
Ẹwụ nịnị ezi ahụ Ẹnẹyịmavara, mị ka waa kụ́ ọ avọ nịnị
2Ẹwụ nịnị ene hi ini ohweje ini eehi Ohomorihi,
dị waa mẹ̀ ụkọrọ ini eehi Ẹnẹyịmavara, waa kụ́ ọ avọ nịnị.
3Waa kụ́ Ẹnẹyịmavara avọ ka ịsa ene zoza ọọ̄ mẹ nị.
Waa jị ahẹ kụ́ ọ avọ nịnị ka ô zee e eyi.
4Ẹnẹyịmavara ọ sị Ijekọvụ nyị ka aanị ọ vị nị.
Ọ kà Anisirẹrị vị ogu anị.
5Yẹ nịnị ka Ẹnẹyịmavara ộ nyị ụbanyị.
Ananyị yị o huna avaba ori nịnị nị.
6Ịsị èe zee Ẹnẹyịmavara eyi kẹnẹ ọọ̄ mẹ ịnị ẹhẹ ọnịrị ini ihinẹba nị.
Avọọ ọ mẹ̀ rẹẹ mẹ avaba aha ini òkū nị.
7Ọọ̄ kụ́ eguhi hụrẹ ịzị ẹhẹ na ta hi, dị ọ kụ́ wa vaa hịrẹ.
Àa zụ̀ orihi, dị ọ mẹ ka apaana ihinẹba ọ̀ọ haa vaka a.
Dị ọ sị ahị jịnẹ hụrẹ ịzị ọ sị ọ tẹ tụ́.
8Ẹnẹyịmavara ọnọọ ọ za avaba ezi Anijipiti ana vị ọzọkụ, dị ọ wụ̀ wa
Avọọ ọ mẹ̀ rẹ ụ ezi ịpaapa ịsụpa ẹnịnị nị.
9Ộ mẹ ịta mā ta pa ịnị ẹtẹ Ijipiti.
Ihwarawo ohinọyị Anijipiti ọnịrị ezi ahụ anị vị ọnị ọ tana ụvọ za.
10Ẹkụra ọrụrụ-ọrụrụ vị ọnị ọ gara ha, dị ọ wụ ohinọyị ọkọọka.
11Ẹnyị ini ohinọyị ẹnẹẹ ẹ vị Isihoni ohinọyị Anamọrị ọnịrị Oogi ohinọyị
Anịbasanị ne beri avaba ohinọyị Anikenaani.
12Dị ọ kụkụ sị ẹtẹ ẹnịnị yị Anisirẹrị aza anị ka ẹ̀ kụkụ sị mẹ ẹẹnịnị nị.
13Ẹnẹyịmavara, ẹwụ vị ana yà ịzọọ pooro zịna-zịna.
Avaba aza ệ wụ́ ịrẹkụkụ awụ.
14Ẹnẹyịmavara vaa vayị aza anị, dị ọ vụ́ ịrẹvụ yị wa.
15 #
Ahẹ 115.4-8; Ẹtẹ 9.20 Enyusẹ ọnịrị igooru anẹkụra nịnị sị mẹ ori ẹnịnị nị.
Aza ẹ sị ụvọ ẹnịnị tụ́ ọ nị.
16Ori ẹnẹẹ ệ nyị irenu, ama ẹ yị zụ sị kà ịrẹyị.
Ẹ rẹ nyị eyi, ama e yi zụ sị re ẹtẹ.
17Avọọ ẹ mẹ̀ rẹ nyị ụtọ nị, ama ẹ yị zụ sị wụ́ ịrẹyị,
ẹ yị hyakụ zụ tụ́ ụhwẹ hụụnị irenu ẹnị ẹ nyị.
18Ẹnịrị aza ana mẹ wa ẹ vị ọnya-ọnya nị,
avọọ aza ana sị ayị tụra wa ẹnị mẹ̀ rẹ yà nị.
19Ẹwụ nịnị Anisirẹrị, waa kụ́ Ẹnẹyịmavara avọ nịnị.
Ẹwụ nịnị aneehi Eerọnị, waa kụ́ Ẹnẹyịmavara avọ nịnị.
20Ẹwụ nịnị Anisirẹrị, waa kụ́ Ẹnẹyịmavara avọ nịnị.
Ẹwụ nịnị ana nyị angwahi Ẹnẹyịmavara, waa kụ́ ọ avọ nịnị.
21Waa kụ Ẹnẹyịmavara avọ ọnịrị Ijerusarẹmị ana vi eehi anị nịnị.
Waa kụ́ Ẹnẹyịmavara avọ nịnị.
Currently Selected:
Ahẹ Ụgama 135: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
