Ụhịrẹyị 31

Ajuwe ohinọyị

1Â nyị ọza ịnya aanị ana a hị́ Ịrẹmụwẹrị. Ộ vịdị vị ohinọyị Imasa da. Ịrẹyị ẹnẹnị ọ vị ịrẹyọyẹ ọnị ọnyị anị sị zụ ọ nị. 2Eyiye ozi emi! Eyiye ozi ịnị ịnẹ amị. Eyiye ozi ọnị mị hị́ eku tụra ịrẹsụ. 3Asị ụ zẹ ka anyẹnẹẹ o du wu ẹhẹ ha. Avọọ ẹnịnị mẹẹ̄ va ohinọyị ọrụrụ-ọrụrụ nẹtẹ nị. 4Dị ộ ka, ẹ yị zoza ka ohinọyị nịnị e hu eche dị ọ̀ọ mẹrị wa dị ọ vaa sị vị eche ọkatẹngụ bẹẹ. 5Ẹyị vị avọọ ọ vaa mẹ ka asị ẹ saasa ọda Ohomorihi dị ẹ kụkụ à mẹ ẹvaya yị onosiye nịnị. 6Sị eche yị ọza ene vee su ọnịrị ọza ọnị ayị anị du. 7Navọ wa e hụ eche dị e hi ayị ụzọngwa ọnịrị ụya ọnị ẹ yaa rị. 8Ohinọyị a vọrọ ka ọ vị irenu ọkarẹyị aza ẹnẹ ẹ zụ̀ ka ịrẹyị nị. Dị ọ̀ rẹ dọ ọkụmị nịnị tịtẹ hụụnị ụvọ aza ana a mẹ̀ wa eyi ngwẹ́ngwẹ̀ nị. 9Dị ọ̀ọ ka ịzẹyịza, dị asị aza re oze mẹ̀ onosiye nịnị rị.

Ebira ọnẹẹ obooro

10Ọnẹẹ obooro ọọ zwọ. Ọnị ọ nyị ụbanyị huni ẹkẹhị nị. 11Ẹngụ ọnẹẹ ọnọọ vị ọnị ọva anị sị ayị tụra. Uruwa ọ yị mā za ọva anị. 12Avaba ẹhẹ anị vị eneē si sii ọyịza yị ọva anị. Ọ yị dọ ka a nyị odivi ene tu ọ. 13Ọ maā kara ụvọ anị hi agada, oō ngwẹ òwù dị e hi ịta nị. 14Ọọ̄ nọ aha ẹnẹẹnẹ na kụ ịsọyịrị vee hi ini eehi anka ẹpa ana kụ osohu nịnị avọọ nị. 15Ụmẹ etumeyọnị ọọ̄ sị kwẹẹtẹ mẹ̀ ịsa yị aza anị, dị ọ ka yị ezi ahụ anị ịsị a vọrọ ka ẹ mẹ̀ nị. 16Ọnyẹnẹẹ ana yẹ a mẹmẹ hị́ ẹtẹ dị ọ kụ ịsa tụ ọ ịnị ụmẹ ọ vị nị. 17Ọza ana zụ mẹ̀ ụkọrọ ọ vị nị. 18Ọnyẹnẹẹ ana yara sẹ̀ ohu ọ vị nị. Ọnị o hu ịra mẹ̀ ụkọrọ naa sụ nị. 19Ọnị o ngwẹ owu ọnị oō sii hí ịta anị nị. 20Ọza ana gụ onosiye ụvọ ọ vị nị. 21Ọ maā hụrẹ ayịnẹ ahị agụvị ka aza anị ẹ nyị ịta ọyị sị kụ ẹngụ. 22Oni oō hí ịta enee ku ẹngụ, dị ọ sị achị ovivi ene zoza chire. 23Ọva anị vị ọnị eyi yẹ ịzị ọdọvịdịị kụụ gụ ịnị ẹkụra, dị a sị ụbanyị yọ nị. 24Ọọ̄ jị awuru hi ẹtẹ dị aā náa yị ọnịnyama nịnị. 25Ọza ana nyị ebira ozoza ọnị aza sị ụbanyị yị ọ vị nị, o tenyi ẹngụ ẹ ma hụrị ayịnẹ ụhwọọ. 26Ọ̀ọ ha irenu, ịrẹyọyẹ ọ kà nị. Ọ kọ aza ka ee sì ịrẹyị ẹngụ nị. 27Ọnẹẹ anaā sịị ụvọ mẹ̀ ịsa pooro kẹnẹ ọ vị nị. Ọọ̄ tẹsị anineehi anị. 28Ezi anị vị anaā kà ebira ọyịza anị. Ọva anị vị anaā ga a. 29Dị ọ ka, ọnẹẹ ozoza gwẹtẹ de ama ose anị ọnọnị o hu nị. 30Uzoza ọ zụ vene ọza o, ọ vaa sa, ama ọnẹẹ ana nyị angwahi Ẹnẹyịmavara vị ana vọrọ ka àa ga. 31Sị ụbanyị yị ẹngụ ọnẹẹ ọnọọ dị ọzọza ọ̀ọ ga a, ịzị aa kụ gụ ịnị ẹkụra.

Currently Selected:

Ụhịrẹyị 31: EBTP

Highlight

Copy

Compare