Ụhịrẹyị 30

Ịrẹyị ọnị Agụ kà

1Â nyị ọnọrụ ọnya aanị ana aā hị́ Agụ ana vị ozi Ijake. Anẹkụra ana a hị́ Imasa ọ vị nị. Ịrẹyị ẹnẹnị ọ ka yị Itiyẹrị ọnịrị Ụkarị nị. 2Ộ ka ụra vị ana nyayịnẹ chi ọnị ẹngụ, ọnị ọ yị nyị apara ọza tụ ẹngụ. 3Ọnị ọ yị kọsẹ ịrẹyọyẹ, dị ọnị ọ va yẹ ẹngụ ọza ọnị Ohomorihi vị. 4Ẹnẹ na ẹbẹẹba, ene chi vẹ da? Ẹnẹ sị ụvọ za ahị da? Ẹnẹ sị achị gụ enyi ịrẹgụ da? Ẹnẹ tẹ ẹhị ẹhwị ẹtẹ avaba ẹhẹ? Ịrẹha ọza ọnọọ rị? Ịrẹha ozi anị rị? Kà a mị ẹnẹ ọ vị? 5Avaba ịrẹyị Ohomorihi vị ịzẹyịza. Ọnị ọọ̄ dọ aza ene zwe na rị ọ tụ anka ogonto avọọ nị. 6Asị ụ da tụ́ ịnị ịrẹyị anị agụvị asị ọ tụ̀ wụ ohuvọ ka onireeche ụ vị nị. 7Agụ kà ịsa ẹẹva ọnị pa Ohomorihi ka ọ sị yị ọnị dị ọnị o vee su nị. 8Ộ ka Ohomorihi ọ sị apẹ ọnịrị ireche noze rịịrị ọnị. Asị ọ zẹ ka iruwa ọ za ọnị, dị asị ọ rẹ mẹ̀ ogu hi ẹtẹ yị ọnị baaba, ama ọ sị ẹhụ ịsọyịrị anị kẹnẹ yị ọnị. 9Asị ịnẹ na ha ọnị baaba, dị ọnị o hi ayị Ẹnẹyịmavara. Asị osiye ọngwọọngụ za ọnị, dị ọnị o vee yi ọ tịtẹ, dị ọnị vaa mẹ̀ ụhị nyị yọ. 10Asị ụ du ozi ahụ zụ ọga anị, agụvị asị ọ vaa tụ ozirenu hi wụ, dị ọ za wụ. 11Aa nyị aza ẹnyị anaā kụ̀ ada ẹnịnị ụhụ. Avọọ ẹ mẹ rẹẹ̀ ka chire ọnyị ẹnịnị nị. 12Aza ẹnyị vị ene ro ka ẹnị ẹ gụ ịnị eyi ẹnịnị, ama ẹnịnị e divi anka ụsẹmụsẹ ịnị ututu. 13Aza ẹnyị vị anaā sịị ẹngụ ẹnịnị tụ ẹba, dị ẹ yaa sị eyii wụ̀ aza ana vọ. 14Aza ẹnyị vị ana aa ha ọhọha, dị ẹ yaa za onosiye ọnịrị anarịmanyị nịnị mẹ ụngwẹ. 15Ọnọhọha vị anaā sịị ụvọ ẹẹva rị ịsa. Ẹẹ̄ pa ịsa pooro kẹnẹ nị. Â nyị ịsa ẹẹna ọnị ẹ yị mā hụ ọza. 16Ịnẹ ọ yị mā ha ẹtẹ anaā rị ọza. Ọbọrị ọ yị mā hụụnị ozi oyi si. Enyi ọ mā hụ ẹtẹ hu. Ọkụ ọ mā hụ ịra rị. 17Ozi anaā sịị ada anị ọnịrị ọnyị anị mẹ̀ enyinyi, dị ẹ yị wụ́ ịrẹyị ọnyị anị vị ana vaa vị oku ụ̀ba. 18Aa nyị ịrẹyị oze ẹẹta a vị ẹẹna enee hi mi irenu ọnị mẹ yị yẹ tu. 19Ẹ yị nyị ọza ana yẹ oze ọnị ọkasịmẹẹ̄ vatụra hịrẹ nọ ẹbẹẹba, a vị ụparị ọnị ẹ́wụ́ụ̄ vatụra ịrẹsụ ịrẹta, a vị oze ọnị ẹpa zị ịrẹsụ enyi, a vị oze ọnị ọnọrụ ọnịrị ọnyẹnẹẹ zịị si ẹngụ. 20Aanị ẹhẹ ọsẹrẹka mẹ ya nị. Ọ̀ọ na sị ẹnya hụ, di o tenyi ẹngụ anị chịmị-chịmị va jẹẹ. E yi re ka akụvị ọnị aa mẹ̀ nị. 21Ịsa ẹẹta a vị ẹẹna anaā kata ẹhẹ ẹngụ: 22ọrịhị ọ̀ọ vị ohinọyị, a vị ọnụra ọ̀ọ nyị avaba ịsọyịrị ọnị e sì, 23a vị ọnyẹnẹẹ ọnị aza nyị ịhyẹrẹ anị ọ̀ọ nyị ọnọrụ, a vị ozi ahụ ọ̀ọ dọ ọnyirehi anị ọnọrụ. 24Â nyị ịsa ẹẹna ịrẹsụ ẹtẹ ene weyi ama dị ẹ nyị ịrẹyọyẹ ẹnẹmẹhị nị: 25Ihine ẹ yị nyị ụkata ama ịsọyịrị ẹnịnị vị ẹnẹẹ̄ kụ tẹ̀ ịnị ụmẹ ịsa ọyịna. 26Avụyẹ ẹ yị nyị ụkata ama ụsị ẹnịnị vị ana yị ịnị akakana ịrẹta. 27Akụvarịva nịnị ẹ yị nyị ohinọyị ama ẹẹ̄ va tụra ẹngụ e mẹmẹ huna ẹngụ nị. 28Azịzẹngụ vị ịsa ọnị ọza nyẹngụ sị ụvọ za, ama ọzaā re wa ini eehi ohinọyị. 29Â nyị ịsa ẹẹta a vị ẹẹva enee hu ahụ ohi: 30Udu ana nyị ụkata huu ịnị avaba uye o yi mē hí angwa, 31a vị ụkọkọrọ ana va ọga hịrẹ, a vị ịdẹ ịnị ataba, a vị ohinọyị ọ yaatụ ịrẹsụ ode ọvịdị aza anị nị. 32Wàa mẹ̀ ụra di u wee wu ụka nị, a vị wàa mẹ̀ eto odivi, za ụvọ jẹẹ wee rò o daa. 33Anka ịrẹva ana a kama mẹẹ̄ nyị angwẹ, aa pịrị ọza aahị baaba vị aa jịra, avọọ ọza yị yara ee si ọza ịrẹyị ọ vara ịrazị nị.

Currently Selected:

Ụhịrẹyị 30: EBTP

Highlight

Copy

Compare