Ụhịrẹyị 22

Ụbanyị ịrẹha ozoza

1Ọza ọ̀ọ nyị ịrẹha ozoza ọ mẹ hụụnị ogu nị. Ọza ọ̀ọ sị ụbanyị yị ọza o hụụnị ẹkẹhị nị. 2Ọnyẹkẹhị ọnịrị onosiye vị ọnyọọnya. Ẹnẹyịmavara ọ tụ wa vẹ ẹhẹ nị. 3Ọza ana yẹ ịrẹyị oo re ezigi dị ọ yẹ̀ yị ọ, ama ọnụra vị ana na gẹrị ọ dị ọ vaa sị ụmayịyẹ. 4Ọza ene hí angwa Ẹnẹyịmavara dị ọ ka ẹngụ chi, ọọ̄ ka hịrẹ, dị ọ mẹ ka o zee yọ, di oku orubo. 5Akanya ọnịrị ẹngụkata irenyi-irenyi vi ene zi ọza ọhịmị. Ọza ene sì ịrẹyị ẹhẹ anị vi eneē zwè yị ịrẹyị. 6Pa ozi tụ oze ana vọrọ, ọ̀ọ sị vịra ọ yị vaa ha hụụnị anị. 7Ọnyẹkẹhị aa mẹ ọda tụra onosiye ịrẹsụ, avọọ ọnụta mẹ ya ahụ ọza ana a sị ẹkẹhị rere e ni. 8Ọza ene chire atọ odivi vi ene vee re ọhịmị, dị ẹ yị kụkụ zụ mẹ ẹvaya yị ọza. 9Ọza anaā mẹ ẹyịza vị ọnị oō ze yị agụvị ka a sị ịsa yị onosiye nịnị. 10Dụ ọza anaa ka chire ọza kwooze, ịraazị ẹ yị na vẹ, dị a vaa kụ ẹngụ ụhụ. 11Ọza ene sì ịzẹyịza, dị ọ yara kà ịrẹyị ọ vaa vị ọta ohinọyị nị. 12Ẹnẹyịmavara vị eneē sere ọza anaa mẹ ịzẹyịza ama enevene nịnị vị ọnị ọọ̄ mẹ̀ ụhị nyị. 13Onuworo vị anaā ya ịnị eehi; ọ kà ọnị ọ̀ọ jịnẹ idu ana ya oze vaa za ọnị. 14Ọsẹrẹka vị ana sị mẹ anka ịrẹpa ana a và zị uye avọọ. Ọza ọnị Ẹnẹyịmavara sị va ịrẹma anị ịrẹpa ọsẹrẹka za nị. 15Ụra vi ene chi ezweyi ayị, ama inori aā sị kụ ụra hụrẹ wa ẹngụ nị. 16Ọza ọbanyị anaa za onosiye mẹ̀ ụngwẹ ọnịrị ọza anaa kụ ịsa na yị ọza ọbanyị vị ọnị iruwa vaa za.

Ịrẹyị Ịrẹyọyẹ

17Batọ, mị vaa zụ wụ ịsa ọyẹrẹyị kà. Zama ịrẹyị ẹnẹẹ re. 18Ayị awụ vee hine, wàa tamayị ịrẹyị ẹnẹẹ, dị wa sị jị ịrẹyị ahụ yị ọza nị. 19Maa sị ịrẹyị ẹnẹẹ zụ́ wu ajịnị agụvị wa sị ayị tụra Ẹnẹyịmavara. 20Ma raà chẹrẹ ịrẹyị oze ohurẹẹwụ ana nyị ịrẹyọyẹ ọnịrị ajuwe ozoza tịtẹ yị wụ nị. 21Ịrẹyị ẹnẹẹ vaa zụ wụ ịzẹyịza agụvị wa yẹ ohi obooro sị aza ana tụ ụ ne si ọ. 22Asị ụ mẹ onosiye rị agụvị ka we huna a. Dị asị ụ rẹ mẹ ẹvaya yị ọkụmị ọvịdị ikootu. 23Ẹnẹyịmavara vaa jẹẹ yị wa, ịsị aza ẹ̀ẹ kụ tu wa ọnị rẹ vaa kụ tu ẹnị nị. 24Asị ẹwụrị ọnọyịkụ nịnị zị ògù. Asị ẹwụrị anayọkatẹngụ nịnị za ọta. 25Ẹ yị vị avọọ ụ vaa kọsẹ ebira ẹnịnị dị ụ wẹ yị zụ hụụnị anị. 26Asị ụ jẹẹ ka u vee sí ụta yị ọnụta, 27Wẹ̀ẹ yị na nyị ẹkẹhị si ụta, a vaa dọ wụ ịbẹẹdị awụ ne si ụta. 28Asị ụ vara udi ịsa ọnị ohiku awụ nịnị sị tọ ẹtẹ ẹhwị ịrẹwa. 29Ọza ana yara mẹ̀ ụkọrọ ẹtẹẹrẹ, ọ zụ mẹ̀ ụkọrọ yị ohinọyị nị. Ọ mā mẹ̀ ụkọrọ yị aza kẹnẹ-kẹnẹ.

Currently Selected:

Ụhịrẹyị 22: EBTP

Highlight

Copy

Compare