Ịrịka 4
4
Ụkọrọ ezi Ikohati nini
1Ẹnẹyịmavara ộ ka yị Imosiisi ọnịrị Eerọnị ka, 2ọ za aza ịrẹsụ Ikohati kẹnẹ ịrịka Ovwoovu-ovwoovu ọnịrị abara-abara. 3Ẹ za avaba anọrụ ana da hụrẹ ịrayị ohurẹẹwụ na ngụ ịrayị ẹvarẹwụ ana hụụ mẹ̀ ụkọrọ ajẹngụ Ẹnẹyịmavara. 4Ẹnị ẹ nyị ọyị sị eyi pe ẹnya ana a sị mẹ ahẹkẹ ịnị irehi Ẹnẹyịmavara nị. 5Àaa nyị ka ẹyaa kwẹẹtẹ hụrị aha ọnyị ngụ ọsa, Eerọnị ọnịrị ezi anị ẹ vịdị va ngụ ịnị ajẹngụ na tụ achị ịnị akakana ne ku apoti oto da nị. 6Dị ẹ sị ụ̀pà ku ọ, dị ẹ varẹma sị ụ̀pà ọkatẹngụ ọsa ana vị onivuru rẹ ku ọ. Dị ẹ kụ ọchị ana a sịị̄ sị ọ chire aha ọzọza. 7Ẹnịnị ẹ gana achị onuvuru ku iteburu anaā sịị ụvụrẹẹdị Ẹnẹyịmavara tụ. Dị ẹ kụ ịchacha, ẹnya eturare, ẹnya ọbanyị, ako ọnịrị ụvụrẹẹdị otirenyi. 8Ẹ vavọọ ra kụ ọ hi ẹtẹ, dị ẹ sị achị ovivi ku ọ. Dị ẹ rẹ sị achị ọvwọọvụ vaku ọ 9Ẹnịnị vaa sị achị ọnuvuru ku ọchị ịrakotupa ọnịrị ịrẹsụ ịra beri ẹnya anị ọnịrị okoko angwẹ 10Dị aa kụ wa vahụra ẹnya ana sị ụtụmpaha ozoza ku, dị aa kụ tụra ọchị anaā sịị kụ wa. 11Eerọnị ọnịrị ezi anị vaa sị achị onuvuru kú ụta ana a sị Igooru mẹ̀. Dị ẹ va ụtụmpaha ozoza kú ọ, dị ka ọchị ana a sịị̄ sị ọ ngụ ọ. 12Dị aa sị achị ọnuvuru para avaba ẹnya irehi Ohomorihi ana vọ. Dị aa va ụtụmpaha ozoza kú wa, dị kụ́ tụra ọchị anaa sị kú wa. 13Dị ẹ kụ́ atịtọ hụrẹ ịrẹsụ ụta ịsọvọ, dị va achị odozeyirị kú ọ. 14Avọọ ẹ mẹ va sị achị ọnịrị ụtụmpaha kú avaba ẹnya ana sị mẹ̀ ụkọrọ ụta anka ịpanụ ọnyịra, ẹnya odenyi, ịchọvịrị, ọnịrị Isiivi ẹhanyị. 15Eerọnị ọnịrị ezi anị ẹ sị mẹ ta dị ezi Ikoha va kú ẹnya ẹnẹẹ nọ ịzị a nọ. Ama ẹ yị nyị ọza ana nyayịnẹ sị ụvọ kanyị ẹnya ẹnẹẹ ẹ vị e si isu yị ẹngụ anị. Ezi Ikoha kẹnẹ ẹ zụ kú ẹnya ẹnẹẹ nị. 16Eriyaza ozi Eerọnị ana vị ohirẹsụ irehi Ohomorihi ọ vị ụkọrọ anị ka o si eyi pe angwẹ ịrakotupa, eturare, akụ ana sị mẹ̀ ịsọvọ ọnịrị angwẹ ana sị nyị ọza. 17Ẹnẹyịmavara ộ ka yị Imosiisi ọnịrị Eerọnị ka, 18asị ẹ zẹ ka ezi Ikoha e vú ẹtẹ ịnị akakana Anireevi nịnị. 19Ẹẹ saasa wa na kụ ẹnya ịnị irehi Ohomorihi. Dị sị zụ wa a mẹ vọrọ ka ọzọza ọ za ẹnya anị agụvị asị e su. 20Asị a nyị ụmẹ ọnị ezi Ikoha sị re ẹnya ẹnẹẹ ẹ vị e yee si usu.
Ụkọrọ ezi Igerisoni
21Ẹnẹyịmavara ộ ka Imosiisi ka, 22ọ za abara-abara ọnịrị ovwoovu-ovwoovu Igerisoni ana ya ịnị ịrẹsụ Ireevi ịrịka. 23Ọ chẹrẹ aza ana sị gụ ịrayị ohurẹẹwụ na ngụ ẹvarẹwụ ana sị hụ ọ mẹ̀ ụkọrọ ịnị irehi Ohomorihi. 24Ẹnịnị ẹ va za ẹnya irehi Ohomorihi nị. 25Ẹnị ẹ va za achị anaā kụ jị aha irenyi-irenyi ini ajẹngụ, ẹnya ajẹngụ ọnịrị avaba ịsị kụ ọ ịrẹsụ vaka ụtụmpaha ozoza ana a sịị̄ vaa ịrẹsụ achị oze ọbanyị. 26Ẹnị ẹ raa kụ ẹnya ana sị jị ọvọ kara ajẹngụ ọnịrị oze ana ngụ ịnị ụba ne beri avaba ẹnya eneē si hí ụta, obo ọnịrị avaba ẹnya ụkọrọ irehi Ohomorihi; ẹnị mẹ̀ ụkọrọ ana a sị yị wa nị. 27Eerọnị ọnịrị ezi anị aa zụ evere Igerisoni a vọrọ ka ẹ mẹ̀ ụkọrọ ọnyọọnyị nị. Ọ̀ọ daka vị ka ẹ za ẹnya hụrẹ aha ẹnyị na ngụ ọsa. 28Ịtama ozi Eerọnị o si eyi pe wa ịnị avaba ụkọrọ ẹnị ẹ yaa mẹ ịnị irehi Ohomorihi nị.
Ụkọrọ ezi Imerari
29Dị Ẹnẹyịmavara rẹ ka Imosiisi ọ za evere Imerari ịrịka abara-abara ọnịrị ovwoovu-ovwoovu ene hi ịnị Anireevi nị. 30Ọ za anọrụ ana gụ ịrayị ohurẹẹwụ na ngụ ẹvarẹwụ ana nẹngụ mẹ̀ ụkọrọ ini irehi anị. 31Ẹnị ẹ̀ vaa kụ ọchị irehi, ẹwara anị ọnịrị avaba ohinẹ ne beri ohi ẹtẹ irehi nị. 32Ọnọrụ ọzọza vana a si ẹnya anị yị ana a za a. Ẹnya ẹnẹẹ ẹ vị ọtụ ọvọ, obo, ịpẹgị ọnịrị avaba ẹnya ụkọrọ ana vọ. 33Ẹsẹnị ẹ vị ụkọrọ ịrẹsụ Imerari ịnị Ajẹngụ Ohomorihi nị. Ịtama ozi Eerọnị o re si eyi pe ẹnị ẹnẹẹ ịnị ụkọrọ ẹnịnị nị.
 za Anireevi nini ịrịka
34Imosiisi ọnịrị Eerọnị beri ọdọvịdị ana vọ ệ za evere Ikoha abara-abara ọnịrị ovwoovu-ovwoovu ịrịka nị. 35Aza ẹnị ẹ zarịka vị anọrụ ịrayị ohurẹẹwụ na ngụ ẹvarẹwụ ana zụ mẹ̀ ụkọrọ ịnị irehi Ohomorihi. 36Avaba aza ana zarịka vị akawụ tụra akatarẹchẹhị tụra ẹvarẹwụ (2,750). 37Avaba evere Ikoha ana zụ mẹ̀ ụkọrọ ịnị irehi Ohomorihi ẹnị Imosiisi ọnịrị Eerọnị zarịka anka Ẹnẹyịmavara mẹ ọda anị yị wa yị. 38Evere Igerisoni vana rẹ vavọọ zarịka. 39Ẹhụ anọrụ ịrayị ohurẹẹwụ na ngụ ẹvarẹwụ ana zụ mẹ̀ ụkọrọ ini irehi Ohomorihi aa zarịka nị. 40Avaba ẹnịnị vị Akawụ tụra akata tụra ohurẹẹwụ (2,630) 41ẹnị Imosiisi ọnịrị Eerọnị zarịka anka Ẹnẹyịmavara mẹ ọda yị wa. 42Evere Imerari vị ana rẹ zarịka abara-abara ọnịrị ovwoovu-ovwoovu, 43ẹhụ ịrayị ohurẹẹwụ na ngụ ẹvarẹwụ ana zụ mẹ̀ ụkọrọ ini irehi Ohomorihi. 44Avaba ẹnịnị saka-saka vị akawụrakahị (3,200). 45Avaba ịrịka Animerari ana zụ mẹ̀ ụkọrọ ini irehi Ohomorihi ẹnị Imosiisi ọnịrị Eerọnị zarịka anka Ẹnẹyịmavara mẹ ọda anị yị wa yị. 46Avọọ Imosiisi ọnịrị Eerọnị beri ọdọvịdị ana vọ mệ za avaba Anireevi ịrịka nị. 47Avaba anọrụ ana gụ ịrayị ohurẹẹwụ na ngụ ẹvarẹwụ ana nẹngụ mẹ̀ ụkọrọ ini irehi Ohomorihi ana kụ ẹnya vị 48ịrịka akawụ-akawụ oze ẹẹna tụra akavarẹchẹhị tụra ẹbẹẹva (8,580) 49Ọzọza vana sị ụkọrọ anị yị ọnịrị ẹnya ana vọrọ ka ọ za anka Ẹnẹyịmavara mẹ ọda anị yị Imosiisi nị. Avọọ a mẹmẹ za wa ịrịka anka Ẹnẹyịmavara mẹ ọda anị yị Imosiisi nị.
Currently Selected:
Ịrịka 4: EBTP
Highlight
Share
Compare
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
