Ịrịka 3
3
Ezi Eerọnị
1Aza ẹnịnị ẹ vị ezi Eerọnị ịnị ụmẹ ọnị Ẹnẹyịmavara sị ka ịrẹyị Imosiisi ịrẹsụ ataba Ịsịnayị. 2#Ịrị 26.60Ịrẹha ezi Eerọnị ẹ vị Inadabi ana vị ozi ọzọkụ anị, Abihu, ọnịrị Erizari ne beri Ịtama nị. 3Ezi Eerọnị anaa hị́ ịrẹha ẹnịnị aanị aa vaa nyị ka ẹ vị ohirẹsụ irehi Ohomorihi nị. 4#Ire 10.1,2; Ịrị 26.61Ama Ẹnẹyịmavara ộ wụ Inadabi ọnịrị Abihu ịnị ụnọmị Ịsịnayị agụvị ka ẹnịnị ẹ rị eturare ịra ini oze ẹnẹ ẹ yị vọrọ.
 nyị Anireevi nini ka ẹ vị ọnọgụvọ ohirẹsụ irehi Ohomorihi nini
5Ẹnẹyịmavara kà yị Imosiisi ka; 6Ọ nyị Anireevi nini dị ẹ vị ọnọgụvọ Eerọnị 7Ẹnịnị vaa mẹ̀ ụkọrọ yị Eerọnị ọnịrị avaba Anisirẹrị nịnị. 8Ẹnịnị e vee si eyi pe avaba ẹnya ene hi ajẹngụ Ẹnẹyịmavara ọnọọ nị. 9A nyị wa hụụnị ịnị akakana Anisirẹrị ka ẹnịnị ẹ vị ọnọgụvọ Eerọnị ọnịrị ezi anị nị. 10Eerọnị ọnịrị ezi anị kẹnẹ a nyị ka ẹẹ mẹ̀ ụkọrọ ohirẹsụ irehi Ohomorihi nị. Àa nyị ọza ẹnẹsa anaa na hama wa, aa wụ̀ ọ. 11Dị Ẹnẹyịmavara kà yi Imosiisi ka, 12#Kụra 13.2Ọnị ộ raa sị Anireevi nịnị dọ ịrẹsụ avaba ezi ịpaapa Anisirẹrị nịnị. Ẹnịnị ẹ kụkụ sị vara aanị. 13Avaba ezi anọrụ ịpaapa Anisirẹrị vị Ẹ́ẹnẹyịmavara. Ụmẹ ọnị ọ sị wụ ezi ịpaapa Anigipiti nịnị, ọ sị nyị avaba ezi ịpaapa Anisirẹrị ọnịrị ezi ịpaapa ịsụpa ẹnịnị ka ẹ vị aanị nị.
 za Anireevi nini ịrịka
14Ịrẹsụ ataba Ịsịnayị Ẹnẹyịmavara ọ̀ varẹma pe Imosiisi ka ịrẹyị. 15Ọ kà Imosiisi ọ za anọrụ ịrẹsụ Ireevi ịrịka hụụnị ovwoovu-ovwoovu na ngụ abara-abara ẹnịnị. 16Dị Imosiisi mẹẹ anka Ẹnẹyịmavara mẹ ka yị o nị. 17Ịrẹha ezi Ireevi ẹyịta ẹ rị, Igẹsọnị, Ikohati, ọnịrị Imerari nị. 18Ịrẹha ezi Igerisoni ẹ rị Iribini ọnịrị Isimeyi nị. 19Ezi Ikohati ẹ rị Amịramị, Iziha, Ihebirọnị ọnịrị Uziyẹrị nị. 20Ezi anọrụ Imerari ẹ rị Imahiri ọnịrị Imusi nị. 21Anigerisoni ẹyịva aa hị́ Aniribini ọnịrị Anisimi nị. 22Ezi anọrụ ẹnịnị hụrị ozi ụhwẹ ọnya na ngụ ọzọkụ vị aza ịrịka akawụ-akawụ oze ẹẹta tụra akahị tụra akavarẹchẹhị (7,500). 23Ẹnịnị ẹ̀ jị ajẹngụ ẹnịnị tụ ịrẹma ajẹngụ Ẹnẹyịmavara eyi ịzị ọyịị̄ zịị ngụ ẹtẹ. 24Ọdọvịdị ẹnịnị ọ vị Eriyasahwi ana vị ozi Irayeri nị. 25Ẹnịnị e si eyi pe ajẹngụ Ẹnẹyịmavara ọnịrị Ịsa ene si ku ajẹngụ ịrẹsụ, ne beri ịsa ene si ku oze ovwoovu anị 26Ẹnị ee si eyi pe achị anaa sị kara ajẹngụ ọnọọ ọnịrị ẹnya ana vọ nị. 27Abara ẹẹna ene hi ini Ikohati ẹ vị Anamịramị, Aniziha, Anihebirọnị, ọnịrị Anuziyeri. 28Avaba ezi anọrụ ẹnịnị anaa za ịrịka hụụnị ẹhụ ụhwẹ ọnya vị (8,600). Ẹnị ẹnẹnị e si eyi pe irehi Ohomorihi nị. 29Avaba abara Anikohati nịnị vị ana a jị ajẹngụ ẹnịnị tụ eyi ụvẹtẹ irehi Ohomorihi. 30Erizahwani ana vị ozi Uziyẹrị ọ vị ọdọvịdị ẹnịnị nị. 31Ẹnịnị e si eyi pe irehi Ohomorihi ịzị apoti oto, iteburu, ọchị ịra, ụta irenyi-irenyi ọnịrị ẹnya irenyi-irenyi ana a sị mẹ̀ ụkọrọ ịzọọ hi nị. 32Eriyaza ana vị ozi Eerọnị ọ vị ohirẹsụ avaba ọdọvịdị Anireevi nịnị ana si eyi pe irehi Ohomorihi ọnọọ nị. 33Abara ẹẹva ana ya ịnị ịrẹsụ Imerari ẹ vị Imahiri ọnịrị Imusi nị. 34Avaba ezi anọrụ ẹnịnị anaa za ịrịka vị ẹnị (6,200) 35Izureri ana vị ozi Abiheri ọ vị ohirẹsụ ẹnịnị nị. Ẹnịnị vị anaa jị ajẹngụ ẹnịnị tụ oze eyi ẹbẹẹba akaha irehi Ohomorihi 36Ẹnị aa nyị ka e si eyi pe avaba ẹnya anaā sịị jị ajẹngụ anka ọtụ, ohinẹ, ẹwaara, ọnịrị ẹnya ana vọ. 37Ẹnị e re si eyi pe ọchị ohinẹ, obo ọnịrị ẹnya ana vọ ana sị da ohweje anị. 38Imosiisi ọnịrị Eerọnị ne beri ezi ẹnịnị vị ana da aha ẹnịnị tụ ọvịdị irehi Ohomorihi oze eyi ịzị ọyị hụrẹ vẹ. Ẹnị e si eyi pe a mẹ vọrọ ka Anisirẹrị ẹ mẹ ahẹkẹ ini irehi Ohomorihi nị. Àa nyị ọza ẹnẹsa ana hama wa na mẹ̀ ụkọrọ ọnọọ vị anaa wụ ịzịzọọ. 39Avaba ezi anọrụ Anireevi ọnị Imosiisi ọnịrị Eerọnị za ịrịka vị (22,000).
 sị Anireevi nini dọ ịrẹsụ ezi ịpaapa Anisirẹrị
40Ẹnẹyịmavara ộ ka yị Imosiisi ka ọ za ezi anọrụ ịpaapa Anisirẹrị ịrịka hụrẹ ozi ụhwẹ ọnya. 41Ẹnẹyịmavara kà Anireevi nịnị aa vaa sị dọ wa ịrẹsụ nị. Avọọ a mẹ rẹ vaa sị ịsụpa ẹnịnị dọ ịrẹsụ avaba ezi ịpaapa ịsụpa Anisirẹrị nịnị nị. 42Ịzẹyịza, dị Imosiisi za ezi anọrụ Anisirẹrị nịnị ịrịka anka Ẹnẹyịmavara mẹ̀ ka a nị. 43Dị avaba ẹnịnị vị ịrịka (22,273). 44Dị Ẹnẹyịmavara kà yị Imosiisi ka, 45ọ sị avaba ezi anọrụ Anireevi nịnị ọnịrị ịsụpa ẹnịnị dọ ịrẹsụ ezi ịpaapa Anisirẹrị nịnị ọnịrị ịsụpa ẹnịnị. Ẹnẹyịmavara kà avaba Anireevi nịnị vị anị, dị ọnị rẹ vị ẹnịnị nị. 46Ka ezi anọrụ Anisirẹrị ẹ rụrụ huni anọrụ Anireevi. Anọrụ akahị tụra ẹtarẹwụ tụra ẹẹta ọnị e si huna Anireevi vị ana a va sị ẹkẹhị jị. 47Dị Ẹnẹyịmavara kà Imosiisi ọ dọ isiriva ẹẹhị ịrẹsụ ọzịnya-ọzịnya ana a vị ẹhụ ẹkẹhị ịnị irehi Ohomorihi. 48Ẹkẹhị ana a dọ vị anaa sị yi Eerọnị ọnịrị ezi anị. 49Ịzẹyịza, dị Imosiisi dọ ẹkẹhị anaa sị jị ẹnịnị ana tụra nị. 50Avaba ẹkẹhị ọnị ọ dọ vị isiriva (1,365). 51Dị Imosiisi sị avaba ẹkẹhị ọnọọ yị Eerọnị ọnịrị ezi anị nị anka Ẹnẹyịmavara kà a.
Currently Selected:
Ịrịka 3: EBTP
Highlight
Share
Compare
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
