Inehemaya 4

Inehemaya ộ nyị ẹbẹẹba ọnịvị anị nịnị

1Ịjị Ịsanbaratị wụ́ ọ ka yee tenyi ọvọ Ijerusarẹmị tụra, dị ayị anị sị du chuku-chuku nị. Dị aa sị yị mẹ enyinyi nị. 2Ộ ya eyi ọta anị nịnị ọnịrị ọga isoja Anịsamarịya nịnị aa kụ Aniju nịnị ụhụ. Dị ọ ka, sị Aniju ọkụmị-ọkụmị ẹnẹnị ro ka ẹnị aa mẹ kẹ? Vị ẹnịnị wee sì ka ẹnị ẹ̀ tụra ọvọ ẹkụra ọnọọ nị? Vị ẹnịnị wéé ro ka ẹnị ẹ̀ẹ mẹ̀ ịsọvọ ẹnị ẹ zụ mẹ̀ ụkọrọ ọnọọ ta ẹkụhị ọnya nị? Vị ẹnịnị wéé ro ka ẹnị ẹ zụ kụ ịrẹta hụụnị eburu ọnọnị dị ẹnị varẹma sị tụra ọvọ ọnọọ nị? 3Dị Itobaya ana vị Anamọnị ana jẹẹ pe Ịsanbaratị tụ ọ ohi, dị ọ ka, ọvọ sị ẹ yaa tụra? Ahaka ọ̀ọ hịrẹ ẹ vi ee wu nị. 4Ama dị Inehemaya mẹ̀ aduwa, dị ọ ka Ohomorihi ọ̀ wụ́ isiya ọnị ẹ yaa mẹ ẹnị aanị, avaba enyinyi ọnọọ ọ̀ vị ẹnịnị. Ohomorihi ọ̀ mẹ ka à dọ wa avaba ogu ẹnịnị, dị à za wa ọrịhị nọ ẹkụra ọsa. 5Asị Ohomorihi vagu ebira odivi ẹnịnị. Ọ̀ navọ ebira odivi ẹnịnị tụra wa ịpatẹ agụvị ka ẹ raà kụ̀ ẹnị anaa tụra ọvọ ụhụ. 6Agụvị avọọ dị aza kụ ẹngụ hí ụkọrọ ọnọọ mẹ, dị a tụra ọvọ ọnọọ ne tu achẹva ụnẹba ọnị ọ vịdị vị nị. 7Ịjị Ịsanbaratị, Itobaya, Anarabi nịnị, ọnịrị Anamọnị nịnị neberi Anasidodi nịnị re ka a raà tụra ọvọ ọnọọ ka hịrẹ tụ achẹva, dị a raà va uhwohwo ene hi ini ọvọ, dị ayị ẹnịnị sị du chuku-chuku nị. 8Dị avaba ẹnịnị gẹ eyi ka ẹnị aa kụ ịrẹkụ vee tu Anijerusarẹmị nịnị, dị ẹnị ẹ va yị zi nị. 9Ama dị ị mẹ̀ aduwa hị́ Ohomorihi ayị, dị ị nyị aza enee sere ẹtẹ ọọdụ ọnịrị ịrahụ agụvị ẹnịnị nị. 10Ịjọnọọ dị Anijuda nịnị a rị uhuhu ka ọ sị ngụ anụkọrọ ẹngụ nị. Ẹchaka ọvọ ene wu ọ sị dẹngụ yị ẹnị ọyị kụ. Ẹnị mẹmẹ zụ tụra ọvọ ta ịhyọnịhyọnọọ? 11Ẹ kà ọnịvị ayị ê wo oto ka ẹnị vaa sụ yị avaavo, dị ẹnị ẹ wụ̀ yị, dị ẹnị ẹ za ụkọrọ ọnọọ jẹẹ. 12Ụmẹ ọrụrụ-ọrụrụ Aniju nịnị ana ra gụrị ọnịvị ayị nịnị vaa kà yị ọnọ agụvị ịsị ẹ gẹ eyi anị nị. Ẹ kà ẹnị vaa gẹ ịrẹkụ tu yi eyi ụvọnị-ụvọnị nị. 13Inehemaya kà agụvị avọọ ọnị kụ aza ka ee sere ẹtẹ ịzị ọvọ ẹ yị ta tụra ana nẹtẹ nị. Ovwoovu ọzọza vị ana kụ ụhwọ, ọha, ọnịrị ọpa neberi ọkịta ne ku ee zi wa aha anị. 14Ịjị ọnị re ka angwa ee hí aza, dị ọnị hị́ ọdọvịdị nịnị ọnịrị aza ana vọ gụ, dị ọnị tụ wa ọtụtụrụma ka asị e hí angwa ọnịvị ẹnịnị. Ẹ tama ayị Ẹnẹyịmavara mẹmẹ banyị ọnịrị ẹpazizi anị. Ẹ kwẹẹtẹ ẹ vụ ịrẹvụ agụvị anda ẹnịnị, ezi ẹnịnị ẹnịrị ese ẹnịnị ne beri ovwoovu ẹnịnị. 15Ịjị Ọnịvị ẹnịnị sị yẹ ka iruvo ẹnẹnị ọ sị tụ ẹhẹ. Ohomorihi ọ raà gara eto odivi ẹnịnị ha. Agụvị avọọ, dị Anisirẹrị ọzọza varẹma nọ aha anị nee tenyi ọvọ ene wu tụra nị. 16Hụrẹ ụmẹ ọnọọ, achẹva aza aa mẹ̀ ụkọrọ, dị aza ana vọ ee sere ẹtẹ nị. Dị ẹnị ene sere ẹtẹ tenyi ẹngụ, dị ẹ kụ ọha, ọnịrị ogonto, dị ẹ ka ọpa ku nị. Avaba ọdọvịdị nịnị vana gụ anụkọrọ nịnị 17ana tụra ọvọ ụvọ. Aza ana kụ ẹnya yị anụkọrọ nịnị vị ana rẹ kụ ẹnya ịrẹkụ ẹnịnị rị ụvọ ọnya, dị ẹ sị ụvọ ọsa kụ ẹnya ụkọrọ nị. 18Dị ọtụrarehi ọzọza hara ụhwọ tu ịzị a mẹ̀ ụkọrọ nị. Dị ọnọpanyị ịrẹkụ jẹẹ pe Inehemaya agụvị dị ọ sị hị́ aza. 19Dị Inehemaya kà yị ọdọvịdị nịnị ọnịrị aza ene hi udi beri aza ana vọ ka, agụvị ka aha irenyi-irenyi ịzị aza yaa mẹ̀ ụkọrọ e noze hi ẹngụ, aza ẹ yị gụrị ẹngụ. 20Ịjị ẹ̀ẹ wụ́ ọpanyị ịrẹyị kẹnẹ, ọzọza ọ̀ va gụ ịda anị. Ohomorihi ẹnịnị vaa kụ ịrẹkụ yị ẹnị. 21Avọọ ẹ mẹ mẹ̀ ụkọrọ ọnọọ eyinị-eyinị, hụrẹ ẹnẹnẹ na ngụ ụmẹ ọnị ụzọmịị̄ sịị chị ịrahụ nị. Achẹva aza aa mẹ̀ ụkọrọ, dị ẹnị ana vọ ee sere ẹtẹ. 22Ịnị ụmẹ ọnọọ, Inehemaya kà yị anụkọrọ ẹnịrị aza ana gụ wa ụvọ ka asị ẹ jịnẹ hụrẹ Ijerusarẹmị ịrahụ. Ẹnịnị ee sere ẹtẹ ịrahụ, dị ẹẹ mẹ̀ ụkọrọ ọọdụ. 23Ẹ yi vaa nyị ọza ịnị ẹngụ ẹnịnị ana vaa ngwa awuru ụkọrọ anị tịtẹ; a vị ọnị ụvọta, a vị ẹyịnyara anị, a vị ezi ahụ anị, a vị aza ene sere e. Ọzọza vị ana sị ẹnya ịrẹkụ anị tịtẹ pe ẹngụ.

Currently Selected:

Inehemaya 4: EBTP

Highlight

Copy

Compare