Inehemaya 3

Inehemaya ô tenyi ọvọ Ijerusarẹmị tụra

1Â nyị ọnọrụ ọnya aanị ọnị ịrẹha anị rị Eriyasibi. Ohirẹsụ ọbanyị irehi Ohomorihi ọ vị nị. Ọnịrị anda ẹnịnị ohirẹsụ irehi Ohomorihi ê tenyi oze ọbanyị ẹkụra ana a hị́ oze atẹmẹ. Dị ẹ sị ukere chire oze anị, dị ẹ tụra ọvọ hụụ ịzọọ na ngụ ịzị a hị́ oregeerege ẹchẹhị ọnịrị Ịhananẹrị. Dị ẹ sị ụkọrọ ẹnị ẹ mẹ chire Ohomorihi ụvọ nị. 2Dị anọrụ Ijeriko tụra ọvọ vatụra wa nị. Dị Izaku ana vị ozi Imiri tụra ọvọ ana gụrị Anijeriko nịnị nị. 3Dị ezi Ihasenaa tụra oze ọbanyị ana a hị́ oze ivovo nị. Dị ẹ kụ ohinẹ tụ aha ọzọza, dị ẹ kụ ukere chire oze ọzọza ọnịrị ẹza neberi ọchị ojoze. 4Aza ana tụra ọvọ gụrị wa ẹ vị ezi Imeremọtị, aazị Ihakozi ọnị ịrẹha ada anị rị Uriya. Ezi Imesurami ozi Ịbẹrẹkiya, aazị Imesezaberi ộ tụra ọvọ na gẹrị ọnị ezi Ịzadọkị ana vị ozi Ibaana tụra nị. 5Dị ezi Itekowa tụra ọvọ gụrị Ịzadọkị nị. Ama ọdọvịdị ẹnịnị ẹ yị bẹ ụvọ tụ ịnị ụkọrọ ene tu wa. 6Dị Ijehoyada ozi Ipaseya ọnịrị Imesurami ana vị ozi Ibesodeya tenyi oze ọbanyị ẹkụra Ịyẹẹyẹ. Dị ẹ gu ọ utu, dị ẹ kụ oze chire e ọnịrị ẹza oze neberi ọchị ojoze. 7Aza ana tụra ọvọ gụrị wa ẹ vị ezi Imeratiya ozi Anigibiyọnị ọnịrị Ijadoni Animerọnọtị neberi Imizipa. Dị ẹ mẹ̀ ụkọrọ na ngụ irehi Ịgọvọnọ ana ya eyi ịzị ọyịị̄ na ngụ ẹtẹ akẹnẹ Irehu Iyuhwuretisi. 8Dị Uzeri ozi Iharihaya eneē tu Igooru tụra eyi ịdị anị, dị Ịhananịya ana aā mẹ eturare tụra ọvọ eyikụha anị. Dị ẹ vavọọ tenyi ọ hụrẹ Ijerusarẹmị na ngụ ịzị a hị́ ọvọ ọgana. 9Irehwaya ozi Ihuri ana vị ọdọvịdị achẹva Ijerusarẹmị ọ tụra ịpa ọsa nị. 10Dị Ijedaya ozi Iharumahwi ọ tụra ọvọ ana va eyi ka irehi anị nị. Dị Ihatusi ozi Ihasabineya tụra ọvọ ana gụrị ọ nị. 11Imarikija, ozi Iharimi ọnịrị Ihasubi, ozi Ipahati-Imowabi ẹ vabẹ tụra ọvọ ana vị ịpa ẹnịnị nị. Dị ẹ tụra irehi ọgọdọ ana a hị́ Oveni. 12Dị Isarumi ozi Iharohesi ana vị ọdọvịdị achẹva ẹtẹ Ijerusarẹmị ọnịrị ezi anọrụ hụrẹ ẹkụra eweyi-eweyi ẹ da aha tenyi ịnị ọvọ ọnọọ nị. 13Ihanuni ọnịrị aza ana ra Izanowa ẹ tenyi oze ọbanyị upoporo nị. Dị ẹ kụ ukere oze jẹẹ, dị ẹ kụ ẹza vaka ọchị ojoze hi wa nị. Dị ẹ rẹ tụra ọvọ ana tana ọtẹ ẹhụ ahụ akavarẹchẹhị dị ọ na ngụ oze ọbanyị ịnị itutu nị. 14Imarikija ozi Irikabi ana vị ohinọyị ẹtẹ Ịbẹtị-Ihakeremi e tenyi oze ọbanyị itutu, dị ẹ kụ ukere oze chẹrẹ e ọnịrị ẹza neberi ọchị ojoze nị. 15Isarumi ozi Ikori-Ihoze ana vị ohinọyị Imizipa ô tenyi oze ọbanyị ana a hị́ adagu enyi. Ô gu ọ utu, dị ọ kụ ukere chire e, dị ọ kụ ẹza ọnịrị ọchị ojoze hi wa nị. Dị ọ tụra ọvọ ne tu ịzị aa hị́ imisi Isera ana gụrị ụbazị ohinọyị. Dị ọ tụra a na ngụ ịzị a jị ode hi chi na ngụ ẹkụra Idevidi nị. 16Dị Inehemaya ozi Azibuki ana vị ohinọyị achẹva ịjọva ozi-ẹtẹ ẹkụra Ịbẹtị-Izuri tụra ọvọ ana vọ na ngụ ịzị e ne oku Idevidi tụ nị. Dị ọ vavọọ tụra a para Imisi hu ne tu ivariki isoja nịnị nị.

Anireevi nịnị ana tụra ọvọ

17Ezi Ireevi ana vana tụra ọvọ vatụra Inehemaya yị; Irehumi ozi Ibani ộ tụra ọvọ vatụra a, dị Ihasabiya ana vị ohinọyị achẹva ẹtẹ Ikiyera tụra ọvọ ẹhwị ẹtẹ aza anị yị wa nị. 18Dị Ibinuyi (Ibawayi) ozi Ihenadadi ana vị ohinọyị ịrẹsụ achẹva ẹtẹ Ikiyera ọsa tụra ọvọ eyi ịdị anị nị. 19Ezeri ozi Ijesuwa ana vị ọdọvịdị Imizipa ộ tụra ọvọ ana ya ọvịdị irehi ịzị a kụ ẹnya ịrẹkụ hi na ngụ ịzị ọvọ ya raara. 20Ibaruki ozi Izabayi vị ana tụra ọvọ na ngụ enoze irehi Eriyasibi ana vị ohirẹsụ ọbanyị irehi Ohomorihi. 21Dị Imeremọtị ozi Uriya ọnị ada anị rị Ihakozi tụra ọvọ na para irehi Eriyasibi hu nị. 22Ohirẹsụ irehi Ohomorihi ẹnẹnị ẹ vana tụra ọvọ aha ana vọ nị: Ohirẹsụ irehi Ohomorihi nịnị ana ra ẹkara-ẹkara Ijerusarẹmị ệ tụra ọvọ ana vatụra ana a vịdị tụra nị. 23Ịbẹnjamịnị ọnịrị Ihasubi ệ tụra ọvọ ana ya ọvịdị irehi ẹnịnị dị Azariya ozi Imaseya, aazị Ananịya tenyi ọvọ ana gụrị irehi anị nị. 24Avọọ Ibinuyi ozi Ihenadadi ọnị mẹ rẹ tụra ọvọ ọnọọ para irehi Azariya hu na ngụ ẹhụ ịzị ọvọ ya raara nị. 25Ipararị ozi Uzayi ộ tụra ọvọ aha okuvọ na ngụ ịpa oregerege irehi ohinọyị ọnịrị ẹbẹẹba irehi oserẹtẹ. Dị Ipedaya ozi Iparosi ọnị ọ rẹ tụra ọvọ ana gụrị Ipararị nị. 26Anụkọrọ irehi Ohomorihi ana ra ịnị ataba Ohweri ê tenyi ọvọ tụra ne tu oveyika oze ọbanyị ana a hị́ Oze Enyi, eyi ịzị ọyị zị hụrẹ tụ ẹhẹ.

Aza ana vọ ana tụra tụ ịnị ọvọ

27Dị Anọrụ Itekowa tenyi ọvọ hụrẹ irehi ọgọdọ ọbanyị ne tu ọvọ ana gụrị Ohweri. 28Dị ohirẹsụ irehi Ohomorihi nịnị tenyi ọvọ na ngụ Oze ọbanyị ana a hị́ oze Umaata. Ọzọza vị ana mẹ̀ ụkọrọ ọvịdị irehi anị. 29Ịzadọkị ozi Imeri vị ana tụra ẹhụ ọvọ ana ya ọvịdị irehi anị. Dị Isemaya ozi Isekaniya eneē sere oze ọbanyị ịzị ọyị zị hụrẹ vẹ ộ tụra ọvọ ana vatụra a. 30Dị Ịhananịya ozi Iseremiya ọnịrị Ihanuni ana vị ozi ọhụhịnọnyị Izarahwi tenyi aha ẹnyị, dị Imesurami ozi Ịbẹrẹkiya tenyi ọvọ ana gụrị irehi anị nị. 31Imarikija eneē tụ igooru ộ tụra ọvọ ana gọdọ ẹtẹ na ngụ irehi ana a da yị anụkọrọ irehi Ohomorihi ọnịrị irehi osohu nịnị. Irehi ọnọọ vị ana va eyi ka oze ọbanyị Imihikadi ana gụrị aku ẹbẹẹba ịnị okuvọ ịnị akakana ẹyị ịzị ọyị zi hụrẹ vẹ ọnịrị eyi ẹbẹẹba anị. 32Dị anụkọrọ igooru ọnịrị osohu nịnị tụra ọvọ ana ya ịzị ọvọ raara na ngụ ịzị aa hị́ oze atẹmẹ.

Currently Selected:

Inehemaya 3: EBTP

Highlight

Copy

Compare