Ireevi 8

A mẹmẹ sị Eerọnị ọnịrị ezi anị rị ohirẹsụ irehi Ohomorihi

(Kụra 29.1-37)

1Ẹnẹyịmavara ộ kà a yị Imosiisi ka, 2Ọ̀ kụ́ Eerọnị ọnịrị ezi anị vẹ enoze ajẹngụ anị; dị ọ̀ kụ́ ẹnya ohirẹsụ irehi Ohomorihi, angwẹ ene e siī sisi ọza ịrẹsụ ọnịrị ụnọ ana aa sịị mẹ̀ ịsọvọ agụvị ebira odivi aza vaka wa vẹ, ọ ka Imosiisi ọ̀ rẹ kụ́ ịdẹba ẹẹva ọnịrị uji ana a kụ́ ịbụrẹdị ọnị ọza ẹ̀ yị sị owu tụ vẹ. 3Ọ kà ọ̀ọ vavọọ sị ọ mẹ, dị ọ̀ hị́ avaba Anisirẹrị nịnị gụ ịzọọ. 4Imosiisi ộ mẹ̀ ịsị Ẹnẹyịmavara mẹ ọda anịị yị ọ, dị avaba ẹkụra kụ ẹngụ gụ enoze ajẹngụ ana yaa gẹ nị. 5Ịjị avaba aza sị gụ, dị Imosiisi ka ịsị Ẹnẹyịmavara mẹ ọda ka ọnị ọ̀ mẹ, ọnị aa vaa mẹ aanị nị. 6Dị Imosiisi kụ Eerọnị ọnịrị ezi anị dị ọ hụ wa enyi nị. 7Ô chire Eerọnị ọtịnịnẹ awuru, ọnịrị awuru ọgọdọ, dị ọ jị obo sụ́ ọ ọtẹ nị. Ô re chire e ịharamịra, dị ọ sị obo ana a ta ọyịza-ọyịza tụ ọ sụ́ ọ za ẹngụ nị. 8Imosiisi ộ rẹ sị okurachị dị ọ và a ku ọ ịrachị nị ịsị e siī si iruvo ịrẹyị ana aā hị́ urimi ọnịrị itumini vị ọnị ọ kụ hi ini okurachị ọnọọ. 9Ộ jị ọ ubobo, dị ọ sị igooru mẹ̀ ẹ ọvị ọvịdị nị, igooru ọnọọ ọ sị zụ ka â sị ọtirenyi yị Ohomorihi nị. Avọọ Ẹnẹyịmavara mẹ mẹ̀ ẹ ọda yị Imosiisi nị. 10Ịjị Imosiisi maanị raa kụ ẹnya hi Eerọnị ẹngụ, dị Imosiisi sị angwẹ ene e siī sisi ọza ịrẹsụ, dị o che e sẹ ajẹngụ Ẹnẹyịmavara ọnịrị avaba ịsị ene hi ịnị anị. Aanị ọ́ mẹ mẹ sị avaba ẹnịnị tụ irenyi yị Ẹnẹyịmavara nị. 11Ô re che angwẹ ọnọọ sẹ ụta ụpẹ ịhịmba, dị o che e sẹ ẹnya ene hi ịzọọ ọnịrị ẹnya odenyi ọbanyị na ngụ ahẹtẹ anị nị. Aanị ọ́ mẹ mẹ rẹ sị avaba ẹsẹnị tụ irenyi yị Ẹnẹyịmavara nị. 12Imosiisi ộ và angwẹ ọnọọ hi Eerọnị ịrẹsụ ọnị ọ sị nyị ọtirenyi yị Ẹnẹyịmavara. 13Imosiisi ộ rẹ kụ ezi Eerọnị vẹ ọvịdị, ộ chire wa ọtịnịnẹ awuru, dị ọ sị obo sụ́ wa ọtẹ nị. Ộ rẹ jị wa ubobo anka Ẹnẹyịmavara mẹ mẹ̀ ẹ ọda yị ọ. 14Dị ọ va sị ụnọ araka ana aa sịị mẹ̀ ịsọvọ agụvị ebira odivi aza vẹ nị. Ịjị ọ raa sị ọ vẹ dị Eerọnị ọnịrị ezi anị sị ụvọ tụra a ịrẹsụ nị. 15Imosiisi ộ wụ ụnọ ọnọọ, dị ọ ka anị nị, ộ jị igege ngụ ọnọọ, dị ọ sị dá ọpanyị ụta ọnọọ ịnị ọgọgọ ẹyịna, ọnị ọ̀ sị sị ọtirenyi nị. Ộ sị ọnọọ ana vọ, dị ọ́ và a hi iruvo ụta ọnọọ nị. Aanị ọ́ mẹmẹ sị ụta ọnọọ tụ irenyi yị Ẹnẹyịmavara, dị ọ vara a ọnịnị nị. 16Ộ kụ ụhị ene ku ẹnya ịnịnẹ ụnọ ọnọọ beri ịpa ene hu ịnị ayị anị, dị ọ rẹ kụ ẹhụ anị vaka ụhị ẹnịnị, dị ọ rị wa ịra ịrẹsụ ụta nị. 17Ama, dị ọ sị ana vọ ịnị ụnọ ọnọọ: ụpa anị, uye anị ọnịrị iruvu anị jịnẹ tụ ẹhẹ hụrị udi ẹnịnị, dị ọ na rị ọ ịra anka Ẹnẹyịmavara mẹ mẹẹ ọda yọ nị. 18Ịjị Imosiisi sị ọsọnị mẹ, dị ọ va sị ịdẹba ana aa sị mẹ̀ ịsọvọ ana a rị ịra vẹ. Dị Eerọnị ọnịrị ezi anị sị ụvọ tụra a ịrẹsụ nị. 19Imosiisi ộ wụ ịdẹba ọnọọ, dị ọ và anị ku ụta ọnọọ jesi kara a ẹngụ-ẹngụ nị. 20Ịjị a sị ịdẹba ọnọọ vọ, dị Imosiisi kụ uye anị ọnịrị ịrẹsụ beri ụhị anị, dị ọ rị wa ịra nị. 21Á mẹ raà nyịna iruvu ịdẹba ọnọọ ọnịrị ahụ anị, dị Imosiisi na rị ana vọ ịra nị. Ịsị ịsọvọ ana a rị ịra aanị vị ịsọyịrị. Agụ anị ô hine Ẹnẹyịmavara. 22Imosiisi ọ̀ rẹ sị ịdẹba ọsa vẹ, ọnọnị vị ana aa sịị sị ọzaa rị ohirẹsụ irehi Ohomorihi, dị Eerọnị ọnịrị ezi anị sị ụvọ tụra a ịrẹsụ nị. 23Imosiisi ộ wụ ịdẹba ọnọnị, dị ọ sị ụvọ dá anị, dị ọ sị da Eerọnị ụtọ ụvọrị nị. Ộ rẹ sị da a igege ọbanyị ụvọrị ọnịrị igege ọbanyị ahụ ụvọrị anị. 24Â rẹ kụ ezi Eerọnị vẹ, dị Imosiisi sị ụvọ da ọnọọ, dị ọ sị dá wa ụtọ ụvọrị, igege ọbanyị ụvọrị ọnịrị igege ọbanyị ahụ ụvọha ẹnịnị nị. Dị Imosiisi sị ana vọ dị ọ vàa ku ụta jesi kara a ẹngụ-ẹngụ nị. 25Imosiisi ộ kụ ụhị ịnị ochomu ịdẹba ọnọọ ọnịrị ụhị ene kú ẹnya ịnịnẹ anị; dị ọ dà ịpa ene zoza hu kere-kere ịnị ayị anị, ẹhụ anị vaka ụhị ẹnịnị ọnịrị ahụ ụvọrị ịdẹba ọnọọ nị. 26Â nyị ịbụrẹdị ọnị ọza ẹ̀ yị sị owu tụ ana a sị va yị Ẹnẹyịmavara dị a kụ ọ hi ini uji tịtẹ. Dị Imosiisi sị ọnyara ana a sị angwẹ po a maa mẹ̀ ẹ, dị ọ rẹ sị Ịbụrẹẹdị hẹvẹ-hẹvẹ ọnyara dị ọ kụ wa tụra ụhị ọnọnị ọnịrị ahụ ịdẹba ọnọnị nị. 27Imosiisi ộ kụ avaba ịsọyịrị ẹnẹnị chire Eerọnị ọnịrị ezi anịị ụvọ, dị ẹnịnị sị ọ vẹ anka ẹyịza ụnarenyi ẹnẹ ẹ sị va yị Ẹnẹyịmavara nị. 28Dị Imosiisi dọ wa ịsọyịrị ọnọnị, dị ọ sị tụra ịsị ịsọvọ ana aā rị ịra, dị ọ rị wa ịra ịrẹsụ ụta nị. Ịsị ịsọvọ ana a sị sị wa rị ohirẹsụ irehi Ohomorihi ọsọnị vị nị, agụ anị ô hine Ẹnẹyịmavara ẹtẹẹtẹrẹ. 29Imosiisi ộ sị ịrachị ịdẹba ana a sị mẹ̀ ịsọvọ aanị, dị ọ sị ọ tụ́ ẹba, dị o mí ọ ọvịdị Ẹnẹyịmavara anka ẹyịza oturenyi nị. Ịpa ene tu Imosiisi ịnị ịdẹba ana a sị mẹ̀ ịsọvọ aanị ọ vị ọnọọ nị. Avọọ gẹdẹ-gẹdẹ Ẹnẹyịmavara mẹ mẹẹ ọdaa yọ nị. 30Imosiisi ộ sị eturare ọnịrị ana ya ịrẹsụ ụta, dị o po o vabẹ, dị o che e sẹ Eerọnị ọnịrị ezi anị ẹngụ, dị o re che e sẹ ịta ẹnịnị nị. Ọsọnị ọ sị sị wa ọnịrị ịta ẹnịnị tụ irenyi yị Ẹnẹyịmavara nị. 31Imosiisi ộ kà a yị Eerọnị ọnịrị ezi anị ka, ẹ̀ sị uye ịsị ịsọvọ ọnọnị nọ enoze ajẹngụ Ẹnẹyịmavara, dị ẹ̀ chịnẹ ẹ ịzọọ. Ẹ̀ẹ sị ọ chịnẹ, dị ẹ̀ rị ọnịrị ịbụrẹdị ana yà ịnị uji ịsị ịsọvọ ana a sịị̄ sị ọzaa rị ohirẹsụ irehi Ohomorihi ịzọọ, anka Ẹnẹyịmavara mẹ mẹ̀ ẹ ọda. 32Ana àa vẹtẹ ịnị uye ọnịrị ịbụrẹdị ọnọọ, ẹnịnị ẹ̀ rị ọ ịra. 33Ọ kà, asị ẹnịnị hụrị enoze ajẹngụ Ẹnẹyịmavara pooro dị ẹkụhị ịhịmba ọ̀ mẹ, dị à mẹ avaba ịsị ana a sịị̄ sị ọzaa rị ohirẹsụ irehi Ohomorihi gụ. 34Imosiisi ka, Ẹnẹyịmavara ọ mẹ̀ ẹ ọda ka ya mẹ avaba ịsị ọnị ị maanị mẹ ajịnị aanị nị, agụvị dị a sị sị ịvị awụ nịnị kwooze nị. 35Enoze ajẹngụ Ẹnẹyịmavara ụ́ vaa yà nịnị ọọdụ ọnịrị ịrahụ pooro dị ẹkụhị ịhịmba ọ mẹ nị, dị waa mẹ ịsị ọnị Ẹnẹyịmavara mẹ ọda anị yị wụ nịnị. Wẹ̀ yị vavọọ mẹ̀ ẹ nịnị, u wee sú nịnị nị o. Aanị Ẹnẹyịmavara mẹ mẹ̀ ẹ ọda yị mị nị. 36Dị Eerọnị ọnịrị ezi anị mẹ avaba ịsị Ẹnẹyịmavara mẹ ọda anị yị Imosiisi nị.

Currently Selected:

Ireevi 8: EBTP

Highlight

Copy