Ireevi 7
7
Ịsọvọ ọyị vọrọ ọza jị oze
(Ire 5.14-19)
1Ọda ẹnẹnị a vaa sị mẹ̀ ịsọvọ ọyị si ụta varẹma nị. Ịsa Ohomorihi ịnya kẹnẹ ọ vị nị. 2Ịsụpa ana àa sịị mẹ̀ ịsọvọ ọnọnị vị ana á vaa wụ̀ eyi ẹbẹẹba ụta ịsọvọ, eyi ọnọọ á yaa wụ̀ ịsụpa ịsọvọ ana aā rị ịra nị. Anya anị vị ana a vaa vaku akaha ụta ịsọvọ ọnọọ eyi ẹyịna. 3Àa sị uye ọnọnị wụ, a vaa kụ avaba ụhị ene hi ịnị anị, ụhị ini ochomu anị ọnịrị ụhị ene ku ẹnya ịnịnẹ anị, dị a rị ọ ịra ịrẹsụ ụta. 4Ẹhụ anị ẹyịva ọnịrị ụhị ana kara wa ịnị ọtẹ anị vị ana a vaa kụ́ụ beri ịpa ene hu kere-kere ịnị ayị uye ọnọọ. 5Ohirẹsụ irehi Ohomorihi vaa rị avaba ụhị ọnọọ ịra ịrẹsụ ụta anka ịsa ịsọvọọ yị Ẹnẹyịmavara. Ịsa ịsọvọ oyi si ụta varẹma ọ vị nị. 6Ezi ọnọrụ hụụnị ovwoovu ohirẹsụ irehi Ohomorihi nịnị ẹ vaa rị uye ọnọnị ana vọ nị. Ịsa Ohomorihi ọ vị̀ nị, agụvị avọọ aha ana a kà yàa rị ọ, a vaa yaa rị ọ nị. 7Ịsị a sị mẹ̀ ịsọvọ ịvị aza ọnịrị ịsa ịsọvọ ọ̀yị sí ụta varẹma vị ọnyọọnya, ọda ọnyọọnya ọ za ẹnị ẹyịva nị. Ohirẹsụ irehi Ohomorihi ana sị wa vẹ ịrẹsụ ụta, ọ nyị uye anị nị. 8Ohirẹsụ irehi Ohomorihi ene èe pe ọza ọnyọọnyị mẹ̀ ịsọvọ ana aa rị ịra ọ vaa nyị ịtụmpaha uye ana a sị va mẹ̀ ịsọvọ ọnọọ nị. 9Ọza ọ̀ọ sị ayị ana a sịị̄ mẹ ịbụrẹdị à vị ana a sị jị akara va mẹ̀ ịsọvọ, ohirẹsụ irehi Ohomorihi ene èe pe e mẹ̀ ẹ, ọ nyị ịsọyịrị ọnọọ ana a sị va yị Ohomorihi nị. 10Ọza ọ̀ọ sị́ ịsọyịrị ana a sị́ angwẹ hura va mẹ̀ ịsọvọ, oo zee eyi asị a sị angwẹ hụra a, avaba evere Eerọnị ana vị ohirẹsụ irehi Ohomorihi ẹ nyị ịsọyịrị ọnọọ nị. Ẹbẹẹbẹ ẹnịnị vaa gà a nị.
Anisirẹrị nịnị aa mẹ̀ ịsọvọ ọyị pe Ohomorihi mẹ uzee
11Ẹnẹyịmavara kà, ọda ẹnẹnị a vaa sị mẹ̀ ịsọvọ ọ̀yị pe ọnị varẹma mẹ uzee nị. 12Àa vị ọza aa mẹ̀ ịsọvọ ọnọnị ọ̀yị ku Ohomorihi avọ nị, ọ vaa sị ịbụrẹdị ọnị ọza ẹ̀ yị sị owu tụụ vaka ịsụpa ana a sị va mẹ̀ ịsọvọ ọnọnị. Ọ zụ vị ịbụrẹdị ọrata ana a sị angwẹ orivi po ayị ana a sị mẹ̀ ẹ, ọ zụ vị Ịbụrẹẹdị hẹvẹ-hẹvẹ aanị ana a dá angwẹ orivi sisi, ọ rẹ zụ vị Ịbụrẹẹdị ana a sị angwẹ orivi po ayị anị ẹtẹẹtẹrẹ. 13Ọza ọnọọ rẹ vaa sị ịbụrẹdị ana a sị owu tụụ vaka ịsa ịsọvọ ọnị ọ sị va kụ avọ aanị. 14Ọza ọnọọ vaa sị ikonyi ikonya hụụnị ịbụrẹdị irenyi-irenyi ẹnẹnịị mẹ̀ ịsọvọ hi Ẹnẹyịmavara. Ohirẹsụ irehi Ohomorihi ene chi ịsụpa ana a sị mẹ̀ ịsọvọ aanị ku ụta ịsọvọ ọ nyị ịsọyịrị ẹnẹẹ nị. 15Ịhị ana a va mẹ̀ ịsọvọ ọ̀yị kụ Ohomorihi avọ aanị, a vaa rị uye ịsụpa ana a sị mẹ̀ ịsọvọ ọnọọ nị. Ọza ẹ̀ yị vaa ẹnyẹẹnyị ịnị anịị tu ẹnẹnẹ eyinẹhẹ anị. 16Ọza ọ̀ọ mẹ̀ ịsọvọ ọ̀yị pe Ohomorihi varẹma mẹ uzee, dị ahịka vị ọ mẹẹ ọ̀ yị sị va mẹ ịsị ọ kà a yị Ohomorihi ka ọnị vaa mẹ nị, àa vị ayị anị sị ọ kẹnẹ dị ọ mẹ nị, ọza ẹ̀ yị rị avaba uye anị ta ịhị ọnọọ ẹ́ yị nyị ọ mẹ ka. Ana àa vọ, a zụ rị ọ ẹnẹnẹ eyinẹhẹ anị. 17Ama uye ịsọvọ ọnọọ ọ̀ọ vọ tu ịhyẹgwẹta anị, à rị ọ ịra. 18Uye ịsọvọ ọnọnị ọ̀ọ mẹ ẹkụhị ẹẹta, dị a kụkụ ị rị ọ nị, Ohomorihi ẹ́ yị vaa dọ ịsọvọ ọnị ọza ọnọọ mẹ. Ẹ́ yị rẹ vaa zá a ịrịkaa tụ ịnị ọyịzaa yị ọ. Enyisi ọ vaa vị nị. Ọza ana àa rị ọ, vaa rị ụya anị nị. 19Uye ọnọnị ọ̀ọ kanyị ịsị ẹnẹ ẹ̀ yị nị, asị a kụkụ rị ọ. À rị ọ ịra. Aza anaaa nị, ẹ zụ rị uye ọnọnị. 20Ama ọza ẹnẹ ẹ̀ yị nị, ọ̀ọ rị uye ana a sị mẹ̀ ịsọvọ ọ̀yị pe Ohomorihi varẹma me uzee aanị, ọza ẹ̀ yị ma vana za a ịrịka vaka aza Ohomorihi. 21Ọza ọnyọọnyị ọ̀ọ kanyị ịsị ẹnẹ ẹ̀ yị nị, ọ̀ọ vị ịsị ịnị ẹngụ ọza, ọ̀ọ vị ịsụpa ẹnẹ ẹ̀ yị nị, ọ̀ọ vị ịsị eenyisi ọnyọọnyị, dị ọ va rị uye ịsụpa ana a sị mẹ̀ ịsọvọ ka è si pe Ohomorihi mẹ uzee aanị nị, ọza ẹ̀ yị ma vana za ọza ọnọọ ịrịka vaka aza Ohomorihi. 22Ẹnẹyịmavara ộ mẹ̀ ọda ọnọnị yị Imosiisi ka, 23Ọ̀ kà a yị Anisirẹrị nịnị ka, a sị ẹnịnị rị ụhị ụnọ (imaaru), ọọ vị atẹmẹ avị ẹvụ. 24Ọ kà, ịsụpa enee sú yị ẹngụ anị, à vị ka uye ịnị avị ọsa ọ wụ̀ ọ nị, a sị ẹnịnị rị ụhị anị o. Ẹnịnị ẹ zụ sị ụhị anị mẹ ịsị ọsa. 25Ọza ana àa rị ụhị ịsụpa ana vọrọ ka a sị mẹ̀ ịsọvọ yị Ẹnẹyịmavara, dị à rị ọ ịra, ọza ẹ̀ yị ma vana za ọza ọnọọ ịrịka vaka aza Ohomorihi. 26#Oyn 9.4; Ire 17.10-14; 19.26; Ọda 12.16,23; 15.23Hù avọ hu avọọ bẹẹ, ahatụraha aha ana Anisirẹrị ọnyọọnyị ọọ ra, a sị ọ na rị inomi nịnị, a sị ọ rị ịsụpa ọnyọọnyị o. 27Ọza tụra ọza ana àa rị ịsụpa, ọza ẹ́ yị ma vana zá a ịrịka vaka aza Ohomorihi. 28Ẹnẹyịmavara ộ kà a yị Imosiisi ka, 29Ọ̀ kà a yị Anisirẹrị nịnị ka, ọza tụra ọza ana àa va mẹ̀ ịsọvọ ọ̀ yị pe Ohomorihi varẹma mẹ uzee, ọ̀ dà hụụnị anị va mẹ ẹyịza ụnarenyi yị Ẹnẹyịmavara. 30Ọnị ụvọta vaa sị ọ vẹ anka ịsọyịrị ana a sị va mẹ̀ ịsọvọ. Ọ vaa kụ́ ụhị ọnịrị ịrẹva ịsụpa ọnị ọ́ sị va mẹ̀ ịsọvọ aanị vaa yị Ẹnẹyịmavara anka ẹyịza ụnarenyi. 31Ohirẹsụ irehi Ohomorihi vaa rị ụhị ọnọnị ịra ịrẹsụ ụta ịsọvọ, ama ịrẹva ịsụpa ọnọnị vị ana a vaa sịị yị avaba ẹnị ohirẹsụ irehi Ohomorihi nịnị. 32Ẹnẹyịmavara usi eyi ụvọrị ịsụpa ana a sị va mẹ̀ ịsọvọ aanị vị ana a vaa sịị yị ohirẹsụ irehi Ohomorihi ene pe ọza ọnọọ mẹ̀ ịsọvọ anị. Ẹyịza ụnarenyi ọ vị nị. 33Ohirẹsụ irehi Ohomorihi ana sị ọnịrị ụhị mẹ̀ ịsọvọ yị ọza ana va mẹ̀ ịsọvọ ọ vaa nyị usi eyi ụvọrị ịsụpa ọnọọ nị. 34Ịrẹva ịsụpa ana a sị vaa mẹ̀ ịsọvọ aanị vị ẹyịza ụnarenyi, dị usi eyi ụvọrị ịsụpa ọnọọ vị ịsa ọgụvọ ụnarenyi ọnị Ẹnẹyịmavara dọ Anisirẹrị nịnị, dị ọ sị ẹnị ohirẹsụ irehi Ohomorihi nị. Aanị Anisirẹrị nịnị mẹ vaa sị ọsọnịị yị ohirẹsụ irehi Ohomorihi nịnị pooro nị. 35Ịpa ọnọnị ịnị ịsọyịrị ana a sị va yị Ẹnẹyịmavara a sị yị Eerọnị ọnịrị ezi anị hụrị ịhị ana a nyị wa ka ẹ̀ vị ohirẹsụ irehi Ohomorihi nị. 36Ịhị ọnọọ Ẹnẹyịmavara mẹ̀ ẹ ọda yị Anisirẹrị nịnị ka ịpa ọnọọ ọ vị ọnyịrẹva ohirẹsụ irehi Ohomorihi nịnị hụụnị ịsị a sị va yị ọnị nị. Avọọ ẹ́ mẹ vaa mẹẹ pooro nị. 37Ẹsẹnị ẹ vị ọda ana á vaa sị mẹ̀ ịsọvọ ana a rị avaba anịị ịra nị, ịsọvọ ịsọyịrị, ịsọvọ ana aa mẹ agụvị ebira odivi aza, ọnịrị ịsọvọ ọ̀yị sí ụta varẹma. Ọda ẹnịnị ọnyọọnya á rẹ vaa sị mẹ̀ ịsọvọ àaa sị ọzaa rị ohirẹsụ irehi Ohomorihi, ọnịrị ịsọvọ ọyị pe Ohomorihi varẹma mẹ uzee nị. 38Ịrẹsụ ataba Ịsịnayị ịnị ụnọmị ịzọọ, Ẹnẹyịmavara ya sị ọda ẹnẹnị yị Imosiisi nị, ịhị ọnọọ ọ kà a yị Anisirẹrị nịnị ka ẹnịnị ẹ̀ va mẹ̀ ịsọvọ ẹnịnị nị.
Currently Selected:
Ireevi 7: EBTP
Highlight
Share
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
