Ireevi 3
3
Ịsa ịsọvọ ọyị pe Ohomorihi mẹ uzee.
1Ọza ọ̀ọ sị ịsụpa aa vaa mẹ̀ ịsọvọ agụvị ọnị rị Ohomorihi ọ̀ nyị uzee, ọ sị ọ hụụnị ịsụpa ana aa pa. Ọ̀ọ vị ụnọ araka, ọ̀ọ vị ọnẹẹ, asị ọ vị ana tụ ọkụmị. 2Ọza ọnọọ vaa sị ụvọ tụra ịsụpa ọnọọ ịrẹsụ, dị ọ wụ̀ ọ enoze ajẹngụ Ẹnẹyịmavara. Ẹnị ezi Eerọnị ana vị ohirẹsụ irehi Ohomorihi vee che anị sẹ ụta ịsọvọ eyi ẹnyị eyi ọsa, 3dị ọ kụ avaba ụhị ana ya ịnị ẹnya ịnịnẹ anị vẹ anka ịsị ịsọvọ ana a sị va yị Ẹnẹyịmavara, 4dị ọ́ rẹ sị ẹhụ anị ẹyịva beri ụhị ana vaka wa ọnịrị ịpa ene hu ịnị ayị uye ọnọọ vaka a vẹ. 5Ohirẹsụ irehi Ohomorihi nịnị vaa sị avaba ọsọnị ọnịrị ịsị ịsọvọ ana aā rị ịra, dị ọ rị wa ịra ịrẹsụ ụta Agụ ịsị ịsọvọ ọnọnị vị eneē hine Ẹnẹyịmavara. 6Àa vị atẹmẹ à vị ẹvụ, ọ̀ọ va vị ịdẹba à vị ịdẹ ọza ka ọnị aa sịị mẹ̀ ịsọvọ ọnọnị nị, asị ọ vị ana tụ ọkụmị. 7Àa vị ozi atẹmẹ ọza sị aa vaa mẹ̀ ịsọvọ nị, 8ọ vaa sị ụvọ tụra a ịrẹsụ, dị ọ wụ̀ ọ ọvịdị ajẹngụ Ẹnẹyịmavara, ohirẹsụ irehi Ohomorihi nịnị vee che anị sẹ ụta ịsọvọ eyi ẹnyị eyi ọsa 9dị ọ va ku ịsa ẹnẹnị hụụnị ịsụpa ọnọọ vẹ ana a vaa rị ịra anka ịsị ịsọvọ ana sị va yị Ẹnẹyịmavara: ụhị ana kụ hụụnị ochomu anị, ụhị ana aa kụ hụrị ọgụrị ẹchụkụ ịrẹma anị, ọnịrị avaba ụhị ene ku ẹnya ịnịnẹ anị, 10ọ rẹ vaa sị ẹhụ anị ẹyịva beri ụhị ana vaka wa ọnịrị ịpa ene hu ịnị ayị uye ọnọọ vaka waa vẹ 11Dị Ohirẹsụ irehi Ohomorihi anaa mẹ̀ ụkọrọ ụmẹ ọnọọ rị avaba ẹsẹnị ịra ịrẹsụ ụta anka ịsọyịrị ana sị̀ va mẹ̀ ịsọvọ yị Ẹnẹyịmavara. 12Àa vị ẹvụ ọza sị aa vaa mẹ̀ ịsọvọ nị, 13ọ vaa sị ụvọ tụra ịrẹsụ, dị ọ wụ̀ ọ ọvịdị ajẹngụ Ẹnẹyịmavara ohirẹsụ irehi Ohomorihi nịnị vee che anị sẹ ụta ịsọvọ eyi ẹnyị eyi ọsa 14dị ọ kụ ịsa ẹnẹnị hụụnị ịsụpa ọnọọ vẹ ana a vaa rị ịra anka ịsị ịsọvọ ana a sị va yị Ẹnẹyịmavara: avaba ụhị ana ya ịnị ẹnya ịnịnẹ anị, 15ẹhụ anị ẹyịva beri ụhị ana vaka wa ọnịrị ịpa ene hu ịnị ayị uye ọnọọ, 16Ohirẹsụ irehi Ohomorihi vaa rị avaba ọsọnị ịra ịrẹsụ ụta anka ịsọyịrị ana a sị va mẹ̀ ịsọvọ yị Ẹnẹyịmavara dị o hine e. Ẹnẹyịmavara ọ nyị avaba ụhị ọnọọ nị. 17Ọsọnị ọ̀ vị ọda ọnị avaba Anisirẹrị nịnị vaa saasa pooro aha tụra aha ẹnẹ ẹ̀ẹ ra nị. A sị ẹ na rị ụhị ịsụpa avị ọnyọọnyị o.
Currently Selected:
Ireevi 3: EBTP
Highlight
Share
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
