Ireevi 2
2
Ịsọvọ ana aā sị akụụ mẹ
1Ọza ọnyọọnyị ọ̀ọ sị ẹ̀hụ́ akụ avọọ aa vaa mẹ̀ ịsọvọ hi Ẹnẹyịmavara, aa nyị ka ọza ọnọọ ọ̀ kwọ̀ ọ dị ọ̀ vị́ ẹtẹẹtẹrẹ. Ọza ọnọọ vaa và angwẹ hi ọ ịrẹsụ, dị ọ rẹ sị eturare anaa dà agụ ohine àa ka a hi ịra vaka a, 2dị ọ sị ọ ve tu ezi Eerọnị nịnị ana vị ohirẹsụ irehi Ohomorihi, ohirẹsụ irehi Ohomorihi anaa mẹ̀ ụkọrọ ụmẹ ọnọọ vaa ká ayị ọyịkwọ ọnịrị angwẹ ọnọọ uvoku ọnya beri avaba eturare ọnọọ, dị ọ rị wa ịra ịrẹsụ ụta ịsọvọ. Ọnọọ vaa sịị zụ̀ ka avaba anị asị va yị Ẹnẹyịmavara nị. Agụ ịsị ịsọvọ ọnọnị vị eneē hine Ẹnẹyịmavara. 3Ịsị ẹẹ vọ ịnị ịsọyịrị ana sị va mẹ̀ ịsọvọ aanị vị ẹẹnị ohirẹsụ irehi Ohomorihi. Ịsa Ohomorihi ọ vị nị agụvị ka ana vọ ẹtẹ ịnị ịsọyịrị ana sị va mẹ̀ ịsọvọ yị Ẹnẹyịmavara yọ nị. 4Àa vị ịbụrẹdị ọza sị aa vaa mẹ̀ ịsọvọ nị, asị a sị owu tụ ịnị anị. Ọ zụ vị ịbụrẹdị ana sị angwẹ va hura ayị mẹ, ọ rẹ zụ vị Ịbụrẹẹdị ana jị pẹtẹ-pẹtẹ dị a da angwẹ sisi ọ kẹnẹ. 5Àa vị ịbụrẹdị ana sị ịchacha pata anaā sịị mẹ̀ ịsa mẹ yọ nị, à sị angwẹ vahụra ayị kẹnẹ mẹ̀ ẹ, dị à sị ọ nyị owu. 6Wàaa sị ọ vẹ vaa mẹ̀ ịsọvọ, ụ dà a wuri-wuri, dị a và angwẹ ọnọọ hi ọ. 7Àa vị ịbụrẹdị ana asị ịchacha ana sịị̄ mẹ̀ ịsa mẹ, ọza aa sị vaa mẹ̀ ịsọvọ nị, à sị ayị ọnịrị angwẹ orivi mẹ̀ ẹ. 8A vaa sị ịbụrẹdị ana maanị sị ịsa ẹnẹnị mẹ aanị vaa yị Ẹnẹyịmavara. Àa raa sị ọ yị ohirẹsụ irehi Ohomorihi, dị ọọ sị ọ vẹ ịnị ụta ịsọvọ. 9Ohirẹsụ irehi Ohomorihi ọnọọ vaa dàa hụụnị ịbụrẹdị ọnọọ ana vaa sị zụ ka avaba anị a sị va yị Ẹnẹyịmavara nị. Dị ọ rị ọ ịra ịrẹsụ ụta ịsọvọ. Agụ ịsị ịsọvọ ọnọọ vị eneē hine Ẹnẹyịmavara. 10Ịsị ẹ̀ẹ vọ ịnị ịbụrẹdị ana sị va mẹ̀ ịsọvọ aanị vị ẹẹnị ohirẹsụ irehi Ohomorihi. Ịsa Ohomorihi ọ vị nị agụvị ka ana vọ ẹtẹ ịnị ịsọyịrị ana sị va mẹ̀ ịsọvọ yị Ẹnẹyịmavara yọ nị. 11Asị a nyị ịbụrẹdị ana a sị a vaa yị Ẹnẹyịmavara, dị a sị owu tụ ọ. Wẹ yị nyayịnẹ sị owu avị ẹhụ tụ ịnị ịsọyịrị ana aa sị va yị Ẹnẹyịmavara; ka ẹ́ yị nyị ịsa ana a sị owu à vị ẹhụ tụ ana aa rị ịra yị Ẹnẹyịmavara. 12Wa zụ sị akụ ịpaapa ọnị ụ sị hụụnị aarẹ awụ, ọnịrị owu avị ẹhụ va yị Ẹnẹyịmavara ama a sị a rị ọ ịra ịrẹsụ ụta ịsọvọ ka ọ̀ da agụ ohine hi Ẹnẹyịmavara. 13Asị a nyị ka wẹ yị sị anọ tụ ịnị avaba ịsọyịrị ọnị wàaa sịị va yị Ẹnẹyịmavara nịnị, agụvị ka anọ ọ jẹẹ yị oto ọnị ẹwụrị Ohomorihi awụ nịnị hị́ eku anị yị ẹngụ nị. 14Wàa ha apaapa ịpaapa hụụnị aarẹ awụ nịnị aa vaa yị Ẹnẹyịmavara, wara a nịnị dị à varẹma kwọ̀ ọ. 15Dị ụ sị angwẹ ovivi ọnịrị eturare ohuru-ohuru ana aā kà a tụ ịnị ịra vaka a nịnị. 16Dị ohirẹsụ irehi Ohomorihi sị hụụnị ịsa ọnọọ ọnịrị angwẹ ọyị tamayị, beri avaba eturare ọnọọ dị ọ rị wa ịra anka ịsọyịrị ana sị va mẹ̀ ịsọvọ yị Ẹnẹyịmavara.
Currently Selected:
Ireevi 2: EBTP
Highlight
Share
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
