Ireevi 26

Aha ana ya ịnị ọ̀yị saasa ịrẹyị Ohomorihi

(Ọda 7.12-24; 28.1-14)

1 # Ire 19.4; Kụra 20.4; Ọda 5.8; 16.21,22; 27.1 Ẹnẹyịmavara ộ kà a yị Anisirẹrị nịnị ka, à sị ẹnịnị mẹ ori nịnị yị ẹngụ ẹnịnị o. À sị ẹ sị ụmọmọ ịsa ọnyọọnyị jẹẹ, à sị ẹ́ sị ịrẹta mẹ ọhẹ jẹẹ, à vị ka ẹ̀ bẹ́ ịrẹta jẹẹ ịnị ẹtẹ ẹnịnị dị ẹẹ vàa ku ẹtẹẹ yị ọ o, agụvị ka ọnị ọ vị Ẹnẹyịmavara Ohomorihi ẹnịnị nị. 2Ọ kà ẹnịnị ẹ̀ sị ụvọ za ịrẹyị ẹkụhị ụhwọtụ anị nịnị dị ẹ̀ sị ụbanyị yị aha ana a yaa hẹkẹ ọnị. Ọnị ọ vị Ẹnẹyịmavara nị. 3#Ọda 11.13-15; 28.1-14Ẹnịnị àa ra ẹhẹ ẹnịnị ọnị mẹ kà a yị wa, dị ẹ́ yaa saasa ọda anị nị, 4ịjọnọọ, ọnị vaa zụ̀ orihii yị wa ịnị ụmẹ anị, dị ẹtẹ ọnọọ aa mẹ̀ ịsaa yị wa, dị ọchị ene hi ịnị aarẹ ẹnị raa tụ ẹtụtụ ẹnịnị. 5Ọ kà ịsa ịnị aarẹ ẹnịnị vaa rụrụ ẹtẹẹtẹrẹ dị ahịka vị ẹnịnị aa kụ waa gụ pooro dị o tù ụmẹ ana aa sịị há igirepi nị. Igirepi ẹnịnị vị ẹnẹ ẹ́ vaa ha pooro nee tu ụmẹ enee sii chire ịsa. Ẹnịnị vị ana vaa rị ịsa dị ịnẹ ha wa, dị ẹ rá ịnị ẹtẹ ẹnịnị dị ẹ́ yị nyị ịsị ẹ mẹ̀ wa. 6Ọ kà ọnị vaa sị ẹngwọọrọọ yị wa ịnị ẹtẹ ẹnịnị. Ẹnịnị vaa sụ̀ ara, dị ẹ́ yị nyị ịsị e vee chire wa angwa. Ọnị vaa dụ uye edivi-edivi hụụnị ẹtẹ ẹnịnị. Ọnịvị ẹnịnị ẹ yị ma vana kụ ịrẹkụ ve tu wa ịnị avaba ẹtẹ ẹnịnị. 7Ẹnẹyịmavara kà ọnịvị ẹnịnị vị ẹnẹ ẹ́ vaa dụ, dị ẹyaa hyẹdụ hi ẹtẹ ọvịdị ẹnịnị eyi ịrẹkụ. 8Aza ẹnị ẹẹhị ẹnịnị vaa dụ ọnịvị ẹnịnị ẹchẹhị, dị aza ẹnị ẹchẹhị ẹnịnị dụ ọnịvị ẹnịnị akahị-akahị oze ẹẹwụ. Ọnịvị vị ana vaa hyẹdụụ yị wa eyi ịrẹkụ. 9Ọ kà ọnị vaa mẹ ọyịzaa yị wa, dị ẹ yaa rụrụụ hu avọọ. Ọnị vaa mẹ ana vị aanị ịnị ịrẹyị ọnị ọnịrị wa hị́ eku yị ẹngụ tụ. 10Ịsa ẹnẹ ẹ́ vaa kụụ hụụnị aarẹ vaa rụrụ ẹtẹẹtẹrẹ, dị ẹ rị ọ mẹ ịrayị ọyịvụrụ. Vị́ ẹnịnị vaa kụ́ ịsa ọkụkụ ana vẹtẹẹ kwooze, di è ré aha kụ ịsa ọwọọwa hi nị. 11Ọnị vaa rá ịnị ajẹngụ anịị pe wa; dị ọnị ẹ́ yị ma vana và hụrẹ wa ẹngụ. 12#2 Ịkọ 6.16Ọnị vaa raa pe wa; ọnị vaa vị Ohomorihi ẹnịnị, dị ẹnịnị vị aza anị. 13Ọ kà ọnị, Ẹnẹyịmavara Ohomorihi ẹnịnị ọ kụ́ wa hụrị ẹtẹ Ijipiti ka à sị ẹ kụkụ vị ọrịhị ẹnịnị nị. Ọnị ộ dọ wa hụrị aza ana sị ụkata za wa hi ẹtẹ, dị ọnị mẹ kụ̀ra ịrẹsụ tụ ẹba dị ẹẹ zị ụsẹ nị.

Ụya Akamawụ

(Ọda 28.15-68)

14 # Ọda 28.15-68 Ẹnẹyịmavara kà, ẹnịnị ẹ̀ yị saasa ịrẹyị anị, dị ẹnịnị ẹ̀ yị saasa avaba ọda anị nị, 15Ẹnịnị èe yi ka ẹnị ẹ́ yị saasa ọda anị, dị ẹnịnị ẹ̀ yị saasa ịrẹyị ọnị ọnịrị wa hị́ eku yị ẹngụ tụ nị, 16Ụya ọnị vaa sị rị wa yị: Ọnị vaa kụ ẹngụkata odivii tù wa; ụkụ ẹnẹ ẹ̀ yị ma wụ́ ahọ̀nọ ọnịrị ọvanggoro ene vee gù wa eyi vaa za wa, dị ee du wa ẹhẹẹ ha. Ọ kà ịrụkụ ọọhẹ ẹ́ vaa kụ nị, agụvị ka, ọnịvị ẹnịnị ẹ vaa rị ịsa ịnị aarẹ ẹnịnị nị. 17Ọ kà ọnị vaa và eyirazịị ka wa; dị ọnịvị ẹnịnị nyị ẹbẹẹba ẹnịnị; aza anaa nyị ịhyẹrẹ ẹnịnị ẹ vaa mẹ ịjọva tụra wa ịrẹsụ nị. Angwa vee hí wa nee tu ka ẹnịnị vị ene vee zwe ẹ̀ yị daka nyị ọza anaa dụ wa. 18Ọnị ọ̀ọ maanị yị sị wa mẹ̀ dị ẹnịnị ẹ̀ yị saasa ịrẹyị anị nị, ọnị vaa dàa tụ ịnị ụyaa yị wa oze ịhịmba. 19Ọ kà ọnị vaa gara ụkata ẹnẹ ẹnịnị vavọọ è sii wùu zị avọọ ha; ọnị vaa mẹ ka à sị orihi zụ̀ yị wa, dị ẹtẹ ẹnịnị wụ, dị ọ katẹngụ anka enyusẹ avọọ. 20Avaba ụkọrọ ẹnẹ ẹyaa sị ụmẹzụ-ụmẹzụụ mẹ vị ana vaa vị osusu, agụvị ka ẹtẹ ẹnịnị ẹ́ yị vaa mẹ̀ ịsa ọchị ẹnịnị ẹ́ yị rẹ vaa tụ́ ẹtụtụ. 21Ẹnẹyịmavara kà ẹnịnị ẹ̀ẹ kị ka ẹnị ẹ́ yị dọ yị ọnị, dị ẹnịnị yi ka ẹnị ẹ́ yị wụ́ chire ọnị nị, ọnị rẹ vaa varẹma dàa tụ ịnị ụyaa yị wa oze ịhịmba. 22Ọ kà ọnị vaa tụ uye edivi vaa ngụ ịnị akakana ẹnịnị, dị ẹ wụ ezi ẹnịnị va ha. E vee vú ịsụpa ẹnịnị ẹtẹ, dị ahịka aza che ẹ kụkụ vọ nị. Ọsọnị vaa mẹ ka oze ẹnịnị ẹ̀ tụ osusu. 23Ọnị ọ̀ọ maanị ị raa sị avaba ụya ọnọnị rị wa dị ẹnịnị ẹ̀ẹ yị wụ́ ịrẹyị anị, ama dị ẹyaa yịị mẹ̀ ịsa ọnị ọnị è yi sì nị, 24ọnị rẹ vaa mẹ̀ ịsa ọnị ẹnịnị è yi sii hị́ wa ọnị ụvọta vaa sị ụyaa ọkatẹngụụ rị wa huni avọọ oze ịhịmba. 25Ọ kà ọnị vaa kụ ịrẹkụụ tù wa, dị ọnị sị sị ụya rị wa agụvị ka ẹnịnị ẹ́ yị saasa ịrẹyị ọnị ọnịrị wa hị́ eku yị ẹngụ tụ. Ẹnịnị ẹ̀ẹ kụ ẹngụ tụ ịnị ẹkụra ẹnịnị ka à sị a nyị ịsẹ mẹ ẹnị, ọnị vaa tụ wa ụkụ ẹnẹ ẹ̀ yị ma wụ ahọ̀nọ. Ọnọọ ọ vaa mẹ ka ẹnịnị ẹ̀ hụrẹ ẹngụ ẹnịnị ụvọ yị ọnịvị ẹnịnị nị. 26Ẹnẹyịmavara kà ọnị vee gù wa oze ịsọyịrị ẹnịnị, dị ọnyẹnẹẹ ẹẹwụ aa mẹ̀ ịsa ịnị arasị ọnya. Dị a kụkụ aa gà ịsọyịrị swẹ-swẹ tụ wa ụvọ. Ẹnịnị ẹ̀ẹ rị ọ, ịnẹ ẹ́ yị vaa há wa. 27Ọ kà ọnị ọ̀ọ maanị ị raa sị avaba ụya ọnọnị rị wa, dị ẹnịnị ẹ̀ẹ yị wụ́ ịrẹyị anị, ama dị ẹyaa yịị mẹ̀ ịsa ọnị ọnị è yi sì nị. 28Ọnị rẹ vaa mẹ̀ ịsa ọnị ẹnịnị è yi sii hi wa, dị ọnị ụvọta sị ụya ịvị ẹnịnị rị wa hu avọ oze ịhịmba. 29Ọ kà ụngwẹ ana vaa kụ̀ wa vaa banyị ẹtẹẹtẹrẹ, dị ọ mẹ ka ẹnịnị ẹẹ wụ ezi ẹnịnịị rị. 30Ọ kà ịzị ẹyaa mẹ ahẹkẹ ịrẹsụ ataba vị ọnị ọnị vaa garaa ha, dị ọnị che ụta ẹnẹ ẹẹ̄ rị eturare ịra ịnị anịị va ha. Oku ẹnịnị vị ọnị ọnị vee ne vàa ku ori ẹnịnị ịrẹsụ. Ẹnịnị vị anaā vana nyị ọnị ịhyẹrẹ 31avọọ, ọnị vaa jị ẹkụra ẹnịnị eburu, dị ọnị gara ịzị ẹyaa mẹ ahẹkẹẹ ha. Ọnị ẹ́ yị kụkụ vaa dọ ịsọvọ ẹnịnị. 32Ẹnẹyịmavara kà ọnị vee vú ẹtẹ ẹnịnị ẹtẹ saka-saka dị evu-ẹtẹ ọnọọ za ọnịvị nịnị ene ve hi ịzọọ zizi. 33Ọ kà ọnị vaa kụ ịrẹkụ vee tù wa, dị ọnị gara wa ne hi ẹtẹ anẹkụra ọsa nịnị. Ẹtẹ ẹnịnị vaa tụ́ osusu, dị ẹkụra ẹnịnị jị eburu. 34Ịjọnọọ, ẹtẹ ọnọọ vaa yẹ́ ịsị aā hị́ ịrayị ana á sịị̄ tụ́ ụhwọ́ pooro avaba ụmẹ ọnị ọ vavọọ tụ osusu. Ụmẹ avọọ vị ọnị Anisirẹrị nịnị ị́ vaa yà ịnị ẹtẹ ọnịvị ẹnịnị. Ẹtẹ ẹnịnị vaa tụ́ ụhwọ́, dị ee hine ụmẹ ụhwọtụ anị. 35Avaba ụmẹ ọnị ẹtẹ ọnọọ ọ̀ọ vavọọ tụ osusu tịtẹ, ọ vaa tụ́ ụhwọ́. Ụhwọtụ ọnọọ ẹnịnị ẹ̀ yị sị yị ọ, ụmẹ ẹnẹ ẹnịnị sị ra ịzọọ nị. 36Ọ kà ẹnịnị ana vọ hi ẹkụra vị ọnị vaa mẹ ayịị hụrị ịnẹ ẹtẹẹtẹrẹ, dị ẹ̀ẹ wụ ka ahị ọ́ọ kụ ẹchịchị kẹnẹ, dị ẹ kụ ahụ nya iruvo ee zwè. Ẹnịnị vị ene vee zwè anka èe rere aa dụ wa eyirẹkụ avọọ, dị ẹyaa sẹ ẹdụ ẹ̀ẹ yị daka nyị ọza ana aa dụ wa. 37Ẹnịnị vị ana vaa vanggaa jịnẹ ẹngụ ọza òo rere ee zwe ka a sị ịrẹkụ rị ọnị avọọ, ama ẹ́ yị nyị ọza ana aa dụ wa. Ẹnịnị ẹ́ yị kụkụ vaa nyị ụkata ọ̀ yị pe ọnịvị ẹnịnị kụ̀ ịrẹkụ. 38Ịzị á dụ wa ne hi ẹkụra ọsa é vee súu hi, dị e ne wa hi ịzọọ nị. 39Ẹnị ana vọ hi ẹkụra ọnịvị ẹnịnị vị ọnị ụya vaa tangwaa wụụ ha agụvị ịvị ẹnịrị ohiku ẹnịnị. 40Ọ kà ama ẹnịnị ẹ̀ẹ dọ irenu ịvị ẹnịrị ohiku ẹnịnị, ohiku ẹnịnị ana và eyirazị ka ọnị, dị ẹyaa mẹ ịsị ọnị ọnị è yi sì, 41ana mẹ ka ọnị ọ̀ rẹ mẹ ịsị ẹnẹ ẹnịnị è yi sì hi wa, dị ọnị kụ wa ve hi ịnị ẹtẹ ọnịvị ẹnịnị nị. Ọ kà, ẹnịnị ẹ̀ẹ sị ayị ẹnịnị và ẹngụ ẹnịnị nẹtẹ, dị ẹnịnị dọ ka ẹnị ẹ̀ rị ụya ịvị ẹnịnị nị. 42#Oyn 28.13,14; Oyn 26.3,4; Oyn 17.7,8Ọnị vaa tamayị ịrẹyị ọnị ọnị hị́ eku anị yị Ijekọvụ, Ayiziiki, ọnịrị Abụrahamị. Ọnị é yi vee hí ayị ịsa ọnị kà ka ọnị vaa sị ẹtẹ ọnọọ yị ẹnị aza anị. 43Ama ọnyị ịpaapa, aa nyị ka à hụ́ aza hụụnị ẹtẹ ọnọọ da, agụvị ọ̀ tụ́ ụhwọ́ ẹtẹẹtẹrẹ; ka ẹnịnị ê yi ka ẹnị ẹ́ yị saasa ọda anị ọnịrị ịsị ọnị ọnị kà yị wa, aa nyị ka ẹnịnị ẹ̀ rị avaba ụya anị. 44Ama ịnị avaba anị, ụmẹ ẹnẹ ẹnịnị ẹ̀ẹ yà ịnị ẹtẹ ọnịvị ẹnịnị ọnị ẹ́ yị vaa hụrẹ wa saka-saka; ọnị ẹ́ yị vee vu wa ẹtẹ bemi-bemi. Ọnị ọ̀ọ vavọọ mẹ, vị ọnị ẹ̀ yị saasa ịrẹyị ọnị ọnịrị wa hị́ eku anị yị ẹngụ avọọ nị: Ọnị ọ vị Ẹnẹyịmavara Ohomorihi ẹnịnị nị. 45Ọnị vaa tamayị ịrẹyị ọnị ọnị hị́ eku anị yị ohiku ẹnịnị, ụmẹ ọnọọ ọnị sị sị ụkata zụ̀ avaba anẹkụra ana vọ nịnị, dị ọnị kụ aza anị hụrị Ijipiti nị. Vị́ ọnị vavọọ mẹ ka ọnị Ẹnẹyịmavara ọ̀ va vị Ohomorihi ẹnịnị nị. 46Avaba ẹsẹnị ọ vị ọda ọnị Ẹnẹyịmavara sị yị Imosiisi ịrẹsụ ataba Ịsịnayị, ọnịrị ịsị ọnị ọ kà yị ọ ka ọ̀ sị yị Anisirẹrị nịnị nị.

Currently Selected:

Ireevi 26: EBTP

Highlight

Compare

Copy