Ireevi 25

Ịrayị ọhụhịmba ana vị ụhwọtụ

(Ọda 15.1-11)

1 # Kụra 23.10,11 Imosiisi mẹ yà ịrẹsụ ataba Ịsịnayị, Ẹnẹyịmavara ộ kà a yị ọ ka, 2ọ kà a yị Anisirẹrị nịnị ka, ịjị ẹnịnị ẹ̀ẹ va sị ngụ ịnị ẹtẹ ọnị ọnị aa sịị yị wa, ẹnịnị ẹ̀ sị ụbanyị yị Ẹnẹyịmavara, dị ẹ̀ sị ụhwọtụ yị ẹtẹ ọnọọ, dị à sị ẹ kụ ọ ịrẹkụ ịnị ana tụ ọ ịrayị ọhụhịmba o. 3Ịrayị ịhịnọnyị ẹnịnị vaa kụ ẹtẹ ọnọọ ịrụkụ, dị e tenyi hi ọchị ịvayịnị ẹnịnị, dị ẹ kụ ịsị ịnị aarẹ ẹnịnị gụ nị: 4Ama ịnị ịrayị ọhụhịmba, vị ịrayị ana a sị tịtẹ yị Ẹnẹyịmavara, dị ọ vị ịrayị ọnị ẹtẹ ọnọọ vaa sị tụ́ ụhwọ́ saka-saka. 5Ịsa ọnị ọnị ụvọta ọ̀ọ mẹ tụ ịnị aarẹ, ọnị ẹnịnị è yị chire, à sị ẹ na kụ ọ gụ. Ọchị ọnị ẹnịnị è yi tenyi hi dị ẹ tụ ẹtụtụ, à sị ẹ na ha wa. Ịrayị ọnọọ vị ọnị ẹtẹ ọnọọ vaa sị tụ́ ụhwọ́ saka-saka. 6Ọ̀ọ daka vị ka ọza ẹ́ yị kụ ẹtẹ ọnọọ ịrụkụ ịnị ịrayị ọhụhịmba ọnọọ, ọ́ vaa mẹ̀ ịsọyịrị yị wụ nịnị, dị ọrịhị awụ nịnị anọrụ ọnịrị anẹẹ, aza ọnị ụ hị́ ụkọrọ nịnị, ẹnịrị azọga ana ra pe u nịnị ẹnị rẹ nyị ịsọyịrị. 7Ẹtẹ ọnọọ rẹ yị vaa mẹ ịsọyịrịị yị ịsụpa ọnị ụ pa tụ ini eehi nịnị ọnịrị uye ịnị avị ene hi ịnị ẹtẹ awụ nịnị. Avaba ịsị ẹtẹ ọnọọ ọ̀ọ mẹ vị ana a vaa rị.

Ịrayị ọyị va ẹnya ana sị za ụta ịrẹma yị ọza ana nyị

8Ẹnẹyịmavara kà Anisirẹrị vaa za ịrayị ịhịmba oze ịhịmba ịrịka, dị avaba anị vị ịrayị ọ jị ọnya ha ịnị ẹvarẹwụ. 9Ịhị ẹ tụ ẹkụhị ẹẹwụ ịnị ụhwẹ ọhụhịmba, ana vị ẹkụhị ana a sịị vagu ịvịị yị aza, à tụ́ ọza dị ò ne hu ọpanyị ngụ avaba ẹkụra zịịzị. 10Ọ kà aanị ẹnịnị mẹmẹ vaa sị ana gụ ọ ịrayị ẹvarẹwụ tụ irenyi nị. Ẹnịnị vaa nọ̀ọ ịnị ịrayị ọnọọ ka aa ngwa avaba aza ana ra ịnị ẹtẹ ọnọọ tịtẹ. A vaa và avaba ogu ana a vịdị ná ịrẹmaa yị aza ana vịdị nyị wa, à vị yị ezi ẹnịnị, dị a hụrẹ avaba aza ana vịdị hị́ ọrịhị ụvọ ka ẹẹ vàa ka anda ẹnịnịị na. 11Ịrayị ụnarenyi ịrayị ẹvarẹwụ ọnọọ vị yị wa nị. Ọ kà a sị ẹnịnị chire ịsa tụ ịnị aarẹ, dị asị ẹ rẹ na kụ́ ịsị ẹẹ mẹ yị ẹngụ anị tụ ịnị aarẹ. A sị ẹnịnị rẹ ha ẹtụtụ ọchị ịvayịnị ẹnịnị ọnị ẹnịnị è yi tenyi hi. 12Avaba ịrayị ọnọọ vị ana vaa vị ịrayị ụnarenyii yị wa. Ịsa ọnị ẹtẹ ọnọọ ọ̀ọ mẹ kẹnẹ ẹnịnị vaa rị nị. 13Ịnị ana tụ ọ ịrayị ẹvarẹwụ ọnọnị, a vaa và avaba ogu ana vịdị ná ịrẹma yị aza ana vịdị nyị wa obooro. 14Avọọ Anisirẹrị àaa ná ẹtẹ yị ọnọhụva anị Anisirẹrị à vị ka vaa hị́ ẹtẹ hụụnị ụvọ anị, ò re ka ọnị mẹ ịzẹyịza ịnị anị. 15Ẹhwị ịrayị ọnị ẹtẹ ọnọọ va zụụ mẹ̀ ịsaa vị dị ịrayị ana a vana sịị và ẹtẹ ịrẹma yị aza ana nyị ò tù ọ́ vaa jị irihii tụ ọ, dị a rẹ vavọọ hị́ ọ nị. 16Ịrayị ọnị ẹtẹ ọnọọ va zụụ mẹ̀ ịsa ọ̀ọ rụrụ, dị a ná a katarihi, ama ịrayị ọnị ọ́ vaa mẹ̀ ịsaa vị ẹ̀ yị rụrụ, dị a ná a pō. 17Ẹnẹyịmavara kà Anisirẹrị nịnị è hí angwa ọnị Ohomorihi, dị à sị ẹnịnị mẹ ẹngụ rị; agụvị ka, ọnị ọ vị Ẹnẹyịmavara Ohomorihi ẹnịnị nị.

Aha ana yà ịnị ịrayị ọhụhịmba

18Agụvị avọọ ẹnịnị ẹ̀ saasa avaba ọda anị, agụvị ẹnịnị ẹ̀ rá ịnị ẹtẹ ọnọọ dị à sị a nyị ịsị ẹ́ mẹ wa. 19Ọ kà, ẹtẹ ọnọọ vaa mẹ̀ ịsaa yị wa, dị ẹyaa rị dị ịnẹ aa ha wa. Ẹ vaa rá ịzọọ, dị ẹ́ yị nyị ịsị ẹ mẹ̀ wa. 20Ama ọzọnyị ọ́ nyẹngụ ee họ̀ use ka sị ẹnị vaa rị ịnị ịrayị ọhụhịmba, ịrẹma ọnị ẹnị ẹ̀ yị vaa mẹ̀ ịsaa tụ ịnị aarẹ, dị ẹnị ẹ̀ yị rẹ vaa kụ ịsaa gụ? 21Ẹnẹyịmavara kà ọnị vaa mẹ ka ò zé yị ẹtẹ ẹnịnị ịnị ịrayị ọhụhịnọnyị, dị ẹtẹ ẹnịnị mẹ̀ ịsa ẹtẹẹtẹrẹ ana vaa hụ waa rịị mẹ ịrayị ẹẹta. 22Ọ kà ịjị ẹnịnị ẹ̀ẹ varẹma chire ịsa tụ ịnị aarẹ ẹnịnị ịnị ịrayị ọhụhịnta, ịsa ọkụkụ ene hi ẹtẹ ẹnịnị vaa rị pooro nee tu ịrayị ọhụhịịna dị ịsa ọwọọwa ọ̀ vaa jịnẹẹ tụ ẹhẹ.

Ọyị va ogu ọza ịrẹma yọ

23Ẹnẹyịmavara kà à sị Anisirẹrị nịnị ná ẹtẹ ẹnịnị yị ọza ka ọ̀ vị ọ́ọza ọnọọ pooro, agụvị ka ẹ́ yị vị ẹnị ẹ nyị; Ohomorihi ọ nyị nị. Ọ kà Anisirẹrị nịnị vị ana sị mẹẹ anka anẹkụra ọsa ana á zẹẹ ka ee rò ẹtẹ ọnọọ avọọ. 24Ịnị avaba ẹtẹ ẹnịnị, aa nyị ka à yẹ ka ọza ana nyị ẹtẹ dị ọ́ ná a, ọ́ rẹ zụ hị́ ọ varẹma. 25Ọ kà, àa nyị Anisirẹrị ọnị osiye za, dị ọ dà ẹtẹ anị, dị ọ́ ná a nị, aza ẹngụ anị ana gụrị ọ hu kere-kere vaa vẹ vaa hị́ ọ varẹma. 26Ọza ẹnẹ ẹ̀ yị nyị anda ana vọrọ ka ọ̀ hị́ ẹtẹ ọnọọ varẹma, ọ́ zụ vana nyị ịsa ụhwọọ dị ọ hụ ọ hị́ ọ varẹma yị ẹngụ anị. 27Ọ̀ọ maanị ya, ọza ọnọọ vee sí ọza ana hị́ ẹtẹ ọnọọ ụta ịrayị ana vọ dị ịrayị ana á vana sịị và ẹtẹ ịrẹmaa yị aza ana nyị ò tu. Ụmẹ ọnọọ ọ́ yaanị sị dọ ẹtẹ anị varẹma nị. 28Ama, ẹ̀ yị nyị ẹkẹhị ana hụ ọ hị́ ẹtẹ anị varẹma, ẹtẹ ọnọọ vaa vị ọza ana hị́ ọ pooro nee tu ịrayị ana vana sịị và ẹtẹ ịrẹmaa yị aza ana nyị. Ịrayị ọnọọ á vaa và ẹtẹ ọnọọ ịrẹma yị ọza ana nyị obooro nị. 29Ọza ọ̀ọ ná irehi ana aza ra ịnị anị ịnị ẹkụra ana jị ọvọ kara, oze ọọ tịtẹ yị ọ ọ̀ yị hị́ ọ varẹma ịnị ịrayị ọyịvụrụ ịpaapa, nyima hụrị ẹkụhị ọnị ọ sị ná a. 30Ama àa vị ka ẹ yị hị́ ọ varẹma ịnị akakana ịrayị ọyịvụrụ ọnọọ, ọza ọnọọ ẹ́ yị ma vana kụkụ hị́ ọ varẹma paa. Ọza ana hị́ irehi ọnọọ ọnịrị evere anị ẹ kụkụ nyị pooro nị. Ọza ẹ́ yị vaa và a ịrẹma ịnị ịrayị ana a sịị̄ và ịsa ịrẹmaa yị aza ana nyị. 31Ama irehi ene hi ịnị ẹkụra eweyi-eweyi ọnị ọza ẹ̀ yị jị ọvọ kara vị ana a vaa sị eyi ọnyọọnyaa ré ọnịrị aarẹ. Aza ana nyị irehi ẹnẹẹ obooro ee re oze hị́ ọ varẹma. Ẹnịnị vị ana a vaa varẹma yị aza ana nyị ịnị ịrayị ana a sịị̄ và ịsa ịrẹma. 32Ama ẹ́ yị nyị ụmẹ ọnị Anireevi nịnị ẹ̀ yị nyẹngụ sị hị́ ịsa ẹnịnị varẹma ịnị ẹkụra-ẹkụra ana a sị yị wa. 33Àa nyị Anireevi ana ná irehi ịnị ẹkụra ẹnịnị ọnya, dị ẹ̀ yị hị́ ọ varẹma nị, a vaa và irehi ọnọọ ịrẹma yị ọ ịnị ịrayị ana a sịị̄ và ịsa ịrẹma yị aza ana nyị; ka irehi ọnị Anireevi nịnị nyị hi ịnị ẹkụra ẹnịnị vị ịsa ẹnịnị pooro ịnị akakana Anisirẹrị nịnị. 34Ama ẹ́ yị nyị ọza ana nyayịnẹ ná ẹtẹ ana aa kụ ịsụpaa rị ana kara ẹkụra Anireevi nịnị. Ịsa ẹnịnị ọ vị pooro nị.

Ẹkẹhị ọyị rere Onosiye

35 # Ọda 15.7,8 Ẹnẹyịmavara ộ kà a yị Anisirẹrị nịnị ka, Anda ẹnịnị Anisirẹrị ana ra gụrị wa èe re osiye, dị ẹ̀ yị zụ pá ẹngụ anị nị, ẹnịnị è sì ịsa yị ọza ọnọọ anka anẹkụra ọsa avọọ ụvị dị ọ̀ yị ra pe wa. 36Ọ kà à sị ẹ́ dọ ọtụrọsarẹsụ tụ ịnị ịsa e si rere ọza ọnọọ, ama ẹnịnị ẹ̀ saasa ịrẹyị Ohomorihi, dị anda ẹnịnị Isirẹrị ọ ra pe wa. 37#Kụra 22.25; Ọda 23.19,20Ọ kà a sị ẹ́ sị ẹkẹhị rere anda ẹnịnị dị ẹ̀ dọ ọ ọtụrọsarẹsụ tụ ọ. À sị ẹ rẹ ná ịsọyịrị yị ọ agụvị ẹnị ẹ rị ọ ọgụ. 38Ọ kà, ọnị ọ vị Ẹnẹyịmavara Ohomorihi ẹnịnị, ana kụ wa hụrị ẹtẹ Ijipiti ka ọnị ọ va sị ẹtẹ Ikanaani yị wa, dị ọnị ọ̀ vị Ohomorihi ẹnịnị nị.

Ụmẹ ọyị hụrẹ ọrịhị ụvọ

39 # Kụra 21.2-6; Ọda 15.12-18 Ẹnẹyịmavara kà, osiye ọ̀ọ za Anisirẹrị ọnyọọnyị pooro dị ọ ná ẹngụ anị ọrịhị yị ọnọhụva anị Anisirẹrị nị, à sị ẹ za a mẹ̀ ụkọrọ orihi o. 40Ọ kà ọza ọnọọ vị ana vaa yàa pe wa anka ozi ahụ ọnịrị ọzọga avọọ. Ọ vaa mẹ̀ ụkọrọ yị wa pooro nee tu ịrayị ana a sịị̄ và ịsa ịrẹmaa yị aza. 41Ịjị ụmẹ ọnọọ òo tu, ọza ọnọọ ọnịrị ezi ọnị ọ́ ma ịzọọ vaa vàa ka anda ẹnịnịị na, dị ọ na ya ịnị ẹtẹ ohiku anị nịnị. 42Ẹnẹyịmavara kà Anisirẹrị nịnị vị ezi ahụ anị, ọnị ọ kụ wa hụrị ẹtẹ Ijipiti. A sị ọza ná wa ọrịhị o. 43Ọ kà Anisirẹrị ẹ̀ saasa ịrẹyị ọnị Ohomorihi ẹnịnị, dị à sị ẹ́ chamayị yị anda ẹnịnị ana àa ná ẹngụ anị ọrịhị. 44Ẹnịnị èe si ka ẹnị ẹ̀ nyị ọrịhị, àa vị ọnọrụ, àa vị ọnẹẹ, ẹnịnị ẹ nyẹngụ na hị́ wa hụụ ịdị anẹkụra ana vọ kara wa. 45Ọ kà ẹnịnị ẹ́ rẹ nyẹngụ hị́ ezi anẹkụra ọsa ana ra pe wa. Ẹngụ ezi ẹnẹẹ ana á ma ịnị ẹtẹ ẹnịnị ẹ́ zụ vara ogu yị wa. 46Ọ kà, ẹnịnị ẹ zụ navọ ẹngụ ezi ẹnẹẹ ẹnẹ hị́ yị ezi ẹnịnị ka ẹ̀ vị ogu yị wa; dị ẹnịnị aa kụ́ yị wa pooro zịna-zịna. Ama à sị ẹnịnị chamayị yị anda ẹnịnị Anisirẹrị ọnyọọnyị. 47Ẹnẹyịmavara kà, à kà a ka anẹkụra ọsa ana ra pe wa ọọ vara ọnyẹkẹhị, dị anda ẹnịnị Anisirẹrị ọnya ee re osiye, dị ọ́ ná ẹngụ anị ọrịhị yị anẹkụra ọsa ọnọnị, avị yị ọza ịnyara ịnị anda anẹkụra ọsa ọnọnị nị, 48ịrẹma ọnị ọnyẹkẹhị ọnọnị sị ọ hị́, oze ọọ tịtẹ ka à yị hị́ Anisirẹrị ọnọnị varẹma. Ọyịnyara anị ọnya ọ́ zụ hị́ ọ varẹma. 49Ọyịnyara ada anị ọnọrụ, à vị ọnị ọnịrị vị ezi ẹyịnyara ọnọrụ, à vị aza ẹngụ anị ọnya ana gụrị ọ, ọ́ zụ hị́ ọ varẹma. Àa va vị ọnị ụvọta ọ vana nyị ẹkẹhị nị, ọ́ rẹ zụ hị́ ẹngụ anị varẹma. 50Anisirẹrị ọnọnị ọnịrị ọza ana hị́ ọ vaa geyi, dị ẹ za ịrayị ịrịka hụrị ịrayị ọnị ọ́ sị ná ẹngụ anịị yị ọ na ngụ ịrayị ọnị ọ́ sị ná ẹngụ anịị yị ọ na ngụ ịrayị ana a vana sịị và ịsa ịrẹmaa yị aza ana nyị. O vee sí ụta ọpa ịrayị ana vọ, dị ịrayị ana a sịị và ịsa ịrẹmaa yọ tù. Ọpa ụta ene eē si ọza ana á dọ ụkọrọ a vaa sị jị irihi ụta ọnị Anisirẹrị ọnọọ vee sí nị. 51Ịrayị ọ̀ọ vọ rụrụ dị ụmẹ ana a sịị và ịsa ịrẹma ò tu, dị o sí ọpa ana vọ ịnị ẹkẹhị ene e sí á mẹ hị́ ọ. 52Àa vị ịrayị chee ọ vọ nị, ọpa ụta ọnọọ ó re vee síi yị ọza ana hị́ ọ dị ọ̀ hụrẹ ẹ ụvọ nị. 53Vị́ ọ vaa sị mẹ anka ọza ana á dọ ka ọ̀ vaa mẹ̀ ụkọrọ ịrayị-ịrayị avọọ ịdị ọza ana hị́ ọ nị. Ọga anị ẹ́ yị nyayịnẹ chamayị yọ. 54Àa vị ka ọza ẹ́ yị zị oze ẹnẹnị ọnyọọnyị hị́ ọ varẹma, ọza ana hị́ ọ vaa hụrẹ ọnịrị ezi ọnị ọ́ ma ịzọọ ụvọ ịnị ịrayị ana á vana sịị và ịsa ịrẹmaa yị aza ana nyị. 55Ẹnẹyịmavara kà, Anisirẹrị ọnyọọnyị ẹ́ yị zụ vị ọrịhị yị ọza pooro, agụvị ka Anisirẹrị nịnị vị ezi ahụ ọnị Ẹnẹyịmavara. Ọnị ọ kụ wa hụrị Ijipiti nị. Ọnị ọ vị Ẹnẹyịmavara Ohomorihi ẹnịnị nị.

Currently Selected:

Ireevi 25: EBTP

Highlight

Compare

Copy