Ireevi 11

Ẹngụ uye ọnị Anisirẹrị nịnị nyẹngụ rị

(Ọda 14.3-21)

1Ẹnẹyịmavara ộ kà a yị Imosiisi ọnịrị Eerọnị ka. 2Ẹ̀ kà a yị Anisirẹrị nịnị ka, ẹngụ uye ẹnẹnị ẹnịnị vaa nyẹngụ rị ịnị avaba uye ene hi ẹhẹ nị. 3Ẹnịnị vaa rị uye tụra uye ẹnẹ ẹtụpa ẹnịnị há hi ẹẹva, dị ẹẹ̄ và ịsa ẹnẹ ẹ rịị vaavẹ ịnị irenu vaa tọ́. 4Ama, à sị ẹnịnị rị ịnyaakụmị agụvị ka é yị zoza yị wa: ịnyaakụmịị̄ và ịsọyịrị vaavẹ ịnị irenu vaa tọ́, ama ẹtụpa ẹnịnị ẹ́ yị há hi ẹẹva. 5Ọ kà à sị ẹ́ rị epeni agụvị ka é yị zoza yị wa, Epeniī và ịsọyịrị vaavẹ ịnị irenu vaa tọ́, ama ẹnịnị ẹ́ yị nyị ẹtụpa ana há hi ẹẹva. 6À sị ẹnịnị rẹ rị adeji agụvị ka adeji ẹ̀ẹ daka aā và ịsọyịrị vàa vẹ ịnị irenu vaa tọ́, ẹnịnị ẹ́ yị nyị ẹtụpa ana há hi ẹẹva, agụvị avọọ, é yi zoza yị wa. 7Ọ kà asị ẹ́ rị ụra, ẹnịnị e ré e ịsa ene èe zoza. Ẹtụpa ẹnịnị ộ há hi ẹẹva de, ama ẹnịnị ẹ́ yị ma và ịsọyịrị vavẹ ịnị irenu va tọ́. 8Asị ẹnịnị rị uye ẹnẹnị, dị asị ẹ́ hyakụ kanyị oku ẹnịnị bẹẹ. Ẹnịnị é yi zoza. 9Ọ kà ẹnịnị ẹ zụ rị avaba ịsa ana ra ini enyi dị ẹ nyị ịsị e sii họ̀ enyi, dị ẹ rẹ nyị akịka. 10Ama à sị ẹ́ rị ịsa ọnyọọnyị ana rá ịnị enyi, dị ẹ̀ yị nyị ịsị ẹ́ sịị họ̀ enyi, dị ẹ̀ yị rẹ nyị akịka. 11Ịsa eenyisi ẹ́ vị yị wụ nịnị nị. Àsị u rị wa nịnị, dị à sị ụ rẹ kanyị oku ẹnịnị bẹẹ. 12Avaba ịsị e hi ịnị enyi ẹnẹ ẹ̀ yị nyị ịsị ẹ sịị họ̀ enyi, dị ẹ̀ yị rẹ nyị akịka vị ịsa eenyisi yị wụ nịnị o. 13Inomi ẹnịnị u wẹ yị vaa rị agụvị ka enyisi ọ vị nị, wẹ yị vaa rị uye ọkasịmẹ, ụba, ụba oji, 14ukokoro ovivi ọnịrị avaba ukokoro ana vọ, 15ọrụ irenyi-irenyi, 16ogugu onyọpanyi, ogugu eneē nowu, ịpẹpẹyị ịnị enyi, avaba irepe, 17ogugu oweyi, inomi ịnị enyi ọbanyị, ogugu ọbanyị, 18ogugu ọvwọọvụ, ogugu ini iruku, obono enyi eneē che ivovo, 19Ịpẹpẹyẹ ọbanyị ene vene igongo, evere inomi ene vene ozi ọkasịmẹ, ọnịrị arịga. 20Avaba ụkọkọ ana nyị avaka dị ẹ́ rẹ nyị ahụ vị ịsị eenyisi o. 21Ẹ̀ yị vị ẹnị enee jị iriga kẹnẹ, wa zụ rị ẹngụ ọnọọ nịnị. 22Wa rẹ zụ rị akụvarịva nịnị, irehi nịnị, à vị adehimpakụ nịnị, irehi nịnị bẹẹ. 23Ama avaba ịsa eweyi-eweyi ana vọ ana nyị avaka, di e ree tùra ịnị eteesu vị ịsa eenyisi o. 24Ịsa ẹnẹnị e vee du wu nịnị ẹngụ nị. Ọza tụra ọza anaaa kanyị oku uye ẹnẹẹ vị ene du ẹngụ anị ẹngụ pooro naa ngụ oruva, 25Ọza tụra ọza anaaa sị oku uye ẹnẹnị ẹnyẹẹnyị vanaa nyịna ịta anị, ama naa ngụ oruva ịhị ọnọọ, ọ sị ẹngụ anị du ẹngụ. 26Avaba uye ọnị ẹtụpa anị ha hi ẹẹva, ama dị ẹ̀ yị ma và ịsa ịrẹma vavẹ va tọ, vị ịsa eenyisi yị wụ nịnị. Avaba aza anaaa kanyị wa ẹ sị ẹngụ ẹnịnị du ẹngụ o. 27Avaba uye anaā sịị ahụ ẹẹnaa zị, dị ẹ́ nyị igege vị ịsa eenyisi yị wụ nịnị nị o. Ọza tụra ọza anaaa kanyị oku ẹnịnị ọ sị ẹngụ anị du ẹngụ pooro dị oruva ò tu. 28Ọza ana àa sị eku uye ẹnẹnị, ọ̀ na nyịna ịta anị dị ọ̀ nị dị oruva ò tu. Ịsa eenyisi ẹ́ vị yị wụ nịnị nị o. 29Ịnị avaba ịsa anaā sịị ahụ ọnịrị ụvọọ zị ịrẹsụ ẹtẹ, ẹsẹnị vị enyisi yị wụ nịnị o; agịdịdọnyị, isu nịnị, adupo nịnị. 30Azịzẹngụ, ụva nịnị, avụta nịnị ọnịrị achịgarịga. 31Ẹsẹnị ẹ vị ịsa eenyisi yị wụ nịnị ịnị avaba ịsị ẹ sị ahụ ọnịrị ụvọọ zị nị. Ọza tụra ọza ana àa kanyị oku ẹnịnị ọ sị ẹngụ anị du ẹngụ pooro naa ngụ oruva. 32Ịsa ọnị oku ẹnịnị ọ̀ọ hụrẹ ne ngụ o sị vara ịsa eenyisi; ọ̀ọ vị ịsị asị ọchị mẹ, ọ̀ọ vị awuru, à vị ụpa, à vị ampo, ọ̀ọ va vị ịsị ọnyọọnyị ana á nyị ịsị a sịị̄ mẹ: â nyị ka è ne e ngụ enyi na ngụ oruva, dị ọ vana va nị. 33Àa nyị ana hụrẹ ne ngụ ụnọkọ ịnị ẹnịnị, avaba ịsị e hi ịnị ụnọkọ ọnọọ ẹ sị vara ịsị eenyisi, ụnọkọ ọnọọ vị ana a vaa chaka. 34Ịsa ọyịrị ana a yaanị rị ọnị enyi ịnị ụnọkọ ọ̀ọ kanyị, ẹ́ yị kụkụ zoza ọ̀yị rị. Ịsa tụra ịsa ọnị àa yaanị hú hụụnị ẹngụ ụnọkọ ẹnẹẹ é yị kụkụ zoza ò yi hú avọọ. 35Avaba ịsa ọnị ịpa ẹnyẹẹnyị ịnị oku ẹnịnị ọ̀ọ hụrẹ tụ ịrẹsụ, ịsa ẹnẹẹ ẹ́ yị kụkụ zoza avọọ, ọ̀ọ vị arasị ẹnyị à vị ọsa, vị́ a vaa gara a ha chẹkẹ-chẹkẹ nị. Ẹnịnị ẹ́ yị kụkụ zoza; ịsa eenyisi ẹ́ vị yị wụ nịnị nị. 36Ama oswe à vị odu ọbanyị ana dà enyi hi oo zoza, ama ịsa ọsa ana àa kanyị oku ịsa ẹnẹnị ẹ́ yị kụkụ zoza. 37Àa nyị ana hụrẹ ne ngụ ịsa ene ee nee chire, ịsa ọnọọ ọ yị kụkụ nị. 38Ama àa vị á sị ịsa ọnọọ tẹ enyi tịtẹ dị oku ịsa ẹnẹnị ọnyọọnyị hụrẹ ne ngụ ọ nị, ịsa ọnọọ ọ sị vara ịsa eenyisi yị wụ nịnị. 39Ịsụpa ana vọrọ ka wa rị nịnị ọnyọọnyị òo su, ọza ana àa kanyị oku anị, ọ sị ẹngụ anị du ẹngụ pooro dị oruva o tu. 40Àa nyị ọza ana rị oku uye ẹnẹẹ, ọ̀ na nyịna ịta anị, ama ọza ọnọọ ọ sị sị ẹngụ anị du ẹngụ na ngụ oruva; ọza tụra ọza ana àa sị oku uye ẹnẹẹ, áa nyị ka ọ̀ na nyịna ịta anị, ama ọza ọnọọ ọ sị sị ẹngụ anị du ẹngụ na ngụ oruva ịhị ọnọọ. 41Avaba uye eneē tura ịrẹsụ ẹtẹ vị ịsa eenyisi wẹ́ yị vaa rị ọ nịnị o. 42Wẹ̀ yị vaa rị ịsa tụra ịsa anaā sịị mẹẹ tura, ọnịrị ịsa anaā sịị ahụ ẹẹnaa zị, à vị ịsa ana nyị ahụ ọrụrụ, avaba ịsa anaā sịị ahụ ọnịrị ụvọọ tura ịrẹsụ ẹtẹ nịnị, agụvị ka ịsa eenyisi ẹ vị nị. 43Asị ụ na rị ịsa ẹnẹnị nịnị ka u ve si du ẹngụ awụ nịnị ẹngụ o. 44#Ire 19.2; 1 Ipi 1.16Ohomorihi ka, ọnị ọ vị Ẹnẹyịmavara, Ohomorihi awụ nịnị nị, agụvị avọọ, sị ẹngụ awụ nịnị tụ irenyi yị ọnị nịnị agụvị ka ọza ọnịnị ọnị vị nị. A sị ụ sị ịsa anaā sịị ahụ ọnịrị ụvọọ tura ịrẹsụ ẹtẹ du ẹngụ awụ nịnị ẹngụ o. 45Ọ kà, ọnị ọ vị Ẹnẹyịmavara ana kụ wụ nịnị hụrị ẹtẹ Ijipiti, ka ọnị ọ̀ vị Ohomorihi awụ nịnị nị. Agụvị avọọ, sị ẹngụ awụ nịnị tụ irenyi yị ọnị agụvị ka ọza ọnịnị ọnị vị nị. 46Ọsọnị ọ vị ọda ịrẹyị uye ịnị avị ọnịrị inomi nịnị nị, ọda ịrẹyị ịsa ene hi ini enyi ọnịrị avaba ịsa enee tura ịrẹsụ ẹtẹ yị. 47Re ka waa sị ana vị ịsa eenyisi tụ irenyi yị ịsa ẹnẹ ẹ̀ yị vị ịsa eenyisi nịnị, dị wa rẹ sị uye ana aa rị tụ irenyi yị uye ọnị ọza ẹ̀ yị ma rị nịnị.

Currently Selected:

Ireevi 11: EBTP

Highlight

Copy