Ireevi 10
10
Isu ịrẹsụ Inadabi ọnịrị Abihu
1Â nyị ezi Eerọnị ana aā hị́ Inadabi ọnịrị Abihu. Ẹnịnị ệ sị ẹnya na nyị ịrakịna, dị ẹ́ ká eturare hi ọ, dị ẹ́ sị ọ na ọvịdị Ẹnẹyịmavara, ịra ẹnịnị ọnọnị ẹ́ yị saasa ọda Ẹnẹyịmavara, agụvị ka ẹ́ yị kà a yị wa ka ẹnịnị ẹ̀ vavọọ mẹ. 2Kẹnẹ, dị ịra vana dà hụrị ọvịdị Ẹnẹyịmavara ve ku wa, dị ọ wụ̀ wa va hi ẹtẹ ọvịdị anị nị. 3Dị Imosiisi kà a yị Eerọnị ka, á vị ịsị Ẹnẹyịmavara aa kà yịị ka, ọnị vaa sì ẹngụ anịị zụ avaba aza anaa mẹ̀ ụkọrọ anị ka ọnịnị ọnị vị nị, dị ọnị sị igirima anị zụ aza anị. Ama dị Eerọnị vavọọ ee ré ẹtẹ hẹẹ nị. 4Imosiisi ộ hị́ ezi ọnọrụ ana aā hị́ Imisayeri ọnịrị Erizahwani ana vị ezi ọnọrụ ọnya aanị ana aā hị́ Uziyẹrị ọnọnị vị ọyịnyara ada Eerọnị. Dị Imosiisi kà a yị ezi ọnọrụ ẹẹva ẹnẹnị ka, và kụ́ oku anda awụ nịnị ẹnẹnị hụụnị ajẹngụ Ẹnẹyịmavara, dị wa kụ wa ne hi ẹhẹ ẹngụ udi nịnị. 5Ịzẹyịza, dị ẹnịnị ve, dị ẹ jị ụvọ chire wa awuru, dị e tura wa tụ ẹtẹ hụrị ẹngụ udi anka Imosiisi mẹ kà a nị. 6Dị Imosiisi kà a yị Eerọnị ọnịrị ezi anị ana aa hị́ Eriyaza ọnịrị Ịtama ka, asị ẹ hụ̀ agụvị ka ẹnị aa zị ẹngụ aza ene zụ, dị ẹ̀ navọ ẹyịrẹsụ ẹnịnị dị à si e che e o. À sị̀ hụ̀ agụvị avọọ na awuru hi ẹngụ ẹnịnị ẹngụ bẹẹ. Ọ kà ẹnịnị ẹ̀ẹ vavọọ mẹ, vị eyee su nị, dị Ẹnẹyịmavara kụ ayị hi avaba ẹnị ịragụ nị. Ama anda ẹnịnị Anisirẹrị ana vọ, ẹ́ nyẹngụ aa zị ẹngụ aza ọnị Ẹnẹyịmavara sị ịra wụ aanị. 7Ọ kà a sị ẹnịnị hụrị enoze ajẹngụ Ẹnẹyịmavara agụvị ka á raa sị angwẹ Ẹnẹyịmavara, ana á và hi wu nịnị ịrẹsụ sị wụ tụ irenyi yị Ẹnẹyịmavara nịnị. Ịzẹyịza, dị ẹnịnị mẹ anka Imosiisi mẹ mẹ̀ ẹ ọda nị.
Ọda ana á mẹ yị Ohirẹsụ irehi Ohomorihi nịnị
8Ẹnẹyịmavara ộ kà a yị Eerọnị ka, 9À sị ọnịrị ezi anị ngụ ịnị ajẹngụ ọnị Ẹnẹyịmavara ẹnịnị èe si eche hú o, ọ ka ẹnịnị ẹ̀ẹ vavọọ mẹ, vị́ eyee sú nị. Aanị avaba evere awụ nịnị mẹ saasa ọda ọnọnị pooro nị. 10Â nyị ka ẹnịnị ẹ̀ sị ịsa ana vị Ohomorihi tụ irenyi yị ịsa kẹnẹ ana vọ, dị ẹ̀ rẹ sị ịsa ana wụra mẹ ido tụ irenyi yị ịsa ẹnẹ ẹ̀ yị wụra mẹ ido. 11Ọ kà, Eerọnị ọ̀ kọ avaba ọda ọnị sị yị ọ zị oze ịnị ụvọ Imosiisi yị avaba Anisirẹrị nịnị. 12#Ire 6.14-18Imosiisi ộ kà a yị Eerọnị ọnịrị ezi ọnọrụ anị ẹyịva ana vọ ana aā hị́ Eriyaza ọnịrị Ịtama aanị ka, ẹ̀ sị ayị ana vẹtẹ ịnị ịsọyịrị ana a sị va yị Ẹnẹyịmavara aanị, dị ẹ̀ sị mẹ ịbụrẹdị ọnị ọza ẹ̀ yị sị owu tụ. Ọ kà ẹnịnị ẹ̀ yà akaha ụta ịsọvọ dị ẹ̀ rị ịbụrẹdị ọnọọ, agụvị ka ịsa ọnịnị ọ vị nị. 13Ẹnịnị ẹ̀ rị ọ aha ọnịnị agụvị ka ene tu wa ịnị ịsọyịrị ana a sị va yị Ẹnẹyịmavara ọ vị ọnọọ nị. Avọọ Ẹnẹyịmavara mẹ̀ ẹ ọda nị. 14#Ire 7.30-34Ama ẹwụrị ezi anọrụ ọnịrị ezi anẹẹ awụ ọ vaa rị ịrachị ọnịrị usi uye ana sị mẹ ẹyịza ụnarenyi yị Ẹnẹyịmavara aanị, Ịpa ọnọọ vị ana a ka à sị mẹ ọgụvọ ụnarenyi yị ohirẹsụ irehi Ohomorihi nịnị. Rị ọ aha ene zoza nịnị, agụvị ka, ene tụ́ ẹwụrị ezi ewu ịnị ịsa ana Anisirẹrị nịnị sị va mẹ̀ ịsọvọ ẹngwọọrọ ọ vị ọnọọ nị. 15Ẹ vaa sị usi ọnịrị ịrachị uye ịsọvọ ọnọnịị vẹ ịjị àaa sị ụhị anịị vaa yị Ẹnẹyịmavara, dị à rị ọ ịra ịpa ẹnẹẹ ẹ vaa vị ẹ́ẹwụrị ezi ewu pooro zịna-zịna nị. 16Imosiisi ộ tangwa họ̀ use ịnị ịpa ẹvụ ana á sị mẹ̀ ịsọvọ ịvị, dị ó ne tu ka a sị ọ rị ịra nị, ịrẹyị ọnọnị ộ mẹ̀ ka ọ̀ kụ́ ayị hi Eriyaza ọnịrị Ịtama ẹtẹẹtẹrẹ, dị ọ́ ka, 17#Ire 6.24-26Sị́ ẹ́ vẹ dị wẹ̀ yị yà aha ọnya ịnị ẹkara ajẹngụ Ẹnẹyịmavara dị wa rị ịsị ịsọvọ ịvị ọnọnị nịnị? Ịsa ọyịrị ọnịnị ọ́ vị̀ nị, dị Ẹnẹyịmavara sị yị wụ nịnị nị, agụvị à sị kụ́ ịvị ịragụ aza anị kwooze nị. 18Ịrẹma ọnị ọza ẹ̀ yị sị anị ngụ ịnịnẹ ajẹngụ Ohomorihi, vị́ ụ yaanị rị uye anị ịzọọ nịnị anka mmẹ mẹ̀ ẹ ọda yị wụ nịnị nị. 19Dị Eerọnị tụ́ Imosiisi ohi ka, ajịnị ana aza va mẹ̀ ịsọvọ ịvị ẹnịnị ọnịrị ịsọvọ ana aā rị ịra, ezi anị ẹẹva sú aanị nị; ọnị ọ̀ọ yaanị rị ịsị ịsọvọ ịvị ọnọnị, Ẹnẹyịmavara waa yaanị dọ ịsọvọ ọnọnị kẹ? 20Ịjị Imosiisi maanị wụ́ ịrẹyị ọnọnị, dị ọ́ vavọọ zee eyi nị.
Currently Selected:
Ireevi 10: EBTP
Highlight
Share
Copy
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
