Ijoovu 40

Ijoovu ô tụ́ Ohomorihi ohi ọnị ọ họ̀ ọ use

1Ẹnẹyịmavara ộ tụ Ijoovu ohi, dị ọ ka: 2vị́ Ijoovu wáá hị́ Ochẹtẹẹngụ ịrẹkụ tu ẹngụ anị, di e si ohuvọ ana a tụ ọnị nị? Ọ̀ọ ka ọnị ee pe Ohomorihi nyị ahankata o tụ ohi kẹ? 3Dị Ijoovu tụ ohi, dị ọ ka, 4ọnị ẹ́ yị vavọọ ya enee tụ ọ ohi ịrẹyị. Ọnị ọ raa sị ụvọ za irenu anị. 5Ijoovu ka ọnị ọvịdị ra ka jịnẹ ẹngụ anị. Ọnị ẹ yị nyayịnẹ ka hụụnị avọọ. 6Dị Ẹnẹyịmavara varẹma tụ ọ ohi hụụnị opomi ana a tụ nị.

Ẹnẹyịmavara

7Dị ọ kà Ijoovu ọ̀ kwẹẹtẹ jẹẹ anka ọnọrụ, dị ọ tụ ohi ịrẹyị ọnị ọnị vaa họ̀ ọ use anị. 8Ijoovu wáá vị ana kụ ịzẹyịza anị ha nị? Ọ́ọ́ vị anaa jị ịvị yị ọnị dị ọ sị ịhị rị nị? 9Ẹnẹyịmavara ộ họ̀ Ijoovu ka ọ́ọ́ nyị ụkata anka ọnị? Ọ́ọ́ nyẹngụ sị ọngwẹ anị ha apaana ihinẹba anka ọnị? 10Ijoovu ọ̀ọ vavọọ sị ya ọ kwẹẹtẹ dị ọ̀ sị ụbanyị ọnịrị ịzị ọ hụụ tu zụ kẹ. 11Ọ kà Ijoovu ọ kana eyi di o re aza ana sị ẹngụ ẹnịnị tụ ẹba, ọ kụ ayị hi wa dị ọ ka wa chi deere. 12O re wa dị ọ ka wa chi. O vu aza ọhịmị ẹtẹ aha tụra aha ene ee hi kẹ. 13Ijoovu o nye wa dị ọ za wa tụ ineku agụvị asị ẹ zụ vaa vẹ ẹhẹ. 14Ẹnẹyịmavara kà Ijoovu ọ̀ọ vavọọ zụ mẹ̀ ẹ, ọnị vaa ga a, dị ọnị dọ yọ ka ọ raa nyị ẹbẹẹba.

15Ohomorihi ka Ijoovu o re ọdọba ịnị enyi ọnị ọnị tụ́ anka ọnị mẹ rẹ tụ́ ọ. Uye ọnọọ vị anaā rị avị anka imaaru avọọ. 16Ụkata anị vi ana ya ịnị usi anị ọnịrị ọzị ịnị ịrẹka anị. 17Omu anị vị ana jẹẹ gaa anka ọchị ana aā hị́ Isida avọọ. Dị ọzị ini usi anị para za ẹngụ biri-biri nị. 18Ẹchụkụ anị sị mẹ anka enyusẹ anaā ibironzi avọọ nị. Ahụ anị vị ana sị mẹ anka ọvọrịvọ enyusẹ avọọ nị.

19Ọnị ọ vị ọọnyị ịnị uye ọnị Ohomorihi tụ nị. Ọnị ana mẹ̀ ẹ kẹnẹ o huna a nị. 20Avị ana a rị vene hi ịrẹsụ ataba ịzị uye ịnị avị nịnị yaā mẹ aahẹ. 21Uruvo igegenechi ọọ̄ hụtẹtẹ tụ nị. Ịnị ịkẹ oō tẹ̀ tụ ịnị apasị nị. 22Igegenechi ọnịrị okuha ọ vị aha uhuhu anị nị. 23Irehu ọ̀ọ daka aa ha vụụvụ, ọ yị hí angwa. Okuha Ịjọdanị ọ̀ọ daka a da vuuvu ku ọ irenu, e yi zizi. 24Ẹnẹ nyayịnẹ za ọdọba inenyi ee re e? Ẹnẹ zụ va ịrẹpa zi ọ dị ọ̀ za a aahị?

Currently Selected:

Ijoovu 40: EBTP

Highlight

Copy

Compare