Ijoovu 39

Ẹnẹyịmavara aa yịị tụ́ Ijoovu ohi ịrẹyị

1Ẹnẹyịmavara ộ họ̀ Ijoovu ka ọ́ọ́ yẹ ụmẹ ọnị ẹvụ ene hi ịrẹsụ ataba sịị ma ozi? Óó re epeni maa ma ozi da? 2Ọ́ọ́ yẹ ụmẹ ya ẹnịnị zyẹẹ vị? Óó yẹ ụmẹ ana vọrọ ka ẹ sị ma ozi? 3Ọ kà Ijoovu ọ́ọ́ yẹ ụmẹ ọnị uye ẹnẹnị sii ku ẹtẹ dị e va ozi hi ẹtẹ? 4Ezi uye nịnị ẹ̀e sị katẹngụ, dị ẹ hụ́ ịnị ọyịchapaa, dị ẹ para ọnyị ẹnịnị huu. Ọnyị ẹnịnị é me vene re wa.

5Ẹnẹ hụrẹ ịkẹrịkẹtẹ ịnị avị ụvọ? Ẹnẹ ngwara wa ka ẹẹ ngụ ọ zịịzị? 6Ẹnẹyịmavara kà ọnị ọ navọ wa tụ́ ịnị ụnọmị ịzị ẹ̀ yị nyị avị ka ẹnịnị ẹ̀ ra ịzọọ nị 7Uye ịnị avị nịnị vi eneē ve zwe, ẹ̀ẹ wụ̀ ọza ịrẹyị. Ẹnịnị é yị sị ịrẹyị owu ọza ana kụ́ ịsụpa rị. 8Ịnị ataba ẹẹ̄ ngụ ọ zịịzị na rị nị. Ịzọọ ẹnịnịị sì avị ohwoohu ẹnẹ ẹ yaa rị nị.

9Ẹya ọ́ọ́ dọ ka a sị ọnị kụ ịrịkụ, a vi ka a za a tụ́ ịnị ịga kẹ? 10Ijoovu ọ́ọ́ zụ tụ́ ẹya ọkẹkẹrẹ ka ọ huru ẹtẹ yị ọnị kẹ? Ọ́ọ́ zụ za a jị ịrụkụ kẹ? 11Ọ́ọ́ zụ sị eyi tụra a ka ọ mẹ̀ ụkọrọ yị ọnị agụvị ka ọ nyị ụkata 12Di ọ rẹ ka, Ijoovu ọ́ọ́ zụ sị eyi tụra ẹya ka ọ kụ ịsa ịnị aarẹ hụụ ịzị ee tụ́ ayị ve echi yị ọnị kẹ?

13Igongo vị eneē wù èe hú avaka, ama avaka anị ẹ yị nyị asịsẹ? 14Ịnị eteesu ọọ̄ tụ́ ajẹ hi, dị ahịka ezi o ku ọ yọ nị 15Igongo ẹ yị ro ka ọza ọ̀ zụ sị ahụ chaka ajẹ anị, a vi ka uye ọ zụ sị ẹtụpa pịrị wa. 16Ezi anị vị ọnị ọọ chamayịị yị. Ẹ̀ẹ daka su, ẹ́ yị nyị ịzị ọ gẹẹ. 17Ẹnẹyịmavara kà ọnị ọ rẹẹ sị ịrẹyọyẹ yọ, dị ọ vavọọ aa mẹ̀ ụra nị. 18Ama ee zwe echi, umaata ọnịrị ọza ana tụra vana tana eyi re e.

19Ẹnẹyịmavara ọ̀ rẹ họ̀ Ijoovu ka, ọnị ọ́ọ́ sị ụkata yị umaata nị, a vị ọnị ọ̀ mẹ ẹyị ana vaku ọ ọrọkọ nị 20Ọnị ọ́ọ́ mẹ̀ umaata ka oō ji anka akụvarịva avọọ nị? 21Ẹnịnị e che ẹtụpa rị ẹtẹ, dị ẹ yaa jẹẹ ka ẹnị ẹ nyị ụkata. Di e yee né àaa nọ ịrẹkụ. 22Ẹ yị nyị ịsị ee hí angwa anị. Ọza ẹ́ yi zụ si ụhwọ dụ wa varẹma. 23Ọpa aza ana tụra wa vi ana sụrẹyị ịnị ahaba anị, dị ọha ẹnịnị aa za nyoonyo ọyị ọọ va tụra wa 24Ẹngụ vị anaā hụ umaata ẹnẹẹ ka ẹnị e zwe echi dọ ọvịdị. Ẹnịnị ẹ yị kụkụ jẹẹ yị ee hu ọpanyị ịrẹkụ. 25Ụpẹrịka ọnị ọpanyị ọọ sụrẹyị, di e nowu. Ẹnịnị ẹ̀ wụ agụ ịrẹkụ di ẹ hyakụ vaa gụrị eyi ịrẹkụ. Ẹẹ wụ́ ịrẹyị ọnị ọga ịrẹkụ nịnị aa ka.

26Ẹnẹyịmavara kà, Ijoovu ọ́ọ́ zụ́ ukokoro a mẹ vọrọ ka ọ hira nị? Ọnị ọ́ọ́ zụ ò a mẹ vọrọ ka ọ gana avaka zị eyi ụvẹtẹ nị? 27Ọkasịmẹ wee zi ka Ijoovu ọ̀ ka yị ọnị ka ọnị mẹ ịrẹngwẹ anị tụ́ ịrẹsụ ataba nị? 28Ọkasịmẹ vị anaā da irehi anị, tu ịrẹsụ ataba ana nẹba huu. Dị ọ sị ọkọnị anị hụyọgọ sere ẹngụ anị. 29Ịzọọ aa ya re ịsị ẹ gụrị ẹtẹ ọnịrị anaa noze ana za mẹ ụngwẹ 30#Imt 24.28; Irk 17.37Ezi anị vene hu oku uye ọnị ọ kụ́ kara wa.

Currently Selected:

Ijoovu 39: EBTP

Highlight

Copy

Compare