Ijoovu 27

Ijoovu aa yịị kà ịrẹyị naa

1Ijoovu maa ka ịrẹyị anị naa, dị ọ ka, 2Ohomorihi Ochẹtẹẹngụ ana yara ọ yị mẹ̀ ebira ana vọrọ ka ọ̀ me hi ọnị. Di ọ navọ mị tụ ịnị ayodu nị. Dị ọ hị́ eku ka, 3Ohomorihi ò sere ọnị, dị ọnị e yi su nị. 4Ọnị ẹ yị sị irenu anị cheeche. Ọnị e yi ree vene ọza. 5Asị Ohomorihi zẹẹ ka ọnị ọ dọ ka ọta ẹnẹẹ ẹ ka ịzẹyịza. Ọ kà ọnị ọ daka ee su ọnị vị ana yịị kụ ka ọnị ọ yị rị ịvị. 6Ijoovu ka ọnị ẹ yị vaa va, agụvị ka ayị anị ọ jị ịvị yị ọnị.

7Avaba aza anaa bàrà mị, dị ẹ kwẹẹtẹ tu mi vị ana vaa rị ụya anka ọza ọhịmị avọọ. Vị́ ẹ́ vaa rị ụya anka ọza odivi nị. 8Sị ẹ vaa vị ọyịtureyi ọza odivi, ịjị Ohomorihi ọ̀ọ ka ọ̀ sị ụhwẹ vẹ? 9Ohomorihi wáá vaa wụ́ owu ẹnịnị, ịjị ẹngụkata ọ̀ọ ka wa vẹ, dị ẹyaa da ịpẹ ka à gụ ẹnị ụvọ nị? 10Ayị ẹnịnị we vee hinee tu Ochẹtẹẹngụ? Vị́ a vọrọ ka ẹnịnị ẹ̀ yaanị sị avaba ụmẹẹ mẹ̀ aduwa hi Ohomorihi nị.

11Jẹẹ ma zụ̀ wụ nịnị ịzị ụkata Ohomorihi banyị na za. Mị vaa mẹ ẹhahi ịsa oni Ohomorihi sì ka ọnị aa mẹ yị wụ nịnị. 12Avaba awụ nịnị ụvọta ọ sị o re: Sị ẹ vẹ dị ụ kụkụ maanị vaa yịị kà kẹnẹ-kẹnẹ nịnịị?

13Aanị Ohomorihi Ochẹtẹẹngụ mẹẹ sị ụyaa rị aza edivi nị. 14Ẹnịnị ẹ zụ ma ezi tatarata, ama avaba ẹnịnị vị ana a vaa wụ̀ ha eyirẹkụ. Ezi ẹnịnị vị ọnị ụngwẹ vaa kụ̀. 15Ezi ẹnịnị ana àa vọ eyirẹkụ, vị ọnị ụkụ vaa wụ̀. Osoku ẹnịnị ẹ yị hyakụ vaa jị òrèrè ẹnịnị. 16Aza ẹhịmị ẹ zụ kụ ogu gụ ọnị ọza ẹ yị zụ za ịrịka; é zụ gu ịta jẹẹ anka a mẹẹ tọ ụvụụ jẹẹ avọọ, 17ama dị ahịka aza ọyịza nịnị ẹ vaa za ịta ẹnẹẹ nị. Ọnịrẹyịzẹyịza nịnị ẹ vaa gà ogu anị nị. 18Irehi ana aza ẹhịmị da vị ana vị ụgẹngẹnẹ anka irehi arahị avọọ. Vị́ ọ sị mẹ anka ajẹngụ oserẹtẹ ịzị e chire ọchị ịvayịnị hi nị. 19Aza ẹhịmị ẹẹ na sụ̀ ịnị ogu, dị ẹ ha kwẹẹtẹ ịnị ụzọngwa. 20Ayịhụrịnẹ o chi wa ẹngụ anka ọhaara enyi mẹẹ kụ ẹtẹ avọọ. Opomi ịrahụ vị ene hì wa ne hu. 21Ahị hụrẹ eyi ọnị ọyịị̄ zịị vẹ va sị wa ne hu. O vee hì waa hụrẹ aha ẹnịnị. 22Ahị ọnọọ ẹ yị vayị ẹnịnị ẹ̀ẹ daka aa sị vụrị ka ẹnị è zwe yọ. 23Ahị ọnọọ nyayịnẹ a tụ kukuku, dị ụkata evu ẹtẹ ee chire wa angwa dụ wa ịrẹma e mee zwe nị.

Currently Selected:

Ijoovu 27: EBTP

Highlight

Copy

Compare