Ijoovu 24

Ijoovu aa yịị kà ịrẹyị naa

1Ijoovu ka sị ẹ vẹ dị Ohomorihi Ochẹtẹẹngụ ẹ yị sị ụmẹ tịtẹ ana a sị mẹ̀ ọkarẹyị, agụvị aza anaa hẹkẹ ẹ è zụ re e ka ọnịzẹyịza ọ́ vị nị? 2Aza aa vara ịrẹta anaa sị tẹ ẹhị ẹtẹ udi agụvị dị ẹtẹ ẹnịnị ọ banyị. E yee yi atẹmẹ avaka ẹnịnị. 3Ẹ yaa dọ ezi-oku ịkẹrịkẹtẹ ọnịrị ụnọ osoku nịnị za ụta ẹnị ẹ̀ rị wa. 4Ẹ yaa mẹ ẹvaya yị onosiye nịnị, dị ẹ dụ wa na tẹ̀.

5Dị onosiye ẹnịrị ezi ẹnịnị e si ịsọyịrị anka ịkẹrịkẹtẹ ene si ịsọyịrị ịnị ụnọmị ịzị ẹtẹ wụ avọọ. 6Ệ nọ ịnị aarẹ ọzẹnẹsa na kụ ịsa gụ, dị ẹ nọ idi aza edivi na tọ ịzaha nị. 7Ka ẹnịnị ẹ yị nyị achị dị ẹ sụ ịnị ahị ahwaahụ ịrahụ. 8Dị orihi ana zụ ịrẹsụ ataba horo wa ẹngụ dị ahịka ụtẹha e zwe na tẹ̀ tụ nị.

9Aza edivi a za ezi-oku ọrịhị, dị ẹ kụ ezi onosiye nịnị si ụta ẹnị ẹ rị. 10Dị a sị ụkata-ụkata za wa ka ẹ mẹ̀ ụkọrọ ahwaahụ, dị ụngwẹ aa kụ wa ịnị aarẹ. 11Di e hi ịnị ụkọ aa mẹ angwẹ orivi ọnịrị eche ịvayịnị ama dị onyi aa kụ wa nị. 12Aza ana tọ ụnava hi ini ẹkụra ee na owu ka à gụ ẹnị ụvọ, dị aza enee su a jị òrèrè nị, ama Ohomorihi o yi tụ wa ohi.

13Aa nyị aza ẹnyị anaa mẹ akamawụ, hi ẹtohweyi, Ẹnịnị ẹ yị yẹ oze anị, ẹnịnị ẹ yị saasa a. 14Ẹtẹ ọ sị hozi, dị ẹ yaa wụ onosiye ọnịrị ọnụzọngwa dị ẹ yi oyi. 15Ọsẹrẹka vene zi ka ẹtẹ o hozi, dị ọ sị ịsa ku eyi anị ka asị e re ọnị. 16Ịrahụ dị oyi nịnị aa chaka irehi ne yi oyi, ama dị ẹ tẹ ọọdụ. 17Ịrahụ o zee wa eyi huu ọọdụ agụvị ka ẹnịrị angwa ịrahụ vị ọta.

18Ohomorihi vene vee hì aza ọhịmị kwooze anka ahụhụ ịrẹsụ enyi avọọ. Aarẹ ọnịrị ụbazị vị ọnị ozirenu vaa za di ẹ zụ mẹ̀ ịsa. 19Ẹtọngụra mee tura enyi hụụ ẹtẹ, avọọ uswọọza mẹ va kụ aza ọhịmị nị. 20Dị ayị ẹnịnị hii, dị ụkata ẹnịnị taa, dị ụpẹngụ ẹnịnị ee hine idegu ọyịrị. 21Avọọ e me ve re nị agụvị ka ẹnịnị ẹ yị vayị yị osoku ọnịrị ọbọrị nịnị. 22Ohomorihi vaa sị ụkata anị vu wa ẹtẹ, èe ro ka ẹnị aa mẹ ẹtẹẹrẹ. 23Ohomorihi ọ zụ sere wa ama ọ nyayịnẹ sị eyi pe wa ụmẹ tụra ụmẹ nị. 24Ụmẹ chee o zee yị aza edivi, dị ẹ su anka avị ohwoohu ana wara avọọ nị. 25Ẹnẹ zụ kụ hi ireche ka ẹ yị vavọọ ẹhẹ aza edivi mẹẹ̄ ya?

Currently Selected:

Ijoovu 24: EBTP

Highlight

Copy

Compare