Ijoovu 11

Ịrẹyị ịpaapa Izohwa

Izohwa

1Izohwa ana vị Aninaama ka: 2Ọza ẹ yị mẹ ka ọnị ee tụ ohi ịrẹka gigirigi ọnị Ijoovu kụ hi ẹtẹ aanị. 3Óó ro ka ịrẹkọkụ anị ọ zụ ọza irenu kwoku nị. Ọ̀ọ sị ẹnị mẹ enyinyi, ẹnị aa tụ ọ ohuvọ nị. 4Ọ́ jị ịhị yị ẹngụ anị dị o ro ka ọnị ọọ nị ọvịdị Ohomorihi nị. 5Aa yẹ Ohomorihi o tụ ọ ohi, 6dị ọ ka yị ọ ka ịrẹyọyẹ vị irenyi-irenyi. A nyị ịsa ọnị ọza kẹnẹ ẹ yị zụ yẹ. Ohomorihi vana hẹrẹ ẹnya ụya anị yọ.

7Ọ̀ọ ka ọnị ọ zụ yẹ Ohomorihi mẹmẹ nyị ụbanyị ọnịrị ịzị ọ nyị ụkata na za nị? 8Ịrẹyọyẹ Ohomorihi ọ nẹba huni ẹbẹẹba dị ọ nyịnẹ huni uruvo ẹtẹ. Sị́ ọ yẹ ọnị ọọ mẹ. 9Avọọ ịrẹyọyẹ anị mẹ rẹ gana huni ẹtẹ ọnịrị oku nị. 10Ohomorihi ọ̀ọ sị wụ tụ́ ikootu anị, ẹnẹ zụ dọ ụyụvọ awụ? 11Ọọ yẹ ọza ẹnẹ ẹ yị nyị ịsa ọ vị. Ee re avaba odivi ọnị aa mẹ. 12Ịsụpa ọza zụ pá huu ọnụra nị.

13Dị Izohwa ka Ijoovu o ro ịnẹ dị ọ da ịpẹ yị Ohomorihi. 14Dị ọ̀ va hụụnị ebira odivi anị, dị asị ọ zẹ ka aza ene hi ini eehi anị ẹẹ mẹ̀ ebira odivi. 15Ọ̀ọ vavọọ aa mẹ, ụhị ọ̀ yị vaa nyị ọ, dị ọ nyị ọtụtụrụma, dị angwa e yi hi ọ. 16Dị o hi ayị ụya ọnị ọ vịdị rị anka enyi meē si na ngụ ịnị irehu avọọ. 17Dị ẹhẹ anị vana vara anka etohozi ọ vara tụ ịnị ẹtohweyi avọọ. 18Ohomorihi vee sere e, dị ọ sị ayị anị nẹtẹ, dị ọ nyị eyọtụra. 19Angwa ẹ yị vee hi ọ aa sụ ara. Aza vana vaa sị ụbanyị yọ. 20Aza edivi e yi vee re ẹtẹ re wụ. Ẹnịnị e yi vee re aha zwe na tẹ̀, usu kẹnẹ e kuku e zi eyi nị.

Currently Selected:

Ijoovu 11: EBTP

Highlight

Copy

Compare