Ijeremaya 8
8
1Ẹnẹyịmavara kà, ịjị ụmẹ oo tu, a vaa wà ẹchụkụ ohinọyị Anijuda nịnị ọnịrị ẹchụkụ ọdọvịdị ẹnịnị hụụnị ikuta. Ẹchụkụ ohirẹsụ irehi Ohomorihi ọnịrị ọnịsẹ ẹnịnị beri ẹchụkụ avaba Anijerusarẹmị ana vọ vị ana a vaa wà hi ẹhẹ hụụnị ikuta ẹnịnị. 2A vaa gara wa hi ịnị ọyị ọnịrị ụhwẹ beri ụzọmị ene hi ẹbẹẹba, ẹnị ẹnịnị maanị sì ịrẹyị anị dị ẹ yaa kụụ hẹkẹ. Ịsa ẹnẹnị Anijuda nịnị â saasa, dị a hi ka ẹnị ẹnịnị họ̀ use ịrẹyị, dị ẹ yaa hẹkẹ wa nị. Ọza ẹ ma vana kụ ẹchụkụ ẹnẹẹ gụ à vị ka è ne wa, ama a vaa kụ wa vàa hi ututu nị. 3Ẹnẹyịmavara Ochẹtẹẹngụ ka, ẹnị anaa vọ ịpa evere aza edivi ẹnẹnị aha tụra aha ịzị ọnị ọọ dụ wa ne hi, vanaa va ụva isu ka aayẹ ẹnị è vene su.
Ebira odivi ọnịrị ụyọrị anị
4Ẹnẹyịmavara ộ kà a yị Ijeremaya ka ọ̀ kà a yị aza anị ka, aanị ka ọza ọọ hị́ ẹdụ ẹ ma varẹma kwẹẹtẹ? Aanị ka ọza oo nyeeyi, ẹ ma vavẹ eehi? 5Ọ kà, ẹwụ nịnị aza anị, sị ẹ vẹ dị ụ nyeeyi nịnị, dị wẹ yị kụkụ và ka ọnị vẹ nịnị? Ụ ka ẹwụ nịnị yị, evene yị, we yi ka wẹ yị và ka ọnị vẹ nịnị. 6Ẹnẹyịmavara kà ọnị ộ si ụtọ pe ẹtẹ ẹtẹẹtẹrẹ, ama wẹ yị kà ịzẹyịza nịnị. Ẹ yị nyị ọza ịnị ẹngụ awụ nịnị ene ro ịnẹ varẹma hụụnị ebira odivi anị. Ẹ yị nyị ọza ana kà a ka sị ọnị vana mẹ aanị da. Ọzọza vanaa zị oze anị anka umaata anaa nọ ịrẹkụ avọọ. 7Inomi ana aā hị́ anẹ nịnị ẹẹ yẹ ụmẹ ẹnị ẹ sịị vaavẹ eehi, Arivadi nịnị, aara nịnị ọnịrị atuporogo nịnị ẹẹ yẹ ụmẹ ẹnị sịị kụ̀ra. Ama, ẹwụ nịnị aza anị, ẹ yị yẹ ọda Ohomorihi awụ nịnị. 8Ọ kà, ụ mẹ mẹ zụ kà a ka waa yẹ ịrẹyị nịnị, ọnịrị ka waa yẹ ọda anị nịnị? Re, ọzwọzọda nịnị ẹ raa sị irikichi vara ọda anị. 9Ọyẹrẹyị awụ nịnị vị ana a vaa mẹ̀ ụhị nyị. Ẹnịnị vee hi ịnị ayịhụrịnẹ ọnịrị ẹngụkata ọnị ẹnịnị ẹ̀ yị va zụụ tụụ hụụnị anị. Ẹ ka ẹnị ẹ yị dọ ịrẹyị Ẹnẹyịmavara; ịrẹyọyẹ ịsị ẹ va nyị booro aanị? 10Ẹnẹyịmavara kà, agụvị avọọ, ose ẹnịnị vị ọnị ọnị vaa sị yị anọrụ ọsa, dị ọnị aarẹ ẹnịnị yị aza ọwọọwa. Hụụnị ozweyi na ngụ ọzọkụ ẹnịnị, avaba ẹnịnị vị anaa họ̀ ọhọha ogu kẹnẹ. Ọnịsẹ ọnịrị ohirẹsụ irehi Ohomorihi nịnị vanaa mẹ azaa rị. 11#Ezk 13.10Ọ kà, ụvọ ẹnẹ ẹ yaa sị mẹ ụnava aza anị vị ana sị mẹẹ anka ọza oo rere họ̀rọ ẹngụ kẹnẹ avọọ. Aza yị hi ịnị ịrẹyị, ama dị ẹ ka, ẹ yị nyị ịrẹyị. 12#Ijer 6.12-15Ọ kà, ụhị waa vanaa nyị aza anị ka ẹnị ệ maanị mẹ ịsị edivi ẹnẹnị da? Ịzị ọ na vị. Ụhị ọ ma nyị waa vụrụ-vụrụ. Ẹnịnị ẹ ma sị eyi tẹ ka aza ee re ẹnị, avọọ ẹnịrị aza ana vọ ẹ vaa hyẹdụ nị. Ẹ́ ẹnịnị vaa ta ịhị ọnị aa sị ụyaa rị wa. 13Ẹnẹyịmavara kà, ọnị vaa dọ wa ịsị ịnị aarẹ ẹnịnị. Ẹ yị vaa nyị ẹtụtụ ịnị ọchị ịvayịnị ẹnịnị. Ọchị ihwigi ẹnịnị ẹ yị rẹ vaa nyị ẹtụtụ. A vaa dọ wa avaba ịsị ọnị vịdị sị yị wa. 14Dị ẹnị aza Ohomorihi ka, sị ẹnị yaatụ ịzị ẹnaanị ee zi? Ẹ ka, a vẹ ẹnị e dudu zwe ne hi ẹkụra ana a jị ọvọ kara, dị ẹnị è sú hi ịzọọ. Ka, Ẹnẹyịmavara, Ohomorihi ẹnịnị ọ sị ẹnị hụrẹ ụvọ yị isu, ọ raa sị ẹchịpa yị ẹnị ka ẹnị è hú ọ; ka ẹnị ẹ sị ebira odivi mẹ hi ọ. 15Ẹ ka, ẹnị ê zi ẹngwọọrọ ọnịrị ụmẹ ẹngwohyahị eyi, ama ẹnị e yị ve re ọyịza ọnyọọnyị. Re, ayịhụrịnẹ kẹnẹ o hi ẹtẹ nị. 16Ẹ ka ọnịvị ẹnịnị ẹ sị ngụ ẹkụra Ịdaanị, Ẹnị aa wụ ẹtẹ ịrẹyị umaata ẹnịnị maa sị tụ ụhwẹ ụkata-ụkata. Avaba ẹtẹ ee zizi ịjị umaata ẹnịnị è na owu, ọnịvị ẹnịnị ẹ zị vẹ ọyị ve vu ẹkụra ẹnịnị ọnịrị aza beri ịsa ene hi ịnị anị ẹtẹ. 17Ẹnẹyịmavara kà, re, ọnị aa tụ́ ẹ́wụ́ ana nyị ẹchịpa odivi vaa ngụ ịnị awụ nịnị. Ẹ vaa jị wụ nịnị ịrẹrụ. Ọza ẹ yị vaa zụ mẹ irere anị.
Ayodu Ijeremaya agụvị aza anị
18Ijeremaya ka, tee! ayodu anị ộ dà banyị kẹnẹ ịnẹ aa zị ọnị. 19Sị ụtọ pe ẹtẹ, ịzị waa zị ịnị ẹkụra kẹnẹ, vị ọnị aa wụ̀ aza anị maa jị òrèrè. Ẹnịnị ka, aanị ka vị Ẹnẹyịmavara ẹ yị kụkụ ya nị? Aanị ka vị ohinọyị ẹ̀ yị kụkụ yà ịzọọ nị? Dị Ẹnẹyịmavara, ohinọyị ẹnịnị tụ́ ohi, dị ọ ka sị ẹ vẹ dị ụ na hẹkẹ ori nịnị, dị wee ku ẹtẹ yị ori ọzọga kẹnẹ-kẹnẹ ọnị ụ na dọ nịnị, dị waa sịị mẹ ayịị kụ ọnị nịnị? 20Dị aza na owu zẹtẹ, dị ẹ ka, ụmẹ ọhahị ọ sị parahu, á raa kụ ịsị ịnị aarẹ gụ, ama ọza ẹ yị vaa dọ ẹnị ha. 21Dị Ijeremaya ka, ayị anị ọ sị sẹ rugurugu agụvị ka aza anị ẹ kụ sẹ rugurugu. Ọnị ộ sụ́ ùnè; ọnị ẹ yị kụkụ yẹ ịsị a vọrọ ka ọnị ọ̀ mẹ vụrụ-vụrụ. 22Ọ kà, aanị ka ẹ yị kụkụ nyị ahọ̀nọ ẹtẹ Anigiriyadi? Aanị ka ẹ yị kụkụ nyị Idokita ịzọọ? Sị ẹ vavẹ dị ẹngụ aza anị ẹ̀ẹẹ yị va nịya?
Currently Selected:
Ijeremaya 8: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
