Ijeremaya 7
7
Ijeremaya ộ kà ịrẹyị Ohomorihi ini irehi Ohomorihi
1Ẹnẹyịmavara ọ maanị tụ Ijeremaya ụtụ nị. 2Ọ kà, ọ̀ na jẹẹ oze ọnị Anijuda nịnịị zị ngụ ịnị irehi Ẹnẹyịmavara vaa hẹkẹ ẹ, dị ọ̀ kà a yị wa ka, 3Ẹ̀ wụ́ ụtụ ọnị Ẹnẹyịmavara Ochẹtẹẹngụ Ohomorihi Anisirẹrị nịnị tụ; ọ ka, vara ebira awụ nịnị dị wa hụụnị ịsa ọnị waa mẹ nịnị aanị, ọnị vaa navọ ka wa ra ịnị ẹtẹ ọnọnị nịnị. 4Hụụnị ịrẹyị evene ọnị aza aa kà a wụ nịnị ọ̀yị dọ wụ. Ẹ ka, agụvị ka Irehi Ẹnẹyịmavara yịị ịda awụ nịnị, wa sị ha nịnị. 5Wàa vara ebira awụ nịnị dị ụ hụụnị ịsa ọnị waa mẹ nịnị nị, waa mẹ ịzẹyịza hi ẹngụ nịnị; 6Wẹ yị kụkụ mẹ ẹvaya yị azọga nịnị, ezi-oku nịnị avị osoku nịnị, dị wẹ̀ yị kụkụ wụ̀ ọza ẹnị ẹ yị nyị ịsị ọ mẹ ịzẹnị nịnị nị; wẹ yị kụkụ na hẹkẹ ori nịnị ene vee vu u nịnị ẹtẹ. 7Ịjọnọọ ọnị vaa navọ ka wa ra nịnị ịnị ẹtẹ ọnọnị ọnị ọnị sị yị ohiku awụ nịnị pooro zịna-zịna. 8Ẹnẹyịmavara kà, wee re, wa raa dọ ịrẹyị evene wụ nịnị tụ ịnị osusu. 9Ọ kà, á vị wee ne sị oyi yi nịnị di ụ sị ọza wụ̀ nịnị nị, waa na raa sẹ̀ ịrẹka nịnị di ụ sị eku ireche hị́ nịnị nị, waa na raa mẹ̀ ịsọvọ yị ori anaā hị́ Ịbaarị nịnị dị ụ na raa hẹkẹ ori ọnị wẹ yị vịdị yẹ nịnị nị, 10dị ụ varẹma va jẹẹ ọvịdị anị nịnị ịnị irehi ọnọnị ana a yaa hị́ ịrẹha anị dị ụ ka: Wa sị ha nịnị? Wa sị ha nịnị ka wa naa mẹ̀ ịsa anaa nyị ọnị ịhyẹrẹ aanị waa yọ? 11#Imt 21.13; Ịmk 11.17; Irk 19.46Ẹnẹyịmavara kà, vị irehi anị ọnọnị waa sị vara aha ọyị tẹ̀ yị anako nịnị nị? Ọnị ee re avaba ịsị waa mẹ nịnị o. 12#Ijos 18.1; Ahẹ 78.60; Ijer 26.6Ọ kà, nọ ẹtẹ Isiiro nịnị booro aanị, ịzị a vịdị yaa hẹkẹ ọnị ịpaapa dị we re nịnị ịsị ọnị sị ọ mẹ agụvị ebira odivi Anisirẹrị nịnị. 13Ẹnẹyịmavara kà, ụ mẹ maanị aa yịị mẹ̀ ebira odivi ọnọnị nịnị, ọnị ộ ka ịrẹyị wụ nịnị pooro, ama ụka wẹ yị wụ nịnị, ọnị ộ hị́ ụ nịnị ama we yị tụ́ ohi nịnị. 14Avọọ, ịsị ọnị mẹ Isiiro avọọ, vaa mẹ irehi anị ọnọnị ọnị ụ vavọọ sị ayị tụra nịnị nị. Ọ kà, ọnị ọ vịdị sị ịzọọ yị ẹwụrị ohiku awụ nịnị nị. 15Ọ kà vị ọnị vaa dụ wụ nịnị hụrị ẹngụ anka ọnị mẹ mẹ ẹyịnyara awụ nịnị, Anehwireemi nịnị avọọ nị.
Anijuda ệ yịị hụụnị ori ọyị hẹkẹ
16Ọ kà, agụvị avọọ, asị ọnị Ijeremaya hụvị aza ẹnẹnị mẹ̀ aduwa. Asị ọnị hụvị ẹnịnị da ịpẹ yị ọnị agụvị ka ọnị ẹ yị vaa wụ̀. 17Ọ kà, aanị ka ọnị e yi re ịsị aza ẹnẹnị aa mẹ avaba ẹkụra ene hi Ijuda ọnịrị avaba oze ene hi Ijerusarẹmị? 18#Ijer 44.17-19Ezweyi ẹẹ na tọ ọkụ gụ, dị ada ẹnịnị sị ka ịra, dị anyẹnẹẹ ẹnịnị po ayị dị ẹ sị jị akara yị ịsị ẹ ka ọọ vị ohinọyị anyẹnẹẹ ana ya ẹbẹẹba. Ẹnịnị ẹẹ rẹ sị ehe dị ẹ sị mẹ̀ ịsọvọ yị ori nịnị ọyị mẹ ayị kụ ọnị. 19Ẹnẹyịmavara kà, ọnị ẹnịnị waa vana ka ẹnị aa mẹ ayị kụ nị? Ọ kà, ẹngụ ẹnịnị ẹ yaa zama nị. Ẹngụ ẹnịnị ẹ yaa mẹ̀ ụhị nyị nị. 20Avọọ, Ẹnẹyịmavara Ochẹtẹẹngụ ka, ọnị vaa sị ọyịkụ anị zụ aza ana vẹ ịnị irehi anị ọnọnị ẹtẹẹtẹrẹ ọ ka, aza ẹnịrị uye nịnị, ọchị ịnị avị nịnị ọnịrị ịsa ịnị aarẹ vị ọnị ọnị vaa mẹ ọyịkụụ yị anka ịra anaa zá dị ọza e yi zụ mi ọ avọọ. 21Ẹnẹyịmavara Ochẹtẹẹngụ, Ohomorihi Anisirẹrị nịnị ka, ẹwụ nịnị aza anị ọ sị ịsa ịsọvọ ọnị ụ rị ịra nịnị vaka ịsọvọ awụ nịnị ana vọ, dị wa naa rị avaba anị nịnị. 22Ka ọnị mẹ kụ ohiku awụ nịnị hụrị ẹtẹ Ijipiti aa vẹ, ọnị kà ịrẹyị yị wa. Ẹ yị vị ịsọvọ ọyị mẹ dị aa rị ẹnyịị ịra kẹnẹ ọnị mẹ ọda anị yị wa. 23Ọ kà, ama ọnị ộ mẹ̀ ọda yị wa ka: ẹnịị ẹẹ wụ́ chire ọnị, ka ọnị vaa vị Ohomorihi ẹnịnị, dị ẹnịnị vị aza anị, ọnị ộ ka ẹ yị wa ka, ẹnịnị ẹẹ mẹ ẹhẹ ẹnịnị ọnị mẹ mẹ̀ ẹ ọda yị wa, ka ọ va rọ wa ẹngụ nị. 24Ama ẹnịnị ẹ yị wụ́ chire ọnị, ẹnịị ẹ yị wụ́ ịrẹyị anị. Ẹnịnị ệ mẹ ayị ọkatẹngụ, dị ahịka ịsị ayị odivi ẹnịnị ộ kà yị wa kẹnẹ ẹ yaa mẹ nị. Ana vọrọ ka ẹ̀ sịị kà a tụ ọvịdị dị ahịka vee divi yị wa hu avọọ nị. 25Ẹnẹyịmavara kà, hụrị ụmẹ ọnị ohiku awụ nịnị sị hụrẹ Ijipiti pooro va ngụ ajịnị, eyinị-eyinị ọnị aa tụ ọnụtụ anị nịnị ana vị ọnịsẹ hi ụ nịnị nị. 26Ama ẹ yị nyị ọza ana wụ́ ịrẹyị anị. Ayị awụ nịnị ộ katẹngụ, dị ahịka udivi ọnị waa mẹ nịnị o huna ohiku awụ nịnị nị. 27Ẹnẹyịmavara ộ kà a yị ọnị Ijeremaya ka ọnị ọọ maanị na kà avaba ịrẹyị ẹnẹnị yị aza anị, ẹnịnị ẹ yị vaa wụ̀; ọnị ọ̀ọ hị́ wa, ẹnịnị e yi vee tụ́ ohi. 28Avọọ, ọnị ọ̀ kà a yị wa ka ẹnịnị vị anẹkụra ẹnị ẹ̀ yị ma wụ́ ịrẹyị Ohomorihi ẹnịnị Ẹnẹyịmavara. Ẹnịnị ma kọ ịrẹyọyẹ aa daka sị ụya rị wa. Ịzẹyịza ộ ta, aza ẹ yị kụkụ ka ịzẹyịza.
Ebira edivi ana aā mẹ̀ ịnị inoze Ihinọmị
29Ọ kà, ẹwụ nịnị Anijerusarẹmị ọ̀ kụ ịrẹsụ awụ nịnị. Na yà ịnị ataba dị wa jị òrèrè nịnị agụvị ka Ẹnẹyịmavara aa kụ ayị hi anụmọgọnị. Ọ sị wa yi hụụnị aza anị. 30Ẹnẹyịmavara kà Anijuda nịnị ệ sị ịsị odivi mẹ. Ẹnịnị ẹ raa sị ori ẹnịnị anaa nyị ọnị ịhyẹrẹ va tụ ịnị irehi anị. Ẹ sị irehi anị du ẹngụ. 31#2 Ohi 23.10; Ijer 32.35; Ire 18.21Ẹnịnị ệ nọ ịnị akakana ataba ẹẹva ịzị aā hị́ Ihinọmị, dị e nee hì ụta ịsọvọ ịzị ẹ vaa sị ezi ẹnịnị mẹ̀ ịsọvọ dị ẹ rị ọ ịra tụ ịzọọ nị. Ụta ọnọọ ẹ yaa hị́ Itohwẹtị nị. Ọ kà, ọnị ẹ yị kà a yị wa ka ẹ̀ vavọọ mẹ, ẹngụ ịsa ẹnẹẹ ẹ ị hyakụ vẹ ịnị ayị anị bẹẹ. 32Avọọ, ụmẹ aa vẹ ọnị ọza ẹ yị ma vana hị́ ọ Itohwẹtị à vị akakana ataba ẹẹva Ihinọmị, ama dị a hi ka ịnị akakana ataba ẹẹva ana aā wụ̀ aza aa hị́ ọ nị. Ka ẹnịnị vee ne oku ịzọọ pooro nee tu ka asị e kụkụ re aha ne oku tụ. 33Ọ kà, inomi nịnị ẹnịrị uye ịnị avị nịnị ẹ vanaa rị oku ẹnịnị nị. Ẹ yị vaa nyị ọza ana aa dụ wa kwooze. 34#Ijer 16.9; 25.10; Ẹtẹ 18.23Aza vaa hụ́ hụụnị ẹkụra. Ẹnẹyịmavara kà, ọnị vaa mẹ ka asị a kụkụ wụ aahẹ ka aza aa mẹ ayohine ọnịrị ịrajẹ. Dị ọnị mẹ ka asị aza kụkụ zụ jẹ ka vị ẹnị aa nyị ẹngụ nị.
Currently Selected:
Ijeremaya 7: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
