Ijeremaya 41
41
Usu Igidarịya
1 #
2 Ohi 25.25
Ịnị ụhwẹ ọhụhịmba ịrayị ọnọọ gẹdẹ-gẹdẹ, Isimẹrị, ozi Inetaniya ọnịrị anọrụ ẹẹwụ, ê ve tu Igidarịya ozi Ahikami Imizipa. Isimẹrị ọnọnị vị aazị Erisama. Aza ohinọyị ọ vị nị, dị ọ vịdị ọza ịnya ịnị ọdọvịdị ohinọyị nị. Avaba ẹnịnị maa rị ịsa, 2dị Isimẹrị ọnịrị aza anị vana tụ̀ ụhwọ, dị ẹ wụ Igidarịya nyẹtẹ nị. 3Isimẹrị ộ rẹ wụ̀ avaba Anisirẹrị ana yà Imizipa beri Igidarịya ụmẹ ọnọọ. Dị ọ rẹ wụ ẹnị isoja Anibabironi nịnị ene hi ịzọọ bẹẹ nị. 4Eyinẹhẹ anị, dị anaa nyị ka à yẹ ka asị Igidarịya wụ, 5â nyị aza ẹnị ẹbẹẹna ana hụrẹ ẹtẹ Ịsẹkẹmị, Isiro ọnịrị Ịsamarịya vẹ. Ẹnịnị vị ana kụ́ ịrẹwa ẹnịnị, dị ẹ na awuru hi ẹngụ ẹnịnị ẹngụ, dị ẹ́ rẹ tọ̀ ẹngụ ụnava nị. Ệ kụ apaapa ọnịrị eturare aa vaa mẹ̀ ịsọvọ ịnị irehi Ohomorihi. 6Isimẹrị ộ hụrẹ Imizipa na gẹrị wa. Ọ́ maa na, vị aa jị òrèrè nị. Ịjị ó ne si tu wa, dị ọ́ ka, aarịhịnị, ẹẹ vẹ, è ve re Igidarịya nị. 7Aza ẹnẹnị mẹ yị ngụ ịnị ẹkụra kẹnẹ, dị Isimẹrị ọnịrị aza anị wụ̀ wa, dị ẹ kụ oku và hí ịkangga nị. 8Ama â nyị aza ẹnị ẹẹwụ ịnị aza ẹnẹẹ. Ẹnịnị ệ kà a yị Isimẹrị ka, aarịhịnị, asị ọ wụ ẹnị de. Ẹ ka ẹnị aa sị ihwiti, ibaari ọnịrị angwẹ orivi beri ẹhụ ẹnẹ ẹnị kụ́ tẹ̀ ịnị aarẹ. Ịzẹyịza, dị Isimẹrị navọ wa nị. 9Â nyị ịkangga ọbanyị ọnya ọnị Asa, ohinọyị Ijuda chị́ ọnị ọ sị sere ẹngụ anị ụmẹ ọnị Ibaasa ohinọyị Isirẹrị sị kwẹẹtẹ tu ọ. Ịkangga ọnọọ Isimẹrị kụ́ oku aza ọnị ọ wụ aanị và hi di o si hi ọ nị. 10Dị ọ zá avaba ezi anẹẹ ohinọyị ọrịhị beri avaba aza ana vọ hi Imizipa nị. Aza ẹnẹẹ vị ọnị Inebuzaradani ka Igidarịya ò si eyi pee. Isimẹrị ộ za wa ọrịhị, dị ọ kụ wa zị oze Amọnị aa na nị. 11Ijohananị ọnịrị ẹnị ọdọvịdị isoja ene hi ịzọọ pe e ệ wụ̀ ebira odivi ọnị Isimẹrị mẹ̀. 12Dị ẹnịnị kú hi Isimẹrị nị. Ệ na saasa wa ọ sị gụrị imisi ana yà ẹtẹ Igibiyọnị. 13Ịjị aza ọnị Isimẹrị za ọrịhị aanị ré ka Ijohananị ọnịrị ọdọvịdị isoja nịnị ana saasa aa vẹ, dị ayị ẹnịnị ee hine nị. 14Dị avaba ẹnị ọnị Isimẹrị za ọrịhị Imizipa aanị zwe hụụ ịdị anị na gụ Ijohananị ụvọ nị. 15Ama Isimẹrị ozi Inetanaya ọnịrị aza anị ẹnị ịhịnta ê zwe hụụnị ụvọ Ijohananị na ngụ ẹtẹ Amọnị. Ụvọ Ijohananị é yi re ve ku wa. 16Dị Ijohananị ọnịrị ẹnị ọdọvịdị isoja ọnị ọnịrịị zị kụ avaba aza ọnị Isimẹrị za ọrịhị hụrị Imizipa nị. Isimẹrị ộ vịdị sị Igidarịya wụ. Aza ẹnẹ kụ varẹma hụrị Igibiyọnị yị: Isoja nịnị, anyẹnẹẹ, ezweyi, ẹnịrị ẹnị ọnụkọrọ ịnị ikootu nịnị. 17Ẹnịnị ê zwe aa nọ ẹtẹ Ijipiti. Ẹ́ maa na, dị ẹ́ jẹẹ ẹtẹ Igeruti-Ikimihami ọ sị gụrị Ịbẹtịrẹhẹmị nị. 18Ẹnịnị ee zwee yị Anibabironi. Angwa ẹnịnị ee hí wa agụvị ka Igidarịya ọnị ohinọyị Ịbabịrọnị sị mẹ Ịgọvọnọ ẹkụra (Ijuda), Isimẹrị ọ sị ọ wụ.
Currently Selected:
Ijeremaya 41: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
