Ijeremaya 37
37
Ụtụ ọnị Ịzẹdẹkaya tụ hi Ijeremaya.
1 #
2 Ohi 24.17; 2 Ịtọ 36.10 Â nyị ọnọrụ ọnya aanị ana aā hị́ Ịzẹdẹkaya, ozi ọnọrụ ana aā hị́ Ijosaya ọ́ vị̀ nị. Inebukadineza, ohinọyị Ịbabịrọnị ộ sị ọ rị ohinọyị Ijuda. Ụmẹ avọọ, ozi ohinọyị Ijehoyakimi ana aā hị́ Ijehoyakimi a vọrọ ka ọ rị ohinọyị nị. 2Ama ohinọyị Ịzẹdẹkaya ọnọnị ọnịrị ezi ahụ anị beri avaba aza ana ra ịnị ẹtẹ Ijuda ẹ́ yị saasa ịrẹyị Ẹnẹyịmavara ọnị Ijeremaya ana vị ọnịsẹ aa kà a yị wa. 3Ijeremaya ka, ohinọyị Ịzẹdẹkaya ộ tụ ọnọrụ ọnya aanị ana aā hị́ Ijehukari, ozi Iseremaya beri Ịzẹhwanaya ozi Imaseya ve tu ọnị. Ịzẹhwanịya ọnị vị ohirẹsụ irehi Ohomorihi. Ọ kà, aarịhịnị, ọnị ò pe ẹnị mẹ̀ aduwa hi Ẹnẹyịmavara, Ohomorihi ẹnịnị de. 4Ijeremaya ka ọza ẹ yị jị ọnị ẹngwa ụmẹ avọọ, ọnị aa yịị ngwọọ zịịzị. 5Ezirẹkụ Anibabironiya nịnị vị ana kara Ijerusarẹmị okiri-okiri ụmẹ avọọ. Ama ịjị ẹnịnị wụ́ ka isoja Ihwarawo ohinọyị Ijipiti aa vẹ, dị ẹnịnị si zwe varẹma nị. 6Ijeremaya ka, dị Ẹnẹyịmavara va kà a yị ọnị ka, 7ọnị, Ohomorihi Anisirẹrị nịnị ka; ọnị ọ̀ kà a yị ohinọyị Ijuda ana tụ ọnị ve tu ọnị avọọ ka: isoja Anijipiti yà oze aa vẹ vaa gụ wa ụvọ, ama ẹnịnị vaa vàa nọ eehi ẹnịnị. 8Ịjị ẹẹ sị varẹma, Anibabironi vaa kụ́ ịrẹkụụ vaavẹ ẹkụra ọnọnị dị ẹẹ zaa, dị ẹẹ rị ọ ịra. 9Ẹnẹyịmavara kà ọnị aa kà a yị wa ka, asị e vene ẹngụ ẹnịnị dị ee rò o ka Anibabironi ẹ yị ma vana vavẹ, ẹnịnị vaa vaavẹ o. 10Ọ kà Anijuda nịnị ẹ̀ẹ daka nọ ịrẹkụ Anibabironi, dị e huna wa, dị ahịka aza ana tọ̀ ụnava ẹ vọ hi ịnị ajẹngụ ẹnịnị nị, aza ẹnẹẹ yị vaa kwẹẹtẹ dị ẹ rị Ijerusarẹmị ịra saka-saka.
 jị Ijeremaya ẹngwa
11Ezirẹkụ Anibabironi ê zwe varẹma hụrị Ijerusarẹmị agụvị ka ệ wụ ka Ezirẹkụ Anijipiti aa vẹ. 12Ijeremaya ka dị ọnị hụrẹ Ijerusarẹmị aa nọ okokooro Ịbẹnjamịnị nị. Ọnị aa na ka ọnị ọ̀ na dọ ene tu ọnị ini ogu ovwoovu ẹnịnị. 13Ọ kà ama ịjị ọnị tu oze ana a zịị̄ ngụ ẹtẹ Ịbẹnjamịnị kẹnẹ, â nyị isoja nịnị e nee sere ẹtẹ, ọga ẹnịnị aā hị́ Irija nị. Ozi ọnọrụ ana aā hị́ Iseremaya ọ vị nị, dị ọ vị aazị Ịhananịya nị. Ijeremaya ka ọga isoja ọnọnị ộ za ọnị jẹẹ, dị ọ ka vị ọnị ee zwe ka Anibabironi nịnị na nị. 14Ọ kà, dị ọnị tu o ohi ka, ẹ yị vị avọọ. Ọnị e yi zwe nọ aha ọnyọọnyị nị. Ama Irija ẹ yị dọ, dị ọ za ọnị ne tu ọdọvịdị nịnị nị. 15Ijeremaya ka ịjị ọdọvịdị ẹnẹnị re ọnị kẹnẹ, di ayị ẹnịnị aa da ọva hụtụ-hụtụ nị. Dị ẹnịnị ka è tụ́ ọnị, dị é gu oze hi ọnị tụ ịnị irehi ọnọrụ ana aā hi Ijonatani nị. Ijonatani ọnọnị ọọ chẹrẹ ịsa yị ikootu ẹnịnị nị. Dị a hi ka irehi anị a kụkụ sị mẹ ẹngwa nị. 16Ijeremaya ka aku ana da tụ iruvo eteesu ịnị ẹngwa ịzọọ a sị ọnị na tụ nị. Â za ọnị tụ ịzọọ ku ẹtẹẹtẹrẹ. 17Ộ dàku-dàku, dị ohinọyị Ịzẹdẹkaya tụ ka à sị ọnị ve tu ọnị ịnị irehi ohinọyị nị. Ọnị ô tu ịzọọ dị ohinọyị were họ̀ ọnị usirẹyị ka, aa nyị Ẹnẹyịmavara mẹ kà kẹ? Dị ọnị tụ́ ohi ka, aa nyị de, Ẹnẹyịmavara kà vị a vaa sị o chire ohinọyị Ịbabịrọnị ụvọ nị. 18Ijeremaya ka ọnị ộ varẹma họ̀ ohinọyị Ịzẹdẹkaya use ka, ebira odivi sị ọnị mẹ hi ọ ọnịrị ọdọvịdị anị nịnị, sị ọnị mẹ aza, ọnị asị jị ọnị ẹngwa kẹ? 19Ọnị ộ họ̀ ọ use ka, ịzị ọnịsẹ anị nịnị ana kà a yọ ka ohinọyị Ịbabịrọnị ẹ yị ma vana kụ́ ịrẹkụ ve tu ọnịrị ẹkụra anị hi kẹ? 20Dị ọnị ka yị ohinọyị Ịzẹdẹkaya ka, ọ̀ navọ ọ wụ ịpẹ ọnị ọnị aa dáa yọ booro aanị. Aarịhịnị, asị ọ kụkụ sị ọnị varẹma na tụ ịnị ẹngwa ịnị ịdị Ijonatani. Ẹyịvavọọ vị ọnị ee sú u tu ịzọọ nị. 21Ịzẹyịza, dị Ịzẹdẹkaya ka è nee gu oze hi ọnị ohweje ohinọyị nị. Dị ọnị yà ịzọọ nị. Eyinị-eyinị dị aa sị ịbụrẹdị ikonyi ikonya hụụ ịdị aza anaā mẹ ịbụrẹdị vaa yị ọnị nị. Avọọ á mẹ sị yị ọnị pooro ne tu ụmẹ ọnị ịbụrẹdị ta hụụ ịdị aza anaā mẹẹ nị.
Currently Selected:
Ijeremaya 37: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
