Ijeremaya 30
30
Ịsị Ẹnẹyịmavara kà ọnị va mẹẹ yị aza anị.
1Ẹkụhị ọnya Ẹnẹyịmavara, Ohomorihi Anisirẹrị ộ kà a yị Ijeremaya ka, 2Ọ̀ chẹrẹ avaba ịrẹyị ọnị ọnị kà yọ tụ ịnị iwe, 3agụvị ka ụmẹ aa vẹ ọnị ọnị Ẹnẹyịmavara vaa va aza anị Anisirẹrị nịnị ọnịrị Anijuda nịnị vẹ eehi ẹnịnị. Ọ kà nị vaa kụ wa vaavẹ ịnị ẹtẹ ọnị ọnị sị yị ohiku ẹnịnị. 4Ẹnẹyịmavara ộ kà a yị Anisirẹrị ọnịrị Anijuda nịnị ka: 5Ọnị ộ wụ́ aza maa jị òrèrè ayị maa hụrẹ wa ịnẹ dị angwa ee hi wa, ẹnịnị ẹ́ yị nyị ẹngwọọrọ. 6Ọ kà, jẹẹ nịnị daa re, vị ọnọrụ wáá rẹẹ barẹẹ nị? Sị ẹ vavẹ dị ọnị ee re ka ọnọrụ ọzọza ẹ raa kụ ụvọ ka ọtẹ anka ọnẹẹ anaa barẹẹ avọọ? Sị ẹ vẹ dị ọzọza sị eyi vara eyihi? 7Ẹnẹyịmavara kà ẹkụhị odivi aa vẹ. Ẹ́ yị nyị ẹkụhị ana vaa wụra juwe anị: Ọ kà ụmẹ ọnị aza anị vaa sị rị ụya ọ vaa vị nị, ama ẹnịnị vaa ha. 8Ẹnẹyịmavara Ochẹtẹẹngụ ka, ịhị ẹkụhị ọnọọ oo tu, ọnị vee che ọkẹẹkẹrẹ ana a sị tụ aza anị ọbẹ dị ọnị ngwara ẹba ana a sị sụ́ wa. Ẹnịnị ẹ́ yị kụkụ vaa vị ọrịhị yị anẹkụra ọsa. 9Ama ẹnịnị vaa hẹkẹ ọnị, Ẹnẹyịmavara Ohomorihi ẹnịnị. Ẹ vaa vàa ku ẹtẹ yị ozi Idevidi ọnị ọnị vaa sịị rị ohinọyịị yị wa. 10#Ijer 46.27,28Ọ kà, ẹwụ nịnị aza anị, Anisirẹrị, asị ụ hí angwa nịnị; asị ayị hụrẹ ụ nịnị ịnẹ. Ẹnẹyịmavara kà ọnị vaa dọ ẹwụrị ezi ẹwụ nịnị ha hụrị aha ẹnẹẹnẹ ịzị a za awụ nịnị ọrịhị hi avọọ. Ụ vanaa nyị ẹngwọọrọ, dị ọnị ee sere ụ nịnị. É ma vana nyị ọza ana vaa mẹ angwaa hi wu nịnị. 11Ẹnẹyịmavara kà ọnị ọ̀ yà pe wu nịnị, ọnị vaa dọ wụ nịnị ha. Ọ kà ọnị vee vu avaba ẹkụra ọnị ọnị gara wụ nịnị ne hi ẹtẹ, ama ọnị e yi vee vu wu nịnị ẹtẹ. Ọ kà ọnị ẹ yị vaa mẹ ka wẹ́ yị rị ụya nịnị, ama ịjị ọnị aa sị ụya rị ụ nịnị, ẹhwị ụya ọnị vaa sị rị wụ nịnị nị. 12Ẹnẹyịmavara kà, ọza ẹ yị zụ mẹ ụnava ana a tọ ụ nịnị aanị, ụnava ọnọnị ẹ yị kụkụ zụ vị. 13Ẹ́ yị nyị ọza anaa da ịpẹ ịrẹyị awụ nịnị; ẹ́ yị nyị ịsị a zụ sị mẹ ịtahụ awụ nịnị, asị ụ tụra eyi ka ẹngụ awụ nịnị vaa nịya o. 14Avaba aza ẹnẹ ẹwụrịị vịdị sì ịrẹyị ẹngụ nịnị e ree hi ayị awụ nịnị, ẹnịnị ẹ́ yị kụkụ tamayị awụ nịnị. Ọ kà, vị ọnị kwẹẹtẹ tu u nịnị anka ọnịvị ọza avọọ, dị ọnị sị ụya rị ụ nịnị ẹtẹẹtẹrẹ nị, agụvị ka ebira odivi awụ nịnị ọ sị rụrụ. Ayịchama awụ nịnị ọ sị dẹngụ. 15Ẹnẹyịmavara kà, sị ẹ vẹ di we nowu zị nịnị agụvị ụnava awụ nịnị ọnị ọza ẹ̀ yị zụ mẹ? Ọ kà, agụvị ebira odivi ọrụrụ-ọrụrụ awụ nịnị ọnịrị ayịchama awụ nịnị ọnị maanị sị mẹ ụ nịnị nị. 16Ama booro aanị, avaba aza ana va gara ụ nịnị ha vị ana a vaa garaa ha; avaba ọnịvị awụ nịnị vị ana a vaa za ọrịhị nee hi ẹkụra ọsa. Avaba aza ana sị ụya rị ụ nịnị vị ana a vaa sị ụyaa rị. Aza ana kụ ẹnya awụ nịnị vị ana a vaa kụ ẹnya ẹnịnị. 17Ẹnẹyịmavara kà ọnịvị awụ nịnị ẹẹ daka kà a ka asị Anịzayọnị du tụ ẹhẹ, ẹ́ yị nyị ọza ọnị ịrẹyị anị kụkụ jị areyi, ọnị vanaa mẹ ka ẹngụ awụ nịnị ọ̀ nịya. Ọnị vaa mẹ ka ụnava awụ nịnị ọ̀ vị. 18Ọ kà, ọnị vaa kụ Anijerusarẹmị vàa vẹ eehi, dị ọnị và ogu ẹnịnị ịrẹma yị wa. Ọnị vaa vayị ovwoovu ikonyikonyara ẹnịnị. Ọ kà, e vènee tenyi Ijerusarẹmị da, dị a da irehi ohinọyị ẹnịnị varẹma tụ aha anị. 19Ẹnịnị va jị ahẹ gono ọnị, dị eyee nowu ẹ́ẹẹ maa jẹ ịrajẹ. Ọnị vaa mẹ ka ẹnịnị ẹ̀ rụrụ, ẹnịnị ẹ yị ma vana jịha. Ọnị vaa mẹ ka a sị ụbanyị yị wa, ọza ẹ́ yị ma vana sị eyi oweyi re wa. 20Ẹnẹyịmavara kà, ọnị vaa mẹ ka ezi ẹnịnị ẹ̀ yà anka ẹ mẹ yà ịyẹẹyẹ. Ọnị vaa varẹma sị ẹkụra ẹnịnị hi ẹtẹ geri-geri. Dị ọnị sị ụya rị avaba aza ana mẹ ẹvaya (ehuna) yị wa. 21Ọ kà, ịnị ẹngụ ẹnịnị ẹ vaa nyị ọdọvịdị ẹnịnị ọnịrị ohinọyị ẹnịnịị hụrẹ nị. Ọnị vee turaa pe ẹngụ dị ọ gụrị ọnị, agụvị ka ẹ́ yị nyị ọza ana nyayịnẹ ka pe ọnị ẹ̀ẹ vị ọnị hị́ ọ. 22Ẹnẹyịmavara kà ẹnịnị vaa vị aza anị, dị ọnị vị Ohomorihi ẹnịnị. 23Re, Ẹnẹyịmavara àa kụ ayị, vị ọ sị mẹ anka opomi avọọ nị, ọ vaa tụ́ vee ku aza edivi ịrẹsụ anka ahị anaa tụ́ kukuku avọọ nị. 24Ẹnẹyịmavara ẹ́ yị vaa vàa hụụnị ọyịkụ anị ẹ̀ yị vị ọ́ raa mẹ avaba ịsị o rò ka ọnị aa mẹẹ ta. Ịhị ẹkụhị oo tu, ịrẹyị ọnọnị vee ye aza anị gedebee.
Currently Selected:
Ijeremaya 30: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
