Ijeremaya 29
29
Ịrẹta ọnị Ijeremaya chẹrẹ tụ hị́ Aniju ene hi Ịbabịrọnị.
1 #
2 Ohi 24.12-16; 2 Ịtọ 36.10 Ijeremaya ka ọnị ộ chẹrẹ ịrẹta tu hi ohirẹsụ irehi Ohomorihi nịnị, ọnịsẹ nịnị, ẹnị ọdọvịdị nịnị ọnịrị avaba aza ana vọ ọnị Inebukadineza za ọrịhị hụrị Ijerusarẹmị ne hi Ịbabịrọnị. 2Ọ kà, ịrẹma ana a raa kụ́ ohinọyị Ijehoyakimi ọnịrị ọnyị anị, aza ana a mẹ̀ ụkọrọ ịnị eehi ohinọyị, ọdọvịdị Anijuda nịnị, ọnụkọrọ ụvọ nịnị ẹnịrị aza ana yara mẹ̀ ụkọrọ irenyi-irenyi nịnị ne hi Ịbabịrọnị ọnị chẹrẹ ịrẹta ọnọọ nị. 3Ọ kà â nyị ọnọrụ ẹnẹẹ ọnị Ịzẹdẹkaya ohinọyị Anijuda tụ nọ Ịbabịrọnị ne tu Inebukadineza ohinọyị ịzọọ. Ịrẹha ẹnịnị ọ rị Erasa ozi Isahwani ọnịrị Igẹmarịya ozi Ihikaya nị. Ẹnịnị ọnị sị ịrẹta ọnọọ tụ nị, ọ ka, ọnị ộ chẹrẹ tụ ịnị ịrẹta ọnọọ ka; 4Ẹnẹyịmavara Ochẹtẹẹngụ, Ohomorihi Anisirẹrị nịnị aa kà a yị avaba aza ọnị ọ navọ ka Inebukadineza ọ̀ za ọrịhị hụrị Ijerusarẹmị ne hi Ịbabịrọnị ka; 5Wa dà irehi hi ịzọọ dị wa rá hi ịzọọ nịnị o. Dà aarẹ tụ ịzọọ dị waa rị ịsị ịnị aarẹ awụ nịnị o. 6Ẹnẹyịmavara kà waa nyị ọnẹẹ ịzọọ nịnị dị waa ma ezi nịnị. Navọ ezi ẹwụ nịnị ẹnị ẹ̀ rẹ nyị ọnẹẹ dị ẹ̀ ma ezi ịzọọ. Waa rụrụ hu avọọ nịị, asị ụ jịha nịnị. 7Ọ kà waa mẹ asịvụrị ka ò zoza yị anẹkụra ana a za wụ nịnị ọrịhị ne hi. Ẹnẹyịmavara kà waa hụ agụvị ẹnịnịị mẹ̀ aduwa ka ọnị ọ̀ mẹ ka ò zee yị wa, agụvị ize ẹnịnị ọ vaa vị awụ nịnị nị. 8Ọ kà ọnị Ẹnẹyịmavara, Ohomorihi Anisirẹrị aa kà wụ nịnị ọ̀nọ̀ ka, asị ụ zẹẹ ọnịsẹ ene hi ịnị akakana awụ nịnị ẹnịrị aza ana ka ẹnị ẹ zụ kà ịsị ana va mẹ ụhwọọ è vene ụ nịnị o. Asị ụ wụ́ ịrẹyị ụra ẹnẹ ẹ ka ẹnị aa rá avọọ o. 9Ẹnẹyịmavara Ochẹtẹẹngụ ka ireche kẹnẹ eyee che dị ẹ ka vị ọnị tụ ẹnị ụtụ nị. Ọnị ẹ yị tụ wa ụtụ. 10#2 Ịtọ 36.21; Ijer 25.11; Ịda 9.2Ẹnẹyịmavara kà, ịjị waa raa mẹ ịrayị ẹtarẹwụ Ịbabịrọnị nịnị, ọnị vaa va eyi vẹ ịnị ịrẹyị awụ nịnị, dị ọnị kụ wụ nịnị và vẹ eehi anka ọnị mẹ vịdị kà a. 11Ọ kà agụvị ka ọyịnyara ọ yẹ́ aro ọnị nyị yị ụ nịnị nị, ọnị ọọ nyị aro ọ́ mẹmẹ vee zee ụ nịnị ẹ́ yị vị ọ́ mẹmẹ vaa kata ụ nịnị ẹngụ, ọnị ọọ nyị aro ịsa ọnị waa tụra eyi nịnị ụhwọọ mẹmẹ vaa gẹẹ yị ụ nịnị. 12Ịjọnọọ, ụ kụkụ vaa hị́ ọnị nịnị, Ẹnẹyịmavara kà ụ vaa vẹ vaa mẹ̀ aduwaa hi ọnị nịnị, dị ọnị tu u nini ohi. 13#Ọda 4.29Ọ kà, u vee sì ọnị nịnị, di u re ọnị nịnị; agụvị ka avaba ayị nịnị (ịzẹyịza) ụ kụkụ ve sii si ọnị nịnị nị. 14Ẹnẹyịmavara kà, ịzẹyịza, u vee re ọnị nịnị, dị ọnị và ụ nịnị ịrẹma va tụ ịnị ẹtẹ awụ nịnị. Ọ kà ọnị kụ́ ụ nịnịị gụ hụrị avaba ẹkụra ọnị ọnị gara ụ nịnị ne hi. Ọnị vaa kụ́ ụ nịnị hụrị ẹkụra ana dị ụ nịnị ne hi, dị ọnị kụ ụ nịnị và vẹ ẹkụra awụ nịnị. 15Ẹnẹyịmavara kà, waa kà a nịnị ka, ọnị ộ sị ọnịsẹẹ wụ nịnị Ịbabịrọnị. 16Avọọ avaba awụ nịnị ọ̀ wụ́ ịrẹyị ọnị ọnị aa kà ịnị ịpa ohinọyị ana vaa mẹ ohinọyị tụ ịrẹsụ ẹtẹ ọnị Idevidi vịdị vị ohinọyị anị. Rẹ wụ́ nịnị ịsị ọnị ọnị aa ka ịnị ịpa anda awụ nịnị ana vọ hi Ijerusarẹmị ọnị ọza ẹ̀ yị zá ẹwụrị ọrịhị nịnị. 17Ẹnẹyịmavara Ochẹtẹẹngụ ka, ọnị aa kụ́ ịrẹkụ, ụngwẹ ọnịrị ụkụ vee tù wa. Ọnị vaa mẹ wa anka ihwigi ana vụ̀ pooro dị ẹ̀ yị kụkụ wụra rị avọọ. 18Ọ kà ọnị vaa kụ́ ịrẹkụ ụngwẹ ọnịrị ụkụụ tù wa dị ọnị sị dụ wa. Avaba anẹkụra ene hi ẹhẹ vee re wa dị ayị aa hụrẹ wa ịnẹ. Ịsị ẹ mẹ tù wa vaa za azaa zizi, dị angwa ee hi wa aha tụra aha ọnị ọnị ọọ dụ wa ne hi. Aza vị ana vaa sị wa mẹ ịyẹyẹ, dị ẹ kụkụ aa sị ịrẹha ẹnịnị tụ ozirenuu hi aza. 19Ẹnẹyịmavara kà aanị ọ́ mẹ vaa yà yị wa nị, agụvị ka ẹnịnị ẹ́ yị saasa ịrẹyị anị ọnị ọnị aa sịị tụ ezi ahụ anị ọnịsẹ nịnị hi wa. Ẹnịnị ee yí ka ẹnị ẹ yị wụ. 20Ọ kà avaba ẹwụ nịnị ọnị ọnị dụ ne hi Ịbabịrọnị ọ̀ wụ́ o. 21Ẹnẹyịmavara Ochẹtẹẹngụ, Ohomorihi Anisirẹrị ọ́ raa kà ịrẹyị ọnọrụ ana aā hị́ Ahabị ozi Ikoraya ọnịrị Ịzẹdẹkaya ozi Imaseya. Ẹnịnị ee cheeche wụ nịnị ka vị ọnị tụ ẹnị ụtụ nị. Ẹnẹyịmavara kà ọnị vaa hụrẹ wa ụvọ yị Inebukadineza ohinọyị Anibabironi dị ọ wụ̀ wa eyi awụ nịnị goro-goro. 22Ịhị aza ana a za ọrịhị hụrị Ijerusarẹmị ne hi Ịbabịrọnị aanị ẹẹ ka ẹnị aa tụ ozirenuu hi ọza, ẹnịnị kụkụ vaa kà a ka; Ẹnẹyịmavara ọ̀ mẹ wụ anka ọ́ mẹ mẹ Ịzẹdẹkaya ọnịrị Ahabị ọnị ohinọyị Ịbabịrọnị hù irenyi-irenyi avọọ. 23Ẹnẹyịmavara kà, aanị ọ́ mẹ vaa yàa yị wa nị, agụvị ka ẹnịnị ẹẹ rị ịvị ebira odivi irenyi-irenyi ẹnẹ ẹ́ mẹ. Ẹnịnị ệ sị ose ọnọhụva ẹnịnị dị e re yee cheeche ka ọnị Ẹnẹyịmavara ọ tụ ẹnị ụtụ nị. Ẹnẹyịmavara é yi sì ẹngụ ịrẹyị ọnọnị. Ộ yẹ́ ịsị ẹnịnị mẹ, dị ọ́ rẹ vị onivenu tụ ọ nị.
Ịrẹta ọnị ọnị Isemaya chẹrẹ
24Â nyị ọnọrụ ọnya ana aā hị́ Isemaya ana vị anẹkụra ana aā hị́ Ineherami. Ijeremaya ka Ẹnẹyịmavara ộ tụ́ ọnị ka ọnị ọ̀ kà a yọ ka: 25Ẹnẹyịmavara Ochẹtẹẹngụ, Ohomorihi Anisirẹrị ka, waa sị ịrẹha ẹngụ awụ chẹrẹ ịrẹta tu hi avaba aza ene hi Ijerusarẹmị, ọnịrị ohirẹsụ irehi Ohomorihi ana aā hị́ Ịzẹhwanaya ozi Imaseya beri avaba ohirẹsụ irehi Ohomorihi ana vọ, waa kà a yị Ịzẹhwanaya ka: 26Ẹnẹyịmavara ọ sị ọ dọ ọnọrụ ana aā hi Ijehoyada ịrẹsụ ka ọ̀ vị ohirẹsụ irehi Ohomorihi nị, dị a hịka ọnị ọ kụkụ vị ohirẹsụ avaba anụkọrọ irehi Ohomorihi booro aanị. Ụ ka ọnị ọ vị ụkọrọ anị ka avaba ọnụra anaa mẹ apẹ ka vị ẹnị aa kà ịsẹ nị. Ọ̀ tụ wa ịchẹkẹchẹkẹ dị ọ sị enyusẹ kara wa ọrọkọ nị. 27Ụ ka sị ẹ vẹ dị ẹ̀ yị vavọọ mẹ Ijeremaya ana vị anẹkụra ana aā hị́ Anatọtị? Ụ ka Ijeremaya ọnọọ aa kà ịrẹyị aza anka ọnịsẹ avọọ. 28Ụ ka aa nyị ka a za a irenu kwoku, agụvị ka ộ kà a yị aza ana a za ọrịhị ne hi Ịbabịrọnị ka ẹnịnị vee kù ịzọọ, agụvị avọọ ẹnịnị ẹ̀ dà irehi hi ịzọọ dị ẹ̀ ra ịnị anị, ẹnịnị ẹ̀ dà aarẹ hi ịzọọ dị ẹẹ rị ịsị ịnị aarẹ ẹnịnị. 29Ijeremaya ka Ịzẹhwanaya ộ ka ịrẹta ọnọọ zụ ọnị, 30dị Ẹnẹyịmavara va kà a yị ọnị ka 31ọnị ọ̀ tụ́ ụtụ ịrẹyị Isemaya ọnọnị hị́ avaba aza ana a za ọrịhị ne hi Ịbabịrọnị ka: Ẹnẹyịmavara kà, agụvị ka Isemaya ọ̀ va kà ụtụ ọnị ọnị ẹ̀ yị tụ ọ yị ụ nịnị, dị ọ mẹ ka wa sị ayị tụra ịrẹyị ireche nịnị nị. Avọọ ọnị Ẹnẹyịmavara kà: 32Re, ọnị vaa sị ụyaa rị Isemaya ana vị Anineherami ọnịrị evere anị; ẹ́ yị nyị aza ẹngụ anị ana vaa sị eyi re ịsị ọyịza ọnị ọnị vaa mẹẹ yị aza anị, agụvị ka ọ raa sị ịrẹyị irenu anị kụ̀ hịrẹ Ẹnẹyịmavara.
Currently Selected:
Ijeremaya 29: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
