Ijeremaya 26
26
 zá Ijeremaya na kụ́ irenu anị
1 #
2 Ohi 23.36—24.6; 2 Ịtọ 36.5-7 Â nyị ụmẹ ọnya ọnị Ijehoyakimi ozi Ijosaya sị rị ohinọyị Ijuda. Ijeremaya ka, cheechee ọnị ọ́ rị ohinọyị kẹnẹ. 2Dị Ẹnẹyịmavara kà a yị ọnị ka, ọnị ọ̀ na jẹẹ ịnị akakana irehi Ohomorihi nị. Ọ kà ọnị ọ̀ kà a yị aza anaa hụrẹ Ijuda vaa mẹ ahẹkẹ ịzọọ, avaba ụtụ ọnị ọnị tụ ọnị. Asị a nyị ọnị ọnị dà tịtẹ. 3Ẹnẹyịmavara kà ẹyịyara, ẹnịnị vaa wụ́, dị ẹẹ và hụụnị ebira odivi ẹnịnị. Ẹnịnị èe ro ịnẹ varẹma, ọnị vaa vàa hụụnị ẹngụ ọnị ọnị tenyi ka ọnị ee vu wa ẹtẹ agụvị ebira odivi ẹnịnị. 4Ijeremaya ka Ẹnẹyịmavara kà ọnị ọ̀ kà a yị aza ẹnẹẹ ka, ẹnịnị èe yị ka ẹnị ẹ́ yị wụ́ ịrẹyị ọnị Ẹnẹyịmavara, dị ẹnịnị ẹẹ saasa ọda ọnị ọnị sị yị wa nị, 5ẹnịnị ẹ̀ yị saasa ịrẹyị ezi ahụ anị ọnịsẹ nịnị ọnị ọ naa tụụ hi wa pooro dị ẹ ka ẹnị ẹ́ yị wụ aanị. 6#Ijos 18.1; Ahẹ 78.60; Ijer 7.12-14Ọnị vaa mẹ irehi anị ọnọnị anka ẹkụra ana aā hi Isiro avọọ. Dị ọnị mẹ ka avaba anẹhẹ ẹ̀ kụkụụ sị Ijerusarẹmị chìi hị́ aza. 7Ijeremaya maa kà ịrẹyị ẹnẹnị ịnị irehi Ẹnẹyịmavara Ohomorihi, dị ohirẹsụ irehi Ohomorihi nịnị, ọnịsẹ nịnị ẹnịrị avaba aza wụ ọ nị. 8Ịjị avaba ụtụ ọnị Ẹnẹyịmavara tụ Ijeremaya taa ka kẹnẹ, dị ohirẹsụ irehi Ohomorihi nịnị, ọnịsẹ nịnị ẹnịrị avaba aza zaa, dị ẹ ka, vị ẹnị aa wụ̀ ọ nị. 9Ẹ ka, sị ẹ vẹ dị ọ ka Ẹnẹyịmavara ọ tụ ọnị ka ọnị ọ̀ kà a ka, irehi Ohomorihi ẹnịị vaa yà anka Isiro? Sị ẹ vẹ dị ọ ka e vee vu Ijerusarẹmị ẹtẹ dị ọza ẹ yị ma vana ra ịnị anị? Ijeremaya ka, dị aza họ̀gụ kara ọnị nị. 10Ijeremaya ka ịjị ẹnị ọdọvịdị ẹkụra wụ ịsị ana mẹ, dị ẹnịnị hụụnị irehi ohinọyị va ngụ ịnị irehi Ohomorihi nị. Ẹ va sị ngụ ịnị irehi Ohomorihi, dị ẹ yaatụ enoze ọwọọwa ana a zịị ngụ ịnị irehi Ohomorihi nị. 11Ẹ sị yaatụ kẹnẹ, dị ẹnị ohirẹsụ irehi Ohomorihi ẹnịrị ọnịsẹ nịnị kà a yị ọdọvịdị ẹnẹnị ẹnịrị avaba aza ka: Aa nyị ka à mẹ̀ ọkarẹyị isu yị ọnị agụvị ịrẹyị ọnị ọ sị irenu anị kà hị́ Ijerusarẹmị nị. Ẹ ka ọzọza ộ wụ ọnị mẹ kà a. 12Ijeremaya ka, dị ọnị kà a yị ẹnị ọdọvịdị ẹnẹnị ẹnịrị avaba aza ana vọ ka ụtụ ọnị Ẹnẹyịmavara tụ ọnị ịnị ịpa Irehi Ohomorihi ọnọnị ọnịrị ẹkụra ọnọnị, ụ wụ ka ọnị ộ kà avọọ nị. 13Ọ kà, aa nyị ka wa vara ẹhẹ ọnị waa ra nịnị ọnịrị ịsa ọnị waa mẹ nịnị, dị waa saasa ịrẹyị Ẹnẹyịmavara Ohomorihi awụ nịnị. Wàa vavọọ mẹ nịnị, ẹ́ yị kuku vee vu u nịnị ẹtẹ anka ọ mẹ kà a. 14Ijeremaya ka, aa vị ọnịị yọ, ọnị yà ịnị ụvọ ẹnịnị. Ọ kà ẹnịnị ẹ̀ mẹ̀ ọnị ịsị ee zee wa eyi, èe ro ka ọọ vavọọ zoza dị ọ vọrọ nị. 15Ọ kà, ama ẹnịnị ẹ̀ yẹ ọsọnị ka, ẹnịnị ẹ̀ẹ wụ ọnị ẹnịrị avaba Anijerusarẹmị vaa rị ịvị ka ẹnị ệ wụ̀ ọza ẹnẹ ẹ̀ yị nyị ịsị ọ mẹ. Ẹnẹyịmavara ọ ka ọnị ọ̀ va maanị kà wa ọnọ nị. 16Dị ẹnị ọdọvịdị nịnị ẹnịrị aza ana vọ va kà a yị ẹnị ohirẹsụ irehi Ohomorihi ẹnịrị ọnịsẹ nịnị ka, ẹ́ yị vọrọ ka à wụ̀ ọza ọnọnị o. Ka ịrẹyị Ẹnẹyịmavara Ohomorihii ẹnịnị ọ va ka yị ẹnị nị. 17Dị azọkụ ẹnyị ẹnị rẹ va kwẹẹtẹ, dị ẹ kà a yị aza ana gụ ka, 18#Imi 3.12Ụmẹ ọnị Ihezekaya sị vị ohinọyị Ijuda, ọnịsẹ ana aā hị́ Imika hụrị ẹtẹ Imoreseti ộ ka ịrẹyị Ẹnẹyịmavara Ochẹtẹẹngụ yị avaba aza ka: E vee hùru anka a mee huru aarẹ avọọ, ọ ka, a vaa jị Ijerusarẹmị eburu saka-saka dị Irehi Ohomorihi kụkụ vara iruku tịtẹ. 19Ihezekaya ohinọyị Ijuda ọnịrị Anịjuda nịnị ẹ́ yị hụvị avọọ wụ ọ. Ama Ihezekaya ô hí angwa Ẹnẹyịmavara dị ọ dá ịpẹ yọ nị. Ịzẹyịza Ẹnẹyịmavara ộ và hụụnị avaba ụya ọnị ọ ka ọnị aa sịị rị wa. Ẹ ka, vị ẹnị aa vaa kụ ẹngụkata odivi tù ẹngụ ẹnịnị aanị nị ọ. 20Â nyị ọnọrụ ọnya aanị ana aā hị́ Uriya, ozi ọnọrụ ana aā hị́ Isemaya ọvị nị, dị ọ rẹ vị anẹkụra ana aā hị́ Ikiriyati-Ijeyarimi nị. Ọnị ọ rẹ vịdị va maanị kà ịsẹ da, dị ọ ka Ẹnẹyịmavara ọ tụ ọnị nị. Ẹngụ ịrẹyị ọnị Ijeremaya kà gẹdẹ-gẹdẹ ịnị oze irehi Ohomorihi ọnịrị ẹkụra (Ijerusarẹmị) ọnọnị aanị ọnị rẹ kà nị. 21Ịjị ohinọyị Ijehoyakimi ọnịrị isoja anị nịnị beri ẹnị ọdọvịdị nịnị wụ́ ịrẹyị ọnị Uriya kà, dị eyee sì ọ ka ẹnị aa wụ̀ ọ nị. Ama Uriya ộ wụ ọ dị ó zwe na tẹ̀ Ijipiti nị agụvị ka angwa ee hí ọ. 22Ohinọyị Ijehoyakimi ộ tụ́ ọnọrụ ana aā hị́ Ẹrinata ozi Akịbọ ọnịrị aza ẹnyị aanị nọ Ijipiti, dị ẹ na zá Uriya nị. 23Ẹnịnị ệ sị ọ ve tu ohinọyị Ijehoyakimi, dị ọ ka à wụ ọ dị è ne oku anị tụ ịzị ee ne avaba azaa hi nị. 24Ijeremaya ka, agụvị ka ọnọrụ ana aā hị́ Ahikami ozi Isahwani ộ jẹẹ ọnị ịrẹma, ọza ẹ yị rẹ va sị ọnị chire aza ụvọ ka ana wụ ọnị.
Currently Selected:
Ijeremaya 26: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
