Ijeremaya 25

Ijuda vaa sẹ ẹdụ

1 # 2 Ohi 24.1; 2 Ịtọ 36.5-7; Ịda 1.1,2 Ana tụ ọ ịrayị ọhụna ọnị Ijehoyakimi ozi Ijosaya sị rị ohinọyị Ijuda, Ijeremaya ka Ẹnẹyịmavara ộ kà ịrẹyị yị ọnị ịnị ịpa Anijuda nịnị. Ụmẹ ọnọọ ọ vị ịrayị ịpaapa ọnị Inebukadineza nyima aa mẹ ohinọyị Ịbabịrọnị nị. 2Ijeremaya ana vị ọnịsẹ ộ kà a yị avaba Anijuda ọnị Ijerusarẹmị ka: 3Ọ sị mẹ ịrayị ohurẹẹta ọnị Ẹnẹyịmavara hụrẹ ee pe ọnị kà ịrẹyị. Hụrị ịrayị ẹwụrẹta ọnị Ijosaya ozi Amọnị sị vị ohinọyị Ijuda pooro va ngụ ajịnị ọ́ vavọọ aa kà ịrẹyị yị ọnị nị. Ijeremaya ka, ẹ́ yị nyị ịsị Ẹnẹyịmavara kà yị ọnị ọnị ẹ̀ yị kà yị wa. Ama wẹ yị wụ nịnị. 4Ẹnẹyịmavara ộ tụ ezi ahụ anị, ọnịsẹ nịnị hi wu nịnị pooro, wee yi ka wẹ yị sị ụtọ pe ẹtẹ dị wa wụ nịnị. 5Ọnịsẹ ẹnẹẹ ệ kà a wụ nịnị ka wa và hụụnị ẹhẹ odivi ọnị waa rá nịnị ọnịrị ebira odivi ọnị waa mẹ nịnị. Ẹ ka wa và hụụnị anị nịnị agụvị dị wa yị zụụ ra ịnị ẹtẹ ọnị Ẹnẹyịmavara sị yị ẹwụrị ohiku awụ nịnị pooro aanị. 6Ọnịsẹ ẹnẹẹ ka asị ụ rẹ hẹkẹ ori nịnị, dị asị ụ kụ hẹkẹ wa nịnị ka ụ va sị ịsa ọnị ụ sị ụvọ awụ nịnị mẹ mẹ ayị kụ Ẹnẹyịmavara nịnị. Wàa yaanị saasa ịrẹyị Ẹnẹyịmavara nịnị, ẹ́ yị yaanị sị ụya rị ụ nịnị. 7Ama Ẹnẹyịmavara kà wee yi ka wẹ yị wụ́ ịrẹyị anị nịnị. Waa mẹ ka ọnị ọ̀ kụ ayị hi u nịnị agụvị ori awụ nịnị, dị ụ sị kụ ụya tu ẹngụ awụ nịnị nị. 8Avọọ Ẹnẹyịmavara Ochẹtẹẹngụ ka, agụvị ka wẹ yị saasa ịrẹyị anị nịnị. 9Ọnị vaa tụ́ụ hị́ avaba aza ene hi Ịbabịrọnị ọnịrị ozi ahụ anị, Inebukadineza, ohinọyị Ịbabịrọnị ka ẹ̀ kụ ịrẹkụ va ngụ Ijuda. E vee pè avaba aza ene hi Ijuda ọnịrị avaba ẹkụra ana kara waa kụ̀ ịrẹkụ. Ẹnẹyịmavara kà ọnị vee vu Ijuda ọnịrị aza ana kara wa ẹtẹ saka-saka ana ahịka aza èe ré e angwa vị ene vee hí wa pooro zịna-zịna. 10#Ijer 7.34; 16.9; Ẹtẹ 18.22,23Ọ kà ọnị ẹ yị ma vana zẹẹ ka à wụ́ ọngwẹ ẹnịnị ka eyee hine ayị; ọza ẹ yị ma vana wụ́ ọngwẹ ẹnị ka ẹ yaa jẹ agụvị ẹvarose anaa nyị ẹngụ nị. Ọza ẹ yị ma vana wụ́ ka ẹyaa kwọ ịsa. Ịra ẹ yị ma vana za ịnị ozotupa ẹnịnị. 11#2 Ịtọ 36.21; Ijer 29.10; Ịda 9.2Ẹnẹyịmavara kà, avaba ẹtẹ Ijerusarẹmị vị ana vaa jị eburu. Avaba aza ana ra kara a vanaa kụ hẹkẹ ohinọyị Ịbabịrọnị mẹ ịrayị ẹtarẹwụ. 12Ọ̀vavẹ ịrẹma anị, dị ọnị vaa sị ụyaa rị ohinọyị Ịbabịrọnị ọnịrị ẹkụra anị agụvị ebira odivi ẹnịnị. Ọ kà ọnị vee vu ẹkụra ọnọọ ẹtẹ dị ọnị jị ọ eburu tịtẹ pooro nị. 13Ẹnẹyịmavara kà avaba ẹngụkata odivi ọnị ọnị wo oto ka ọnị vaa kụụ tu ẹkụra ẹnẹnị ịnị ịrẹyị ọnị ọnị ka yị Ijeremaya avọọ, ọnị vaa sị sị ụyaa rị Ịbabịrọnị nị. Á mẹ chẹrẹ ẹ tụ ịnị iwe gẹdẹ-gẹdẹ avọọ ọnị vaa mẹ̀ ẹ nị. 14Ọ kà ọnị vee si Ịbabịrọnị ụta avaba ịsị ẹ mẹ. Anẹkụra ọrụrụ-ọrụrụ ẹnịrị ohinọyị ẹbanyị-ẹbanyị vaa za wa ọrịhị.

Ọkarẹyị Ohomorihi yị Anẹkụra nịnị.

15Ẹnẹyịmavara, Ohomorihi Anisirẹrị ộ kà a yị Ijeremaya ka, ọ̀ dọ ịpa eche ọnị ọnị và ọyịkụ anị hi aanị hụrẹ ọnị ụvọ. Ọ kà Ijeremaya ọ̀ sị ọ ne tu avaba anẹkụra ọnị ọnị ọọ tụ ọ hi, dị ọ̀ mẹ ka ẹnịnị è hú ọ. 16Ọ kà ẹnịnị ee hú ịnị anị, ọ vaa mẹrị wa, dị ẹnịnị ẹ́ yị kụkụ yẹ ịsị ẹyaa mẹ, agụvị ka ọnị aa kụ́ ịrẹkụ nee tù wa. 17Ijeremaya ka, ịzẹyịza dị ọnị dọ ako ọnọọ hụụnị ụvọ Ẹnẹyịmavara nị. Ọnị ộ sị ọ ne tu avaba anẹkụra ọnị Ẹnẹyịmavara tụ́ ọnị hi, dị ọnị mẹ ka ẹnịnị è hú ịnị anị nị. 18Ọnị ộ sị ọ ne tu Anijerusarẹmị ọnịrị avaba ẹkụra ene hi Ijuda, beri ohinọyị ẹnịnị ọnịrị ọdọvịdị ẹnịnị, dị á mẹ ka avaba ẹnịnị è hú ịnị anị nị. Dị ẹnịnị hụ́ hụrị ẹkụra nị. Aza ene re e vị ọnị ọ́ za zizi dị angwa ee hí wa. Dị aza kụkụ aa sị ịrẹha ẹnịnịị chii hị́ aza pooro ve tu ajịnị nị. 19Avaba aza ẹnẹnị ya ịnị aza ene hú eche ịnị ako ọnọọ. Ihwarawo, ohinọyị Ijipiti ọnịrị ezi ahụ nịnị. 20Ẹnị ọdọvịdị Ijipiti, avaba Anijipiti nịnị ọnịrị azọga ana ra beri wa, avaba ohinọyị ẹtụ Uzi ẹnịrị avaba ohinọyị ẹtẹ Anihwirisiti (ẹtẹ Anihwirisiti ẹnẹẹ ẹ vị Asikeroni, Igaza, Ekironi, ọnịrị ana vọ ẹtẹ Asidodi nị). 21Ẹtẹ Edomi, Imowabi, ẹnịrị ezi Amọnị; 22Avaba ohinọyị ẹtẹ Ịtaya, avaba ohinọyị ẹtẹ Ịsịdọnị ẹnịrị ohinọyị ẹkụra ene hi ụtọ oku nịnị; 23ẹtẹ Ịdẹdanị, Ịtẹma, Ibuzi ẹnịrị avaba aza anaā yẹrẹ ụtọ-ụtọ ẹyị ẹnịnị; 24avaba ohinọyị Anarebiya ẹnịrị avaba ohinọyị aza anaa kà ẹkụra irenyi-irenyi ene dudu ra hi ịnị ẹtẹ aarẹ-aarẹ. 25Avaba ohinọyị ẹtẹ Izimiri, avaba ohinọyị ẹtẹ Eraami, ẹnịrị avaba ohinọyị ẹtẹ Imediya: 26avaba ohinọyị Ịbabịrọnị ana ya aha ene noze ọnịrị ana gụrị ẹtẹ, ikonya-ikonya, ọnịrị avaba ohinọyị ene hi ẹhẹ ọnọnị. Ịrẹma ẹnịnị dị ohinọyị Ịbabịrọnị ọnị ò re ve hú. 27Dị Ẹnẹyịmavara kà a yị Ijeremaya ka ọ̀ kà a yị yị avaba aza ka, ọnị Ẹnẹyịmavara Ochẹtẹẹngụ, Ohomorihi Anisirẹrị ọọ mẹ ọda yị wa ka ẹnịnị è hú eche ọnọnị ne tu ịjị aa mẹrị wa dị ẹyaa hẹrẹ nị, ẹ̀ vavọọ hú ọ ne tu ka ẹnịnị ẹ̀ sẹ ẹdụ dị asị ẹ́ kụkụ zụ kwẹẹtẹ, agụvị ka ọnị aa kụ́ ịrẹkụ nee tù wa. 28Ọ kà ẹnịnị ẹẹ ka ẹnị ẹ́ yị dọ ako ọnọọ hụrị Ijeremaya ụvọ dị ẹnị è hú eche ọnọọ, ọ̀ kà a yị wa ka Ẹnẹyịmavara Ochẹtẹẹngụ ọ sị ọ ka ka, ẹnịnị ee sì, ee yi, vị eyee hú ọ nị. 29Ọ kà, ọnị òo nyima hụrị ẹkụra anị Ijerusarẹmị dị ọnị ee vú ọ ẹtẹ nị, ẹnịnị ana vọ ee rò ka ẹnị ẹ zụ mẹ ka ẹnị ẹ́ yị rị ụya? Éyiye de, ẹnịnị vaa rị ụya, agụvị ka ọnị vaa kụ́ ịrẹkụụ tù avaba anẹhẹ. 30Ẹnẹyịmavara kà asị a nyị ka Ijeremaya ẹ́ yị kà avaba ịrẹyị ọnị ọnị kà yọ o. Ọ kà ọ̀ kà a yị avaba aza ẹnẹnị ka, Ẹnẹyịmavara vaa ya ẹbẹẹba dị ọ nowu dị ọ rị ịnyanya hụrị ẹbẹẹba kere-kere, o vee nowu ku aza, dị ọ nowu anka ọza anaa dụ uye avọọ. Avaba ọza vaa wụ̀ ọ ọngwẹ. 31Avaba ẹhẹ vaa dọ ọ ọngwẹ Ẹnẹyịmavara ọnịrị avaba anẹkụra ẹẹ nyị ịrẹyị, ọ vaa mẹ̀ ọkarẹyị yị avaba aza, dị ọ wụ̀ avaba aza edivi ha. 32Ẹnẹyịmavara Ochẹtẹẹngụ ka ịrẹyị odivi aa kà ẹkụra Ikonya-ikonyara vẹ. Opomi ọbanyị o si nyima aa kụ ụ gụ ịnị ẹhẹ. 33Ịhị ẹkụhị ọnọọ oo tu, oku aza ọnị Ẹnẹyịmavara wụ vị ana a vaa gara hi avaba ịrẹsụ ẹtẹ, ọza ẹ yị vaa zị ẹngụ ẹnịnị, ọza ẹ yị vaa kụ wa nee ne. Oku ẹnịnị vi ene vee hi ẹtẹ anka ịhyẹrẹ ịsụpa avọọ ịnị eteesu. 34Ẹnẹyịmavara kà, ẹwụ nịnị ọdọvịdị enee sere aza anị anka oseratẹmẹ avọọ ọọ jị òrèrè boro-boro. Waa zị ẹngụ nịnị dị wa kụ ẹngụ awụ nịnị muna ezi. Ụmẹ ana a va sii wụ̀ wụ nịnị o si tù. Vị a vaa wụ̀ wụ nịnị anka ịdẹba avọọ nị. 35We yị vee re oze zwe nịnị. 36Wú oseratẹmẹ nịnị maa jị òrèrè, dị ẹnị ọdọvịdị aza ee nowu ayị ẹnịnị mee du, agụvị ka Ẹnẹyịmavara ee du ịzị ịsụpa ẹnịnị naa rị avịị ha. 37Ka Ẹnẹyịmavara aa kụ ayị, ịzị ịsụpa ẹnịnị naa rị avị ohwoohu ẹngwọọrọ-ẹngwọọrọ vị ọnị o ve vú ẹtẹ. 38Ẹnẹyịmavara ọ raa para aza anị hu anka idu mẹẹ jịnẹ hụụ ịzị ọ yà avọọ. Ịrẹkụ ọnịrị ọyịkụ Ẹnẹyịmavara ọ sị ẹkụra ẹnịnị tụ osusu.

Currently Selected:

Ijeremaya 25: EBTP

Highlight

Copy

Compare