Ijeremaya 23
23
Enube eyọtụra
1Ẹnẹyịmavara kà, oseratẹmẹ nịnị ana a wụ̀ aza anịị ha, dị ẹyaa gara wa aanị, ẹ sị da. 2Ẹnẹyịmavara, Ohomorihi Anisirẹrị nịnị aa ka ẹ yị oseratẹmẹ nịnị ana vọrọ ka ẹẹ tẹsị aza anị ka: Wẹ yị tẹsị aza anị nịnị, Wa sị wa gara nịnị: wa raa dụ wa hi ozi nịnị. Booro aanị, ọnị aa vaa sị ụya avaba ebira odivi ọnị ụ mẹẹ rị ụ nịnị. 3Ọ kà ọnị aa vaa kụ aza anịị gụ hụrị avaba ẹkụra ọnị ọnị dụ wa ne hi, dị ọnị kụ wa vavẹ eehi ẹnịnị. Ẹnịnị vaa mẹ ozi ọrụrụ-ọrụrụ, dị ẹyaa rụrụ hu avọọ. 4Ọnị vaa nyị ohinọyịị yị wa ana vaa tẹsị ẹnịnị. Aza anị ẹ yị kụkụ vee hí angwa, ayị ẹ yị kụkụ vaa hụrẹ wa ịnẹ. Ọ kà ọnị ẹ yị kụkụ vaa sị ụyaa rị wa. 5#Ijer 33.14-16Ẹnẹyịmavara kà, ụmẹ aa vẹ ọnị ọnị vaa nyị ozi Idevidi ọnya ana vị ọnịrẹyịzẹyịza ka ọ̀ vị ohinọyị. Ọ vaa sị ịzẹyịza mẹ ohinọyị, dị aa mẹ̀ ịsa ana vọrọ ọnịrị ịzẹyịza ịnị avaba ẹtẹ anị. 6Ịjị ọọ raa rị ohinọyị, ẹngụ anị Ijuda nịnị vee hi ahị, dị Anisirẹrị nịnị nyị ẹngwọọrọ. Ịrẹha anị ọ vaa rị Ẹnẹyịmavara ọ vị Amẹtẹrẹ Ayị nị. 7Ẹnẹyịmavara kà, ụmẹ aa vẹ ọnị aza ẹ̀ yị ma vana sị ọnị hị́ eku ka, Ohomorihi ana yára, ana kụ Anisirẹrị nịnị hụrị ẹtẹ Ijipiti vẹ. 8Ama ẹnịnị vanaa sị ọnịị hị́ eku anka Ohomorihi ana yára ana kụ Anisirẹrị nịnị hụrị ẹtẹ Ịbabịrọnị ọnịrị avaba aha ọnị ọnị dụ wa ne hi vẹ. Ẹnịnị vaa ra ịnị ẹtẹ ẹnịnị.
Ọkarẹyị Ohomorihi yị ọnịsẹ ireche nịnị.
9Ijeremaya ka, ayị anị ọ sị sị rugurugu. Ẹngụ anị aa dá ẹgahị. Ọnị ragaragaa zị ọza ene eche aa mẹrị avọọ. Ẹnẹyịmavara ọnịrị ịrẹyị ọnị ọ kà, ọnị kụkụ sị mẹ anka ọza ene hú eche ẹnẹmẹhị dị aa mẹrị ọ avọọ nị. 10Aza ẹnẹ ẹ̀ yị mẹ ịzẹyịza hị́ Ẹnẹyịmavara vị ana gụ ẹtẹ kẹnẹ ịnị ẹkụra. Ẹnịnị aa mẹ̀ ebira odivi-odivi, dị ẹyaa sị ụkata ẹnịnịị mẹ ịsị ẹnẹ ẹ̀ yị vọrọ nị. Ẹnẹyịmavara o ree chi hi ẹtẹ ẹnịnị, dị ẹtẹ ẹnịnị aa rị ụya nị. Ịzị ịsụpa nịnị naa rị avị ọ sị wụ. 11Ẹnẹyịmavara kà, ọnịsẹ nịnị ẹnịrị ohirẹsụ ireehi Ohomorihi nịnị bẹẹ ẹ yị mẹ ịsị e zee Ohomorihi eyi. Aza edivi ẹ vị nị. Ọ kà ọnị ộ za wa ẹ́ maa mẹ̀ ịsị odivi ịnị irehi anị bẹẹ. 12Ọ kà agụvị avọọ, oze ẹnẹ ẹyaa vaa tụra vị ana vaa swa wa ọsịrị. A vaa dụ wa ngụ ịrahụ, dị ẹ sẹ ẹdụ va hi ẹtẹ. Ẹnẹyịmavara kà ọnị vaa kụ ẹngụkata odivi tù wa, ịjị ụmẹ ẹnẹ ẹ vaa sị rị ụya oo tu. 13Ẹnẹyịmavara kà ọnị ô re ebira odivi ọnị ọnịsẹ ene hi Isamariya aa mẹ. Ịrẹha Ịbaarị ẹyaa sị kà ịsẹ nị. Ẹnịnị ẹ raa kụ aza anị nyeeyi. 14#Oyn 18.20; Ezk 16.49Ama ọnị o ve re ka ịsị ọnị ọnịsẹ ene hi Ijerusarẹmị aa mẹ e divi hu nị. Ọsẹrẹka vị nị, dị eyee cheeche nị. Ẹnịnị aa gụ aza ụvọ ka ẹẹ mẹ̀ ịsa ẹnẹ ẹ yị vọrọ nị, agụvị avọọ, ẹ yị nyị ọza ana dọ ka ọnị ọ̀ hụụnị ebira odivi ọ̀ yị mẹ. Ẹnẹyịmavara kà ịnị eyi anị, avaba ẹnịnị vị ene divi anka Anisodọmị ọnị Igomora. 15Avọọ, Ẹnẹyịmavara Ochẹtẹẹngụ aa kà a yị ọnịsẹ ene hi Ijerusarẹmị ka, ọnị vaa sị avị ọnyịrẹyị yị waa rị, dị ọnị sị enyi ana nyị ẹchịpa yị wa ka e hú ọ. Ka ẹnịnị ẹ raa mẹ ka ebira odivi ọ̀ gara hi ẹtẹ avaba aha. 16Ẹnẹyịmavara Ochẹtẹẹngụ ộ kà a yị Anijerusarẹmị nịnị ka, Asị ẹ wụ́ ịrẹyị ọnị ọnịsẹ ẹnẹnị aa kà o; ịrẹyị ireche ẹyaa mẹ ka waa tụra eyi nịnị nị. Ọ kà, ịrẹyị ọnị ọnịsẹ ẹnẹnị rò tụ ịnị ayị ẹnịnị ẹyaa kà a yị wụ nịnị nị, ẹ yị vị ịsị ọnị kà yị wa. 17Ẹnẹyịmavara kà aza anaa sị eyi wụ ọnị vị ọnị ọnịsẹ ẹnẹnị aa kà a yị ka, asị ẹ hụrị ayịnẹ, ka Ẹnẹyịmavara kà ẹnịnị vaa nyị ẹngwọọrọ. Dị ẹyaa kà a yị avaba aza anaa mẹ ayị ọkatẹngụ ka ẹ yị nyị ịsị ẹ vaa kanyị wa nị. 18Ẹnị ọ vị ịnị ọnịsẹ ẹnẹnị ana nọ ịdị Ẹnẹyịmavara kà ọnị ọ̀ na wụ́ ịrẹyị anaa kà da? Ẹnẹ ka ọnị ọ wụ́ ịrẹyị anị kẹ? 19Re, Ẹnẹyịmavara àa kụ ayị, vị ọ sị mẹ anka opomi avọọ nị. Ọ vaa tụ́ ne ku aza edivi ịrẹsụ anka okoruwa avọọ nị. 20Ẹ́ yị vaa zaa jẹ ẹ̀ yị vị ọ raa mẹ avaba ịsa ọnị ò sì ka ọnị aa mẹ. Ịjị ụmẹ oo tu avaba ịrẹyị ọnọnị vee yé aza gedebee. 21Ẹnẹyịmavara kà, dị ọnịsẹ ẹnẹnị daka ee zwe echi dị ẹyaa kà ịsẹ ngwọọ zịịzị aanị, ọnị ẹ yị tụ wa ụtụ; ọnị ẹ yị kà ịrẹyị yị wa. 22Ọ kà ẹnịnị ẹ̀ẹ yaanị va wụ́ ịrẹyị anị, ịrẹyị anị ọnọọ ẹ yaanị aa kà yị aza anị nị: dị ẹẹ mẹ ka ẹnịnị ẹ̀ và hụrị oze odivi ẹnịnị nị. Aza anị yaanị sị và hụụnị ịsị odivi ẹnẹ ẹyaa mẹ. 23Ẹnẹyịmavara kà, Ohomorihi ana gụrị ẹtẹ kẹnẹ ọnị waa vana vị nị? 24Ọ kà áá nyị ọza ana zụ tẹ aha ewere ọnyọọnyị ka asị ọnị ré ọnị? Ọ kà áá nyị ịzị ọnị ẹ̀ yị yà ẹbẹẹba ọnịrị ịnị ẹhẹ ọnọnị kẹ? 25Ẹnẹyịmavara kà, ọnị ộ wụ ịsị ọnịsẹ nịnị anaa sị ịrẹha anịị cheeche ka vị ẹnị aa kà ịsẹ anị nị aa kà. Ẹnịnị ka ọnị ô tụ́ ẹnị ụtụ ịnị ụra ọnị ẹnị ra. 26Ịzị ọnịsẹ ẹnẹnị vaa maanịị sị ireche ẹngụ ẹnịnị kụ aza anịị nyeeyi naa za? 27Ọ kà ụra ẹnẹ ẹ ka ẹnị ệ ra ẹnẹ maanị aa kà aanị, vị ẹnị eyee sì ka ẹnị ẹ̀ sị mẹ ka aza anị è hí ayị anị, anka ohiku ẹnịnị me hi ayị anị di ẹ naa hẹkẹ Ịbaarị avọọ. 28Ẹnẹyịmavara kà, ọnịsẹ anaa ra ụra ọ̀ ka a ka ọnị ọ ra ụra, ama ọnịsẹ ọnị ọnị ọọ tụ ụtụ ẹ̀ sị ịzẹyịza na ka ụtụ anị. Ọ kà, sị ebe ọnịrị akụ si vị ọnyọọnya kẹ? 29Ọ kà ịrẹyị ọnị ọnị ka vị ana sị mẹ anka ịra avọọ, dị ọ rẹ sị mẹẹ anka ịhama ana sị chaka ịrẹta avọọ nị. 30Ẹnẹyịmavara kà ọnị ọ raa va eyirazị ka ẹnị ọnịsẹ anaa na wụ́ ịrẹyị hụụnị ụvọ ẹngụ dị ẹ naa kà a ka ọnị ọ tụ ẹnị ụtụ nị avọọ. 31Ọ kà ọnị ọ raa va eyirazị ka ẹnị ọnịsẹ anaa kà ụtụ ẹngụ ẹnịnị dị ẹ ka ọnị ọ tụ ẹnị ụtụ nị avọọ. 32Ẹnẹyịmavara kà, ịzẹyịza, ọnị ọ raa và eyirazị ka ẹnị ọnịsẹ enee cheeche ka vị ẹnị ra ụra aanị nị. Avọọ ẹ maa kà a dị ẹyaa sị ireche ẹbanyị-ẹbanyị ẹnịnị kụ aza anịị nyeeyi nị. Ama ọnị ẹ́ yị tụ wa ụtụ. Ẹ́ yị nyị aha ẹnịnị ana aza aa rị vụrụ-vụrụ.
Ụtụ ireche ọnịrị ọnịsẹ ireche nịnị
33Ẹnẹyịmavara ộ kà a yị Ijeremaya ka, àa nyị ọza ịnị ẹngụ aza anị, ọ̀ọ vị ọnịsẹ, ọ̀ọ vị ohirẹsụ irehi Ohomorihi ana họ̀ ọ use ka, ụtụ sị Ẹnẹyịmavara tụ́ kẹ? Ọ̀ kà a yị ọza ọnọọ ka ẹnya ẹ vị yị Ẹnẹyịmavara nị. Ẹnẹyịmavara vaa kụ wa kwooze. 34Ẹnẹyịmavara kà àa nyị ọza ịnị ẹngụ aza anị, ọ̀ọ vị ọnịsẹ, ọ̀ọ vị ohirẹsụ irehi Ohomorihi ana vana há irenu kà a ka ụtụ ọnị Ẹnẹyịmavara tụ́ ọnị yị, vị ọnị aa sị ụyaa rị ọza ọnọọ ọnịrị ovwoovu anị nị. 35Ama ọzọza ọ̀ naa họ̀ ọta anị ọnịrị anda ẹnịnị use ka, ohi sị Ẹnẹyịmavara va tụ da? Ọ́ mẹ vana va ka kẹ? 36Asị ẹnịnị vana kà a ka ụtụ ọnị Ẹnẹyịmavara tụ ọnị yị, ka vị aza kụkụ vavọọ aa kà dị ẹ̀ sị sị́ ụkata yị ịrẹyị ẹngụ ẹnị ụvọta nị. Dị ẹ kụkụ sị ịrẹyị Ohomorihi ẹnịnị ana yára, Ẹnẹyịmavara Ochẹtẹẹngụ va ịrẹsụ chi nị. 37Ẹnẹyịmavara kà Ijeremaya ọ̀ họ̀ ọnịsẹ nịnị use ka: ohi sị Ẹnẹyịmavara va tụ́ wa da? Ọ́ mẹ vana va ka kẹ? 38Ọ kà, ẹnịnị ẹ̀ yị saasa ọda anị, dị ẹ́ naa kà a ka ụtụ ọnị Ẹnẹyịmavara tụ́ yị nị; ọ̀ kà a yị wa ka. 39Ọnị Ẹnẹyịmavara vee hí ayị ẹnịnị saka-saka. Ọnị vee ne ẹnịrị ẹkụra ọnị ọnị sị yị ẹnịrị ohiku ẹnịnịị ta huu nị. 40Ọ kà, ọnị vaa mẹ ka à kụkụ mẹ wa isiya pooro zịna-zịna nị. Dị ọnị mẹ̀ ụhị nyị wa ọnị ẹnịnị ẹ̀ yị vee hi ayị anị paa.
Currently Selected:
Ijeremaya 23: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
