Ijeremaya 14

Ọyọjị odivi anaa vẹ

1Ịrẹyị ọnị Ẹnẹyịmavara kà yị Ijeremaya ịnị ịpa ọyọjị anaa vẹ yị. 2Ọ kà, Anijuda nịnị ẹ sị ẹngụ và hí; anẹkụra ẹnịnị eè su; ẹnịnị hi ịnị eteesu ee sụ ùnè, Anijerusarẹmị nịnị aa jị òrèrè boro-boro ka a vaa gụ ẹnị ụvọ. 3Aza ẹbanyị ẹnịnị ẹẹ tụ ezida ẹnịnị ka ẹ̀ na dà enyi vẹ, ệ nọ ịnị ịkangga, ẹnịnị e yi re enyi dà. Ụnọkọ osusu ẹ́ sị vavẹ nị. Ụhị aa nyị wa, ó si hí wa irenu, dị ẹ kụkụ aa sị eyi tẹ̀ nị. 4Ka orihi ẹ yị zụ̀, ẹtẹ ọ sị wụ, ayị ọkụrẹkụ nịnị e si du; ẹnịnị kụkụ aa sị eyi tẹ. 5Ùnè ene e yi ku ọnị o ma ozi, o si ozi anị hụrẹ ụvọ tụ ịnị ụnọmị agụvị ka ẹnịnị e yi re avị ẹnẹ yaa rị. 6Ịkẹrịkẹtẹ jẹẹ ịrẹsụ ataba aa tụ kẹẹkẹ anka irezi avọọ. Ẹnịnị e yi kuku re ẹtẹ ẹtẹẹrẹ agụvị ka ẹnịnị e re ịsa rị. 7Ẹnẹyịmavara kà, aza anị aa jị òrèrè ka, ịzẹyịza, ịvị ẹnịnị aa dọ ẹnị ivenu de, ama, ọnị navọ ọnị ọ̀ gu ẹnị ụvọ anka ọnị mẹ vịdị kà a. Ẹ ka, ụmẹ ọrụrụ-ọrụrụ ẹnị sị va ịrẹma Ẹnẹyịmavara nị, ẹnị ẹ raa rị ịvị anị. 8Ẹ ka, ọnị ọ vị ọyịtureyi Anisirẹrị nịnị nị, ọnị ọọ dọ ẹnị ha hụụnị ẹngụkata nị. Sị ẹ vẹ dị ọnị kụkụ sị mẹ anka ọzọga anaa jịnẹ dị ọ ha ka ọnị sụ̀ venẹẹhẹ avọọ yị ẹnị? 9Ẹ ka sị ẹ vẹ dị ọnị kụkụ sị mẹ anka ọza ọnị ịrẹyị hụrẹ hi avọọ? Dị ọnị aa mẹ anka isoja ẹnẹ ẹ yị nyị ụkata ọyị gụ ọza ụvọ avọọ? Ẹ ka, ịzẹyịza, ọnị Ẹnẹyịmavara jẹẹ pe ẹnị. Aza anị ẹnị vị nị, aarịhịnị asị ọnị hụrẹ ẹnị ụvọ. 10Ẹnẹyịmavara ộ ka a ịnị ịpa aza ẹnẹnị ka, ẹnịnị ee sì ka ẹnị ee zwee hụrẹ ọnị ẹngụ, ẹnịnị ẹ́ ma sị ụvọ za ẹngụ ẹnịnị; avọ ayị anị e yi kuku hine tu wa. Ọnị vaa tamayị avaba ịrẹyị ọhịmị ọnị ẹ mẹ dị ọnị ọ̀ sị ụya anị rị wa ọ yaa nị. 11Ijeremaya ka Ẹnẹyịmavara ộ ka ẹ yị ọnị ka asị ọnị mẹ̀ aduwa ka ọnị ọ̀ mẹ ọgụvọ yị aza ẹnẹnị. 12Ka, ẹnịnị ẹ̀ẹ daka ba awẹ, ọnị ẹ yị vaa wụ́ orere ẹnị ẹyaa jị ka à va gụ ẹnị ụvọ avọọ. Ẹnịnị ẹ̀ẹ daka mẹ̀ ịsọvọ dị a rị ọ ịra yị ọnị nị, dị ẹ́ sị ịsa ọnị irenuu rị va mẹ̀ ịsọvọ yị ọnị nị, ayị anị ẹ yị vee hine tu wa. Ọ kà, eyi ịrẹkụ ọnị va naa wụ̀ wa ha nị. Dị ọnị rẹ sị ụngwẹ ọnịrị ụkụ wụ̀ wa va ha. 13Ijeremaya ka, dị ọnị kà a yị Ẹnẹyịmavara Ochẹtẹẹngụ ka, tee, ọọ yẹ ka ọnịsẹ ana vọ nịnị vanaa kà a yị. Anijuda nịnị ka ẹ́ yị vaa nyị ịrẹkụ ọnịrị ka ụngwẹ ẹ́ yị rẹ vaa kụ̀ wa. Ẹnịnị ka waa vị dị sị ọ ka ka ẹngwọọrọ ọ́ vaa vị̀ị yị wa ịnị ẹtẹ ẹnịnị nị. 14Ama dị Ẹnẹyịmavara tụ ohi ka, ọnịsẹ ẹnẹẹ vi enee cheeche ka maa tụ ẹnị ụtụ. Ọ kà ọnị ẹ́ yị tụ wa ụtụ, ọnị ọ yị rẹ mẹ ọda ọnyọọnyị yị wa. Ẹnẹyịmavara kà ọnị ẹ yị nyị ụvọ tụ ịnị ẹtẹ ẹnẹ ẹ ka ẹnị ee re zị; ịsẹ ẹnẹ ẹ yaa ka vị ịrẹyị kẹnẹ-kẹnẹ ẹnẹ ẹ yaa sị ayị ẹnịnịị rò. 15Ẹnẹyịmavara kà, ọnị aa ka ịsị ọnị vaa mẹ ọnịsẹ ẹnẹẹ ọnị ọnị ẹ yị tụ ụtụ ama dị ẹ naa ka a zị ka ịrẹkụ ẹ yị vaa ngụ ẹkụra; ụngwẹ ẹ yị rẹ vaa ngụ ịzọọ bẹẹ. Eyi ịrẹkụ ọnị vaa wụ̀ wa, dị ọnị sị ụngwẹ wụ̀ ẹnị ana vọ nị. 16Oze ọnyọọnya á va zịị wụ̀ aza ẹnẹnị ẹnẹ ẹ maanị kà ịrẹyị ẹnẹnị aanị nị. Oku ẹnịnị vị ana a vaa kụụ vaa hi oze ene hi Ijerusarẹmị, ẹ yị vaa nyị ọza ene vee ne wa. Aanị a mẹ vaa mẹ avaba ẹnịnị beri ose ẹnịnị ọnịrị ezi ẹnịnị nị. Ẹnẹyịmavara kà, ọnị vaa mẹ ka ẹnịnị ẹ̀ rị ụya avaba ebira odivi ẹnịnị. 17Ijeremaya ka, Ẹnẹyịmavara ộ kà a yị ọnị ka, ọnị ọ̀ kà a yị Anijuda nịnị ịsị ẹ vị ayodu anị, dị ọnị ọ̀ kà a ka, aanị eyi anị mẹ vaa ka ẹgọ, ọọdụ ọnịrị ịrahụ nị, ọnị ẹ yị hụụnị orere ọ̀ yị jị, agụvị ka aza anị ẹ́ raa tụ ụnava ngọtọọ, ịrẹyị odivi ô tù wa. 18Ọ kà, ọnị ộ nọ ịnị aarẹ, dị ọnị re oku aza ana wụ̀ va hi ẹtẹ eyi ịrẹkụ. Ịjị ọnị va nọ ịnị ẹkụra, ọnị ee re ụngwẹ maa wụ̀ azaa vaa hi ẹtẹ. Ọ kà, ọnịsẹ nịnị ẹnịrị ohirẹsụ irehi Ohomorihi aa yịị mẹ̀ ụkọrọ ẹnịnị, ama ẹnịnị ẹ yị yẹ ịsị ẹ yaa mẹ.

Anijuda nịnị ệ dá ịpẹ yị Ẹnẹyịmavara

19Anijuda nịnị ka tee! Vị Ẹnẹyịmavara wa kụkụ sị ẹnị yi tịtẹ samị-samị nị? Ẹ ka, vị Ẹnẹyịmavara waa kụkụ nyị ịhyẹrẹ Anịzayọnị nịnị nị? Sị ẹ vẹ dị ọ maanị kụ ẹngụkata odivi tu ẹnị ka, asị ẹngụ ẹnịnị zụ nịya? Ẹnị ee zi ka ẹnị a vaa nyị ẹngwọọrọ, ama ẹ yị nyị ịsị ọyịza anaa mẹẹ tu ẹnị vụrụ-vụrụ. Ẹnị èe zị ka ẹngụ ẹnịnị aa vaa nịya, dị ahịka ayịhụrịnẹ ọ rẹ vẹ nị. 20Ẹ ka, ẹnị ệ dọ irenu ebira odivi ẹnịnị ọnịrị ebira odivi ohiku ẹnịnị ka ẹnị ệ rị ịvị Ẹnẹyịmavara. 21Ẹ ka Ẹnẹyịmavara ọ̀ navọ, ọ̀ tamayị ịrẹyị ọnị ọ́ ka, dị asị o sị eyi para ẹnị hu. Ẹ ka aarịhịnị asị ọ maanị mẹ̀ ụhị nyị Ijerusarẹmị, ịzị ọ sị aga ohinọyị anị ana maanị nyị ụbanyị hi ẹtẹ. Ẹnẹyịmavara ọ̀ navọ asị và hụụnị ịrẹyị ọnị ọnịrị Anịjuda nịnị dọ beri ẹngụ tụ ịnị anị. 22Ẹ yị nyị ori Anẹkụra ọnyọọnyị ana zụ zụ̀ ori; eguhi ụvọta ẹ yị zụ mẹ ka orihi ọ̀ zụ̀. Anijuda nịnị ka, tee! Ẹnẹyịmavara ana vị Ohomorihi ẹnịnị ẹnị zi eyi nị, agụvị ka ọyịnyara ọọ̄ mẹ̀ ịsa ẹnẹnị nị.

Currently Selected:

Ijeremaya 14: EBTP

Highlight

Copy

Compare