Ijeremaya 13
13
Ụbaja anaā sịị sụ́ ọtẹ
1Ijeremaya ka Ẹnẹyịmavara ộ kà a yị ọnị ka, ọnị ọ̀ na hị́ ụbaja anaā sịị̄ sụ́ ọtẹ dị ọnị ọ̀ sị sụ́ ọtẹ anị: Ama asị ọnị nyịna a. 2Ịzẹyịza dị ọnị na hị́ ọ dị ọnị sị sụ́ ọtẹ anka ọ mẹ kà a yị ọnị nị. 3Dị Ẹnẹyịmavara kà a yị ọnị ụpọhụva ka, 4Ọnị ọ̀ kwẹẹtẹ dị ọnị ọ̀ sị ụbaja ọnị ọnị na hị́ di ọnị sị sụ́ ọtẹ aanị nị. Ọ kà ọnị ọ̀ nọ ụtọ irehu ana aā hí Iyuhwuretisi dị ọnị ọ̀ sị na tẹ̀ ịnị anaha ịrẹta ịzọọ. 5Ịzẹyịza dị ọnị na, dị ọnị sị ụbaja ọnọọ na tẹ̀ ụtọ Iyuhwuretisi anka Ẹnẹyịmavara mẹ kà a yị ọnị nị. 6Ộ da ku-da ku, dị Ẹnẹyịmavara kà a yị ọnị ka ọnị ọ̀ varẹma nọ ụtọ Iyuhwuretisi nị. Ọ kà ọnị ọ̀ na sị ụbaja ọnị ọnị vịdị kà a ka ọnị ọ̀ sị na tẹ̀ ịzọọ. 7Ịzẹyịza dị ọnị varẹma na, dị ọnị re ịzị ọnị sị ọ tẹ tụ nị. Ọnị ô ne tu ka ụbaja ọnọọ o si du ha, ẹ yị nyị ịsị ọ kụkụ rụra mẹ. 8Dị Ẹnẹyịmavara va kà a yị ọnị ka 9Aanị ọnị mẹ vee du avaba ịsa ọnị Anijuda ọnịrị Anijerusarẹmị nịnị aa sị mẹ̀ eyii zịị ha nị. 10Ọ kà aza edivi ẹnẹnị ê yi ka ẹnị ẹ yị saasa ịrẹyị anị. Ayị ẹnịnị ộ katẹngụ, dị ẹ vị ẹnịrị ebira odivi nị. Ẹnịnị ẹ naa tanaa tụra ẹtẹ yị ori nịnị, dị ẹ yaa hẹkẹ wa nị. Agụvị avọọ, ẹnịnị vị ana vaa sị mẹ̀ ẹ anka ụbaja anaā sịị sụ́ ọtẹ ẹnẹ ẹ yị nyị ịsị ọkụkụ rụra mẹ aanị. 11Ẹnẹyịmavara kà, Anisirẹrị ọnịrị Anijuda nịnị vị ọnị ọnị sì ka ẹ sị ụvọ za ọnị bịrị-bịrị anka a mẹẹ̄ sị ụbaja sụ́ ọtẹ avọọ. Ọ kà, agụvị ka vi ọnị sì ka ẹnịnị ẹ̀ vị aza anị, dị ẹnịnị ẹẹ sị ụga ọnịrị ụbanyị yị ịrẹha anị nị. Ama ẹnịnị ẹ yị ma saasa ịrẹyị anị.
Ụya anaa vẹ
12Ọ kà Ijeremaya ọ̀ kà a yị wa ka, Ẹnẹyịmavara, Ohomorihi Anisirẹrị nịnị ka, avaba okoko eche ẹnịnị vaa vị ohihi yị eche. Ẹnịnị ve tụ́ ohi ka, aanị ka vị ẹnị ẹ yị vịdị yẹ ka avaba okoko eche ẹnịnị vee hi yị eche nị? 13Ọ kà ịjọnọọ, dị Ijeremaya vaa ka ẹ yị wa ọgọnị ka ọnị Ẹnẹyịmavara vaa và avaba anẹkụra ọnọnịị zí anka aza ana a kà eche avọọ. Ọ kà ohinọyị ẹnịnị ana yaatụ ịrẹsụ aga ohinọyị Idevidi vị ọnị ọnị vaa kà eche, ẹnị ohirẹsụ irehi Ohomorihi nịnị, ọnịsẹ nịnị ọnịrị avaba Anijerusarẹmị vị ọnị ọnị vaa kà eche. 14Ẹnẹyịmavara kà ọnị vee gù avaba ẹnịnịị chire ẹngụ. Ada rị ozi bẹẹ vị ọnị ọnị guu chire ẹngụ. Ọnị ẹ yị vaa vayị ẹnịnị ka ọnị ẹ yị vu wa ẹtẹ.
Ijeremaya ộ ka Anisirẹrị nịnị ọnọ, ka asị ẹ sị ẹngụ tụ ẹba.
15Ijeremaya ka, ẹwụ nịnị Anisirẹrị, Ẹnẹyịmavara ọ̀ sị ịrẹyị kà. Sị ụtọ pẹtẹ wa wụ nịnị, asị ụ sị ẹngụ tụ ẹba nịnị. 16Waa sị ụbanyị yị Ẹnẹyịmavara, Ohomorihi awụ nịnị dị ọ̀ vaa mẹ ka ịrahụ ọ̀ za ụ nịnị, dị wa vaa vangga nịnị ịnị ataba. Sị ụbanyị yọ nịnị dị ọ̀ vaa vara ẹtohweyi ọnị wee zi eyi nịnị ịrahụ ruma-ruma. 17Ọ kà, wàa ka wẹ yị wụ nịnị, ọnị vaa jị òrèrè ịnị aku, agụvị ka waa sị ẹngụụ tụ ẹba nịnị. Ọnị vaa jị òrèrè ọngwọọngụ dị ẹgọ ee si agụvị ka asị aza Ẹnẹyịmavara za ọrịhị ne hi aha ọsa. 18Ijeremaya ka Ẹnẹyịmavara ộ ka ẹ yị ọnị ka, ọnị ọ̀ kà a yị ohinọyị ọnịrị ọnyị anị ka è chi hụụnị aga ohinọyị ẹnịnị, agụvị ka ọkẹkẹrẹkụ ẹnịnị ọ sị hụ hụrẹ wa ịrẹsụ. 19Ọnịvị Anijuda nịnị ẹ́ ra ta kara ẹkụra ene hi eyi ụvẹtẹ Ijuda: ẹ yị nyị ọza ana zụ ngụ ne tu wa. Asị avaba Anijuda nịnị za ọrịhị ne hi aha ọsa. 20Ijeremaya ka, re nịnị, ẹwụ nịnị Anijerusarẹmị! Ọnịvị awụ nịnị ẹ raa hụrị Ịbabịrọnị aa vẹ. Aza ana a ka wa sị eyi pe, ọnị ụ maanị aa sịị me eyi nịnị, ịzị ẹ yà kẹ? 21Sị ụ vaa kà nịnị ịjị aza ẹnị ụ rò ka ẹẹ vị ọta awụ nịnị ẹẹ raa nyị ẹbẹẹba awụ nịnị, dị ẹ yaa mẹ ohinọyịị wụ nịnị nị? Ọ vaa zị ụ nịnị anka ọnẹẹ ọnị ịrẹẹ aa zị avọọ. 22Waa naa họ̀ nịnị ka sị ẹ vẹ dị ịrẹyị ẹnẹnị maanị ee tù u nịnị? Yẹ ka, agụvị ebira odivi ẹnẹmẹhị ọnị wa mẹ nịnị yọ nị. Ọnị ọ mẹ ka à hụ̀ ịta hụrẹ ẹwụ nịnị uruvo, dị a si ụkata-ụkata sị ụya rị ụ nịnị nị. 23Anetiyopiya nịnị ẹ́ẹ́ zụ vara ụpẹngụ ẹnịnị àvị ẹzụ ọ zụ vara achẹrẹ anị nị? Ẹnịnị ẹẹ zụ vara a, ẹẹhẹ, ẹwụ nịnị ana ahịka udivi kẹnẹ ụụ mẹ nịnị aanị nị, ẹwụ nịnị rẹ va zụụ kọsẹ ọyịza ọyị mẹ kẹ. 24Ẹnẹyịmavara kà, ọnị vaa gara ụ nịnị hi anka azịzẹ ana ahị kụ na và hi ịnị ọpaapara avọọ. 25Ọ kà ịsị e vee tù u nịnị yị. Ịsị ọnị vaa mẹ ụ nịnị ọ vị ọnọọ nị, agụvị ka we ree hi ayị anị nịnị, dị ụ kụkụ sị ayị tụra ori ana ahịka apẹ kẹnẹ ẹ vị nị. 26Ẹnẹyịmavara ọnị ụvọta vaa tụ wụ nịnị ahwaahụ, dị ọ mẹ̀ ụhị nyị wụ nịnị. 27Ó ree re wụ ụ maa mẹ̀ ịsa anaā nyị ọ ịhyẹrẹ nịnị. Oo re wụ ụ maa hẹkẹ ori nịnị ngụ ịnị ataba ọnịrị ịnị aarẹ zịịzị. Ụ sị mẹ nịnị anka ọnọrụ enee sì ose ọnọhụva anị avọọ nị, avị umaata araka anaa dụ ọnẹẹ zị. Ẹwụ nịnị Anijerusarẹmị, wa sị da nịnị. Ịhị ụ vaa hụụnị ẹvahụra ọ yị mẹ nịnị da?
Currently Selected:
Ijeremaya 13: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
